今日,本來係第一日嘅聖誕假期,但係因為我地要補課,所以仲要返學校。我今日專登遲d先返去,因為我覺得返學校都越來越變得冇意思啦!
返到學校,首先我地上禮堂聽個d講座,我必須承認,呢一個係T.S.A,即係系統性評估,但係老師好似擔心呢個考試,比其他報分試更擔心,比如說,報分試前從來都冇補課。
聽完個d無聊嘅講座後,我地上返課室,好彩今日係跟學號坐,唔駛同隔離個位坐,都係一件好事。首先係中文補課,中文老師俾咗一份模擬評估卷比我地做,都唔算太難,但係有幾題都唔係咁肯定,做呢份試卷都用咗好耐時間,之後我地就係課室小息。唔知點解,我近牌唔係咁鐘意係課室裏面小息,反而喜歡係操場上小息,可能可以同其他別班的人一齊啩!
小完息後(實際上比平時小息更快),又係英文補課,同上堂一樣,又係做卷,但係老師百密一疏,唔記得收返份答案,結果.......大家都清楚啩!
過咗一個鐘頭後,又係小息,跟住又係數學補課,又要做模擬試卷,然後就放學,放學後,我仲未返得屋企,因為我要去健康院檢查身體,媽咪已經係校門外等我,我地坐咗幾個輕鐵站,然後就到,我地唔係太識路入健康院,只好逢人必問,幾經辛苦先入到健康院。
檢查其間,我去驗眼,醫生話俾我地聽我有d類似色盲病......咩話!我連紅、燈、黃、綠、青、藍、紫都分得清楚,點會有個隻病呀!後來佢解釋俾我聽,如果兩種顏色好相似,譬如話係紅色同紫色,兩種混合埋一齊,正常人(我指嘅係冇病嘅人)可以好容易就分得清楚,但係我......卻唔能夠分得清楚,咁咪即係有病囉......
省d啦,我有病,咪即係太陽從西邊升起,冇可能架嘛......
