尋晚九點幾鐘就去到奧運站, 因為咸豐約咗我去奧海城睇波。

去到奧海城二期, 先知要係個度消費至少二百元先可以坐係度睇波, 無奈, 於是去咗奧海城一期既機鋪度hea.

第一次真真正正踏入機鋪, 把聲真係好大, 不過我幾鐘意呢度, 入面 D人唔似石蔭個D機鋪咁雜, 老實講, 我覺得D人幾純, 而且D  game幾正, 跟住lucy落咗黎玩佢最擅長既打鼓機, Paul 之後又黎埋, 於是大家一齊hea 到十二點半先走, 我都玩咗一隻賽車game 同一隻射擊既 game, 幾exciting, 不過我最鐘意頭文字D, 個畫面好靚, winning都ok, 不過我縑個芒太細。

經過一輪轉折, 我地係地下搵到幾個企位, 好不容易捱到二點開波, 上半場我睇得好辛苦, 我要成日跕著腳睇, 好彩係完半場後我地搵到另一個更好既位, 唔係既話實抽筋。

上半場法國博得一個十二碼, 俾施丹射入咗, 之後十四分鐘意大利懣一個角球追平, 之後場波就愈踢愈好睇, 快上快落, 意大利既進攻亦有板有眼。

之後下半場法國取回不少攻勢, 甚至重現回分組賽時對多哥既流暢進攻, 不過亦無法攻破意大利大門, 其中以施丹既一記頭鎚最具威脅, 而意方亦食了一記炸糊。結果完下半場時雙方都冇進帳, 要睇埋加時, 係加時個陣意大利回復真我, 係咁俾法國狂攻, 而只依靠長傳反攻, 結果係意大利既嚴密防守下, 法國一球都入唔到, 而施丹更因以鐵頭功擊到一名意軍球員而被趕出場, 估唔到一代球王施丹既告別戰既結局係咁既, 幾灰。

之後要射十二碼先至可分出勝負, 講真, 雙方既守門員係是次比賽既表現都好出色, 不過係今個環節既表現就強差人意, 一個十二碼都球唔到。結果法國其中一名球員既射門中楣彈出, 就係因為咁, 意大利奪得2006年世界盃冠軍。

之後同成班人出咗出面坐同吹水,  坐到六點鐘搭首班地鐵列車出葵芳, 係葵涌廣場既大家樂食早餐先返屋企瞓, 點幾鐘先起身。

好失落, 開電腦之後又要更改桌面同日記既頭像, 真係好失落, 好空虛, 好似冇晒人生方向咁。

假如阿爸阿媽真係逼我係暑假出去補習( 佢好似要我科科都補 )的話, 我諗, 即使我係高考中所補既科目中擮到 A, 我一樣會向人講我呢個A係唔應該係張cert上出現,  張cert 不配被印上這個A。 我不喜歡補習, 係我眼中, 你要出去補習即係代表你冇能力去讀好該科, 故此才要補習, 補習不一定有效, 我相信我係會考中Bio. 的B, 一定好過好多係出面既補習社補Bio.既人。 我喜歡無師自通, 不喜歡名師指導。憑自己雙手所發掘出來的, 才是真正值得被你擁有的。

***

今晚同家人出荃灣食野, 好耐冇試過一家人出石蔭以外既地方食飯。 感覺好怪,  失去了平日獨自走在街上的那種自由的感覺, 我繼續保持沉默, 而荃灣亦不是我想去的地方。

不過個間「霸王山莊」既野真係好好食, 真係令我意想不到, 而重頭戲 「花雕醉雞」雖令我有D 失望, 因花雕既酒味似乎完全掩蓋雞味, 不過我十分喜歡那酒後餘香。成家人食到成點幾鐘先返屋企, 兩點幾鐘先上床瞓。

