今日係只有六年級先可以去嘅三日兩夜教育營嘅大日子,由於一點幾先要去學校集合,所以我今朝可以遲d先起身。一起身冇乜野做,我剩係做咗d功課,然後係去之前再清點一下我個背包要帶去教育營嘅野,然之後就出發啦!!!
返到學校,因為只係六年級先要去教育營,而其他級嘅同學就留係學校小息,所以我地全級就霸佔咗成個操場係度等旅遊車嚟。
車嚟啦!但係老師卻好似仲唔俾我地上車,佢地花咗十五分鐘再講要我地要守邊條邊條營規,先俾我地上車。呢一趟車程一d都唔舒服,因為全車人都帶住一個大背包(有d仲帶埋行李箱呢!),攪到我地好迫,每次當車轉彎時,我地都跟著嗰個方向滑,令到我地一落車之後,都覺得有d想嘔。(順帶一提,有人係車上面都嘔咗,攪到老師好似清潔工人咁清理d嘔吐物,十分惹笑)。
落車之後,正如我啱啱咁講,我地都有d想嘔,眼前出現咗一幢可算高嘅建築物。等老師再數多一d人數之後,就領著我地入去,裏面嘅裝飾活像是一間幼稚園,到處都係一d色彩繽紛嘅牆壁、裝飾品。
我地先上六樓嘅餐廳聽呢個營嘅野,然後就往餐廳隔離嘅宿舍走去,男生嘅宿舍喺六樓,而女生嘅宿舍就係七樓。全級都分成十七組,每組大約有十人左右,我跟組員入到房之後,我地大家都呆咗係度,只見房裏面有十一張床,每隔兩張就黏在一起,好似一張老夫老妻睡嘅床,但係宿舍個張床中間就有一塊板隔住。
之後就係營地活動,我和其他朋友去咗體育場打羽毛球,當打完一身大汗之後,就返宿舍休息。食完晚飯(三餸一湯,白飯任裝)之後,就去咗體育場參加學校個d活動,玩到一半時,c無端端俾男生整喊呀,真係抵死!
之後我地去做沖涼,浴室到處都係人,我等咗好耐先有得沖,浴房裏好似啱啱落完大雨,水浸咁,搞到我好狼狽。返到宿舍,大家都沖完涼啦,諗著瞓啦,但畢竟都係隔生床,所以我瞓極都瞓唔到,其他組員都係,所以我地就係地下搞大食會,每個人都要提供食物。但係搞呢個大食會一定存在好多嘅風險,因為宿舍外有老師巡,所以有d比較大膽嘅同學就扮去廁所,順便睇水,一聽到有老師入嚟房嘅消息,全部人即刻拾晒野,將d野放係一個唔當眼嘅位置,然後就瞓係張床扮瞓。當老師走咗之後,我地又攞返d野出嚟食,我地三點幾先可以入睡,本來我兩點幾就瞓咗落床,原因就係因為有d人係度玩電筒,射嚟射去,仲有d人不知羞恥瞓落我張床到,令到我三點鐘先瞓到。
