５月2８日，星期五

一返到學校收到比賽日程，竟然第一節比賽就要去做裁判，等我仲諗住去到睇下其他班點判，偷下師tim..

烈日當空下校長致開幕詞，大家唔需要企响到咁攰，坐响地下得嫁啦，睇真d，好似監犯响操場集合咁！

　中間果個咪校長law

好彩我判果兩班實力非常懸殊，一打個波就飛到勁遠，d人跑過晒一二三壘返到去本壘，個波都仲未返到黎

所以冇人停留响我個位，咁就唔洗講野啦，哈哈∼　做完裁判就到1F班比賽，擊球手陣容如下：

１號天馳同學，兼任埋投球手，要比個叻字佢！因為第一次玩壘球，但擊球同投球都做得好好

２號張旭同學，又係第一次玩，不過又擊到個波上到壘，有為我地班得過分嫁∼

３號文同學，响韓國應該有玩開壘球，响重要關頭次次都擊中個波，厲害！

４號Tom，完全唔識打，好似冇擊中過，不過唔緊要，對手丟波丟得差所以都可以送你上壘，哈哈∼

５號Kelly，女中豪傑，唔止能擊球，做防守接球都好勁，全靠Kelly一手接住個波，本來對手上左壘都要OUT！

６號Thomas，前面三個同學都上晒壘，只要佢一打中其他人就可以跑返黎拎分，可惜。。。冇次打得中

７號Susie，雖然冇打中，但對手免費送佢上壘，仲跑晒一圈返黎為我地班拎分，叻女∼

８號曉婷，比賽途中因為能跑到去三壘，開心到要影相留念，哈哈！而且為我地班拎分，叻女。

９號Joy，完全唔識打，淨係聽我地指揮打唔打同幾時跑，咁都俾佢跑一圈返黎拎到分，奇蹟∼

第一場比賽對手係二年級生，仲有兩個韓國同學响到指揮！我地班又唔識打，接又接唔到波，所以慘敗................

不過唔緊要，到第二場比賽大家好齊心，啦啦隊企响本壘負責提醒擊球手，班長就响側面指揮其他人跑，好有系統∼

　Thomas個姿勢好怪，哈哈∼

　天馳同學投球，壓力應該好大。

　曉婷好開心，因為終於可以跑到三壘

　第二場比賽完結，我地三比一贏左！

　終於齊人影到第一張班相∼

左手邊黃衫果個就係班長啦，好難得佢肯影相，哈哈∼大隻程度同大隻Mike有得揮！今次又係左下角o既大西老師帶領我地班！

　女子組，全部都係靚女，哈哈

　上次行山我地冇一齊影相，今次影返！

　午餐食杯麵咋，陰公！其實係我懶得整三文治，我冇其他同學咁犀利，我好懶嫁∼

運動大會之後去左唱K，爭班長一個就全班到齊！由於太多人所以分開兩間房，一間係唱廣東歌加韓文歌加日文歌

另一間唱普通話歌！我就兩邊走聽下人唱歌。文同學同佢個朋友白同學唱韓文歌，冇人知佢地唱乜，但好好聽勁似播CD。

Ruby，Mira，Joy見到有廣東話歌唱好興奮！Thomas同台灣女生唱"五月天"d歌瘋狂到不停跳！Tom竟然有聽過w-inds. o既歌

天馳同學邀請張旭同學一齊唱"甜蜜蜜"，話一人唱一句，不過自己就唱唔停，成首歌張旭同學淨係唱左"AH..在夢裡"一句，笑死！

650 YEN一位，好多款飲品任飲，唱左4個幾鐘到7:00PM先走，都幾抵！臨走响卡拉OK門口黎張大合照 ^^

暫停左幾日冇打日記，有好多野都唔記得左啦，我盡量記下有咩特別事發生∼

５月２４日，星期一

　响便利店排到埋去俾錢時文同學先話呢個麻麻地好味= =" 唔早d講...好彩味道都ok~

經歷過星期日有意粉冇醬汁後，放學第一時間去超市入定d貨！仲買左好多日用品，咁就用左三千幾YEN，真係洗錢容易搵錢難！

　如果上面果兜d蘿蔔絲用黎整蘿蔔糕就一流啦！！哎吔，好想飲茶呀＞＜

５月２５日，星期二

心情超差o既一日！可能因為唔夠訓，個腦轉得慢，所以遇到學習上o既問題，唔明老師教乜！

訓左幾個鐘頭晏覺後即刻醒晨晒，心情都好返好多。不過因為心情太差，差到唔記得左拍午餐同晚餐o既相，哈哈！

５月２６日，星期三

進化論：7:00AM起身　－－＞　7:15AM　－－＞　7:30AM　－－＞7:40AM，越黎越遲起身，早餐都冇時間食，要改啦∼∼

無啦啦黑埋個天落雨，我得把縮骨遮，唯有同Susie親密地一齊擔，雨中漫步好sweet呀 ^3^　冇帶新遮先黎落雨，唔制呀＞ｏ＜

　晚餐食咖喱，食得太飽令個人呆呆滯滯。。。

如果失眠，溫書係最好o既解決辦法，因為我又不知不覺間溫溫下書訓著左，哈哈！

５月２７日，星期四

　右邊個包好好食∼

上堂收到mail個電話响到響，第一次上課唔記得較冇聲，好彩電話放响袋入面，又唔係好大聲，只有Thomas發現，好險=O=

終於到左測驗日子，難到抽筋，我諗今次成績應該好差！考完唔諗咁多，點諗都改變唔到個結果嫁啦∼ ^^

  　午餐，大家都話我食太多，哈哈∼　不過我真係好肚餓ma..

　個樣係咪好似魚蛋？芋頭蓉黎嫁！

　已經唔炸o既天婦羅，不過好豐富呀！

**有一日我夢見大家一齊去姑姐屋企參觀，一入到間屋係好似酒樓d貴賓房咁，四四方方一個窗都冇，只有兩張大圓枱，

之後姑姐叫我地參觀下佢間房，佢一打開房門真係嚇親我，我見到以下情景∼ (專登上網搵張類似o既圖)

　根本唔係叫房，係人地擺酒o既龍鳳大禮堂咁款！

而間房係好似上面張圖咁放滿晒一行行枱，唯一唔同o既係全部都係麻雀枱，仲要每枱上面都放左箱麻雀，哈哈∼

今日心情超差！！！！！！！

第１３課書越諗越唔明。。。。

派返黎填助詞o既功課又有錯，究竟自己識唔識？！

黎緊星期四要考第１１課書，好驚唔合格，今次係變態老師出卷。

之後兩星期又要考第１２同第１３課

六月中有一個大考，成績唔好就要調去低ｄo既班

下星期一又要同班主任面談

上堂唔識仲要俾老師黑面响到鬧，痴線，返學真係貼錢買難受。

好煩呀！！！！！！！！！　＞ｏ＜

要暫停更新直至星期四考完試，我怕考得差俾人鬧！

雖然心情仲係差，但已經好左好多∼∼

多謝同學仔及朋友仔o既關心，Celine仲專登買左個puff請我食tim！