因為琴晚瞓覺嘅時候,有一個傻佬無端端喺樓下打咗一個勁大聲嘅乞痴,攪到我從睡夢中突然驚醒起嚟,令到今日本來要七點八前返到學校,我卻七點半先起身,結我匆匆忙忙刷牙洗面,急忙換上校服,一邊啃麵包,一邊跑返學校先唔至於遲到。

  返到學校嗰幾堂,風平浪靜。唯一值得一提嘅係,體育老師(佢係全校最惡嘅訓導主任)用咗十五分鐘嘅時間嚟鬧兩位同學(佢地就係之前推我去c個度個兩名同學)。聽後面嗰個講,佢地因為踩單車撞到一個小朋友,但撞到佢之前卻不顧而去,下文就唔知點樣啦!鬧完之後,就全班落去上體育堂,呢堂主要係教點樣開排球,好痛呀,一開波時,隻手簡直痛到呀媽都唔應得呀!!

  音樂堂時,我發現自已冇帶音樂用品,好彩音樂老師冇發現,唔係就要俾人罰唱歌。

  放學時......唔係,係放學之後,我要去上羽毛球訓練班,老師首先講解咗一輪關於比賽嘅條例之後,就俾我地自由練習,老師吹哨之後,所有同學都好似發咗癲咁,攞晒羽毛球同羽毛球棒同埋其他同學一齊打,在羽毛球漫天亂飛的情況下,我不時俾人用羽毛球射中(唔知發球者係有意剩係無意),或者我打中人(有心剩係無心,俾你估下!)。

  放學之後,功課好難呀,我要參考數學書嘅內容先做得掂呀!