今日, 我將 「適應性防衛 」誤寫成 「適應性中場 」, 令 K . Fung 捧腹大笑。

巴西同英格蘭在六小時內先後出局, 令身為兩隊的支拎者的我似乎失去了睇世界盃的動力。

我既夢幻決賽, 係英格蘭對巴西, 點知唔可以, 跟全我退而求其次, 希望佢地係四強碰頭, 並且由巴西撃敗英格蘭, 之後英格蘭攞季軍, 巴西就攞冠軍。

世界盃之前碧咸仲話要係世界盃中撃敗巴西, 點知連巴西都仲未碰到就收咗皮。

連續睇住兩隊心愛的球隊先後出局, 我個心都幾hurt

當然, 我們不可能期望巴西年年攞冠軍。

今年球王比利唔同咗, 佢話德國嬴, 德國就係十二碼撃敗阿根廷, 佢之後又話巴西會輸, 我當時已有不祥預感, 點知法國真係嬴咗。

不過法國真係嬴得有理, 我無話可說。

本人預計這場賽事將會是一場世紀之戰, 最後果然不負眾望。

十點鐘去到餐廳, 原來一早已經坐滿晒人, 真係出乎我既預計, 正在思索如何搵位, 點知見到 超 Lee , Have 健同曾現坐係近門口既位, 於是走去搭枱。

開波之後冇幾耐, 肥祥又黎埋, 於是五人同枱食飯, 仲叫埋啤酒飲, 我都飲咗少許, 仲每人下注少許, 跟馬會規則, 我買德國嬴。

阿根廷既球員可能見自己矮德國球員成個頭, 冇高空優勢, 故此採用對塞黑時所用既有組織既傳送, 該步撕破德國防線, 係上半場, 阿根廷多次殺入禁區, 好在德軍防守尚算Ok, D阿根廷球員一慢下來就有三個德國球員走出黎圍住佢, 守得住。 而德國亦真的充份利用身高上的優勢, 頻用高空波突破對方防線, 可惜既係阿根廷既防守真係好出色, 使德軍未能作出有威脅的射門, 上半場以零比零完場。 我覺得上半場阿根廷較佔上風, 德國欠缺進攻板斧, 令我有D擔心。

下半場初段阿根廷真係依靠一角球領先, 之後德國積極搶攻, 而此時阿根廷既教練作出咗一個錯誤既決定, 就係換出列基美, 冇咗佢, 阿根廷既進攻能力減弱好多, 而佢地既門將亦因一次撲救中受傷被換出, 而德國既高空轟炸終於奏效, 係80分鐘, 德方一名球員係左路用腳傳中, 接應球員以頭將個波頂俾高路斯用頭將個波頂入網。 雙方於完場前亦沒法增添記錄, 以一比一完場。

其後既加時亦一如我所料, 打和。

我終能見識一下射十二碼既殘酷了。

在首位德國球員徐徐地走去十二碼點的一刻, 我感覺到作出那動作所需的勇氣是很大的。

雙方的球員, 無論是後備席上的或是球場上的, 都互相搭著膊頭, 也訐在這一刻, 他們的壓力實在大的只有這樣做才能妤媛少許。當其中一方的球員成功射入, 該方的球員雖鬆一口氣, 但面上的神色仍未放鬆。

德方既頭二名球員均順利射入, 排第二的波歷克出奇地沒有「打飛機」。阿根延既第二名球員的射門被德方門將列文撲出。

雙方既第三名球員均一射中鵠, 德國的第四名球員射入, 此時背負最大壓力既, 應係阿根延既甘比阿素。

點知佢射失咗。

佢先係傻笑, 之後痛哭, 好感人。

今朝早七點半就返到學校, 坐校巴出去屯門裘錦秋中學參加一個鬼佬既講座, 題目為開心的秘訣。

不過, 我覺得佢講既野都係老生常談, 對我幫肋不大。

之後仲以為可以上 P. E堂, 點知Ms 袁走個黎搵我, 同我講野, 內容我不在呢度講, 大家心照。

不過最灰既係佢要我即刻去教員室門口做Chem. 既功課, 做到連lunch都冇得食。 超灰。( 事後, Karen Cheung 話我當時似乎失去了靈魂, 只剩下軀殼 ) 若我要用一個四字詞來形容當時我的心境, 我會選 「 行屍走肉」。

之後個三堂Chem. 仲係好唔開心, 放學之後自己一人去咗M記食野, 返到屋企都係唔開心。

似乎我在石蔭區外才能感到開心, 似乎冇人能開解我。

大乳牛係Chem. 堂問我 : 「 Ben Chung, 你仲要逃避到幾時 ? 」 這是一個好問題。

呢個問題, 我老早就問過自己, 只是我並不知怎樣回答。而除了學業之外, 我仲逃避緊另一 D 野, 原來要同時面對一大堆切身問題, 是要很大的勇氣的。

老實講, 今日我上午既心情真係好差。 不是憤怒, 而是心灰, 好久也沒試過這樣地灰了。

考完試仲要當值固然是原因之一, 不過主要原因卻是來自極差的考試成績。

Chemistry : 2 / 100

Mathematics & Statistics : 26 / 70

是不是很難想像Chem. 會拿 2 分吧?

