今日係聖誕聯歡,唔駛著校服,所以我可以瞓晚d,唔駛花咁多時間嚟著校服。
我冇好似其他人咁,好早就返學校玩,所以當我係返學校嘅途中,冇見到其他同學,我都唔覺得驚訝。
返到學校,如我所料,到處都係聖誕嘅裝飾,佈置得好似一間幼稚園,我只係同朋友係校園裏面到處漫無目的咁行,甚至差d入埋女廁。
上到課室,我冇同隔離個位講個野,因為我而家仲氣佢氣得要命!好彩我地高年級要落去禮堂進行聖誕聯歡,呢個環節係我最唔鐘意,因為每個遊戲都係咁無聊。遊戲嘅先後次序我都唔記得,好似有一個遊戲叫"猜猜我是誰",玩法就係喺螢幕俾一d bb相俾我地睇,而bb嘅成人版就係學校裏面嘅老師,當公佈答案時,我都唔係咁相信佢個位老師。
跟著好似播咗一段片,唔係咁好笑,但係d同學卻笑得捧腹大笑,都唔知點解,之後6E(精英班)嘅人就出嚟表演魔術,簡直唔敢相信精英竟然會做出一年級都識做嘅魔術,咁嘅材料都入到精英班,令我有d懷疑......
我地上返課室後,就係大食會,成績比往年更差,因為枱上都冇擺滿小山似嘅零食,只係女食女嘅食物,男食男嘅食物而己。之後我地就玩遊戲,玩個陣時,發生咗一段悲劇,話說個時玩緊掙椅仔,A同學同B同學玩過火,為咗一張椅而大打出手,結果......
放學時,我地唔走得,因為訓導主任因為以上嘅事嚟罰我地唔準放學,要搵人解釋清楚究竟發生咩事。真係無辜,我地呢d「星斗市民」就俾人食死貓,返到屋企,我氣得一口氣做晒所有聖誕功課。