而M&S的失敗, 令我面臨job M&S的危險。 而附近既同學的心情亦唔多靚。

上午的心情真係好差, 不過我發覺我不能向任何一人傾訴。學校似乎真的不能帶給我快樂了, 我似乎亦真的不能從學校中找到快樂了, 係今個學年, 似乎沒有一件令我真正感到開心的事發生過。

下午要出去考oral, 由我搭巴士離開石蔭的一刻, 我的心情終能平復下來。

畢竟, 能自己一人離開石蔭, 自由地在城中漫遊的機會一年中屈指可數, 而在這不開心的時刻, 離開這個不開心的地方亦帶給我喘息的機會。 其實, 自己差勁的成績是自己不用心溫書所致的, 都已經知道要拿這個成績, 做乜搞到自己既心情咁差?

去到試場, 有一大堆人係出面做問卷調查, 我扮同人傾電話走咗入去, 若有下次, 我可能會故意用粗口罵佢。

駐守係waiting room個個人係一個阿伯, 我英文仲講得好個佢, 好彩D問題都唔算難。

點知一入到Examination room, 個兩個考官好似趕收工咁, 我都未坐低就話要開始, 而個個 Mr. Green講英文講得超快, 打亂咗我既陣腳, 我招架得好辛苦。之後Group Discussion好好多, 一男三女, 成功取得開頭, 做咗leader, D女既英文程度quiet good, 有人可以講到「唐氏綜合症」既英文, 搞到全team 人呆咗幾秒先知點解, 不過好彩既就係佢地既樣貌均屬平庸之輩, 不能令我分心, 而且佢地英文雖然好, 不過未具名校水準, 令我可以做到 leader, 除了臨收工之前個幾秒有Dead air  之外, 其餘既時間太家都好熱烈地討論, 應該會得到不錯成績。

之後係喇沙中學門口搭車出尖東, 食咗一碗車仔麵, 跟住搭 35A 返屋企。

不知為何, 我係上一屆已經發覺自己幾喜歡英格蘭, 好彩佢上屆係係八強戰輸俾我另一喜歡既巴西, 否則我一定會幾唔高興。

今屆, 英格蘭係十六強面對厄瓜多爾, 我覺得厄瓜多爾既球員腳法不算好, 惟一的本錢便是強大的肺活量。 的確, 厄瓜多爾的球員每位都胸肌厚實, 企出黎成舊碳咁。

一開波, 雙方的打法都是以整體為主, 雙方的球員似乎都沒有閒情去賣弄腳法, 個波一到自己腳下就急忙將個波踢上前算數。 不過我覺得英格蘭的踢法太保守, 而且佢地好似幾依賴朗尼咁, 好彩佢係球場上表現生猛, 不過佢欠缺隊友支援, 而且亦似乎俾厄瓜多爾 「專人侍候」, 發揮唔到佢真正既實力。 而厄瓜多爾係上半場亦試過係英方門前製造驚險場面, 嚇得我一身冷汗。結果雙方係上半場均無進帳。

下半場, 英軍踢得放咗, 不過亦未能攻破厄瓜多爾大門, 不過係六十分鐘左右, 碧咸靠一個妙絕既罰破領先一球, 之後艾歷臣換入一名防守中場, 之後英方既防守就強咗好多, 而厄瓜多爾亦沒有因落後而加強攻勢, 亦沒有作出任何戰術上的變動, 結果英格蘭險勝厄瓜多爾一比零。

係今次賽事中, 似乎碧咸同朗尼先交足功課, 謝拉特同林柏特多次射門不入, 似乎未係係最佳狀態, 而碧咸係入咗一破就似乎係球場上消失咗咁, 佢地既踢法亦太過保守, 假如碧咸個球罰球不入, 就可能要打加時, 到時賽果就好難預料。若果佢地係八強戰依然係咁既水準, 可能死係葡萄牙腳下, 希望佢地到時生性D , 即使要輸, 最好都輸係巴西腳下。

覺得碧咸所面對既壓力好大, 只要個球罰球不入, 就要面對國內傳媒既批評, 仲會打撃到成隊既士氣, 若果輸埋就做埋千古罪人, 所以, 我覺得佢所開既每一球自由球, 角球或罰球都背負住好多人既期望。

德國 Vs 瑞典

老實講, 呢場幾冇癮。

問心個句, 本人幾想德國嬴波, 不過我想佢地係臨完場前博到盡先以 1 至 2 球小勝, 點知德軍係瑞典未入狀態下, 開賽僅3分幾鐘就先失一球, 仲以為之後瑞典會如夢初醒打好些少, 點知德國係 12 分鐘左右再入多一球, 係十二分鐘左右已經入二球, 對於作為中立觀察者的我, 呢場賽事的可觀性已大打折扣。

不過奇怪既係德國其後係打多一人既情怳下仍冇進帳, 換邊後瑞典取回不少攻勢, 不過德國守得好密, 而瑞典得來的十二碼卻宴客, 德國的攻勢亦只是放緩少許,  波歷克多次起腳不入, 由畫面可見, 佢既心情唔多靚, 似乎佢都唔多滿意自己的表現。

係今場賽事中, 我發覺同揭幕戰相比, 德國隊完全脫胎換骨, 球員之間十分有默契, 進攻悅目, 而防守上的漏洞亦似乎已經改善過來, 加上隊長波歷克復出, 佢自己經驗豐富之餘, 仲有一大班血氣方剛既隊員, 直惰係如虎添翼。 相反, 瑞典無論係攻同守都不及德方, 佢地好喜歡玩長傳, 欠缺有組織既攻勢, 而防守欠缺連貫性及默契, 好多時侯德國進攻時, 瑞典既中場都唔回防, 結果搞到後防風聲鶴唳, 加上打少一人, 以及射失十二碼令士氣受打擊。此消彼長下, 德國嬴得有理。

我而家已經唔會再懷疑德國是否有能力係今屆世盃奪得冠軍。

假若阿根延可以進入8強, 我敢肯定8強的第一場賽事將會是一場劇力萬鈞的比賽。

估唔到奇連士文既彈跳力係咁好既                                                       德國球員興奮的一刻:

足球的殘酷一剎:

今鋪你仲唔死 ! ( 請留意球證的面部表情 )

瑞典射失十二碼                                         心灰意冷的瑞典教練

南韓 0 : 2 端士

法國 2 : 0 多哥

餐廳內, 我眼前的兩部電視機分別直播著以上兩場賽事, 令我睇到眼花撩亂。

我以為南韓對端士會較好睇, 點知雖然係好睇, 不過法國對多哥個場仲好睇。

今次兩場比賽幾乎係同一秒開波, 在首十分鐘, 法國隊禁住多哥黎打, 也許必須嬴先可出線, 法國隊似乎使出真功夫, 進攻如行雲流水, 同捷克的戰術有些不同, 捷克經常係由自已中場既人傳波俾前鋒, 再由前鋒帶波直接衝對方禁區。 但法國則是由 A 將個波傳俾 B , 再由 B 傳俾 C , 一直傳到係對方禁區內接應既人, 再由佢射入, 所以感覺上快好多。可惜的是佢地既 「足球傳遞鏈」經常係未入禁區前就斷咗, 而佢地亦有多次破網機會, 可惜唔係食炸糊就係臨門一腳炒高。令我有少少意外既係多哥既實力一D都唔弱, 係抵擋完法國既功勢之後實行快速反撃 ( 降決咗獎金問題之故 ? ) , 而且佢地既球衣顏色好似巴西, 令人以為巴西好似對緊法國。

另一邊廂亦同樣精彩, 南韓同端士互有功守, 不過我覺得前者既戰術應用得不太恰當, 佢地常用高空波黎傳波, 不過佢地既對守係端士, 係冇身高上既優勢既情怳下用此方法黎傳波是否有些不智 ? 而端士係22分鐘既第一個入球亦係端士憑身高上既優勢取得的, 不過呢球入得幾唔抵, 因為入球個位係用頭將個波頂入網時個頭撞到一位南韓球員既頭, 結果同告受傷流血, 之後南韓個位仁兄仲戴咗一個好古怪既頭罩入返場內, 結果端士帶住一球返更衣室, 不過法國就不能係多哥身上取得入球, 0 : 0 完上半場 。

原本仲以為南韓會係下半場好似上次對多哥咁憑著體力上既優勢連追兩球反勝, 不過令我失望既係佢地係今場似乎發揮唔到此優點 ( 高麗人參食得唔夠 ? ), 換入多名後備毫無起色, 仲係 77 分鐘俾端士入另一球, 不過入球個位其實係越位在先, 不過球證唔知點解睇唔到 ( 個球證好似揭幕戰個位 ), 之後南韓亦有向球證反映, 不過不得要領, 之後南韓成隊波就頹晒, 結果以兩球之差落敗。

反而另一邊既法國係換邊後連入兩球, 之後佢地又hea 起上黎 ( 另一場阿根延對塞黑 ? ), 不過好憎法國隊中著22號球衣個位, 佢連續兩次射門均炒高, 個樣又衰, 真係好想打鳩佢。

結果, 端士同法國攜手係 G 組出線, 令今屆世盃既 32 強賽事劃上句號。