又係一路工作一路聽pua，呢個節目其實學到唔少道理。
咁o岩聽主持講左個故事，真係要寫個blog記一記低佢，
個故事係講神童輝以前仲未同大劉熟果陣，
有日神童輝上大劉屋企，大劉指埋幅畫問佢：
「你覺得呢幅畫值幾錢？」呢個問題真係點答都衰咁滯，
你求其up個數出黎即係話你唔用腦啦，
你話無價之寶，佢只會求其招呼你飲杯茶然後過主啦，
於是神童輝答300萬，大劉就話「好，就300萬賣比你。」
神童輝第二日就開左張300萬o既支票比佢秘書......
即係話要跟有錢人做野就要拎出D誠意，
你有400萬就要先拎300萬出黎，當然都係一場賭博，
你唔比第二日大劉話「hehe傻仔，幅畫幾廿萬炸。」
另一個故事就係，個主持人師傅以前幫鄭氏家族做野，
次次食飯都係做跟班o既埋單，幫有錢人做野埋單都埋死你。
有錢佬亞爺教仔，就係要D o靚先跌左D野先有動力去執番，
所以痴埋有錢人度就要先負出佢先會有機會信任你。
有錢人最重疑心，佢總覺得痴埋佢身邊o既人都想搵佢著數，
經常有人話D女有番幾分姿色，搵個有錢男友un un腳啦，
其實個男友有錢唔代表會分D比條女，
我識個女仔前男友搵幾廿萬個月有遊艇，
但個女仔響佢身上一蚊都撬唔走，就係咁~
衣家呢個女仔朋友都係過住草根階層o既生活。
 

apm扭蛋果層(好似係4樓)新開左間土司工坊，
見新野就試下啦，睇個名以為係台灣野，
其實係亞洲野，即係D咩潮洲乜呀竹星乜果D...
就叫左個小魚雞腿椰醬飯，加個百事就$51，
碟野有D花生、有D好似炸麵咁o既炸小魚，
有塊蛋片o禁住響D椰醬飯上面、有D三巴辣醬，
食落個飯只係得淡淡o既椰醬味，唔係好覺，
不過筆一啖飯加多一口雞肉、一粒花生、
一忽仔蛋片、塗小小三巴辣醬一齊食又唔錯喎，
集軟、硬、咸、辣於一身，一次滿足幾個願望。
 

話口未完，本mobile叢書又殺埋黎，
今次同本F&B雜誌撞晒時間，
F&B假假地都第一期，萬事起頭難，
一定好多野要左執又執改到天花龍鳳...
真係一日比48小時我都唔夠用啦。
響屋企架設排版系統就係為左應付呢個，
不過就算比預期更快做起都要遲D交，
如果今次又做到，下次只會變本加勵，
老細試緊底線，4日做到呀？試下3日啦~
做壞規舉只會搞到無啖好食。
Sindy、珊姐都話之前就係我做得太快，
所以咪次次都預我3日內搞掂本書囉，
喂唔係本本都梗版咁易做架嘛！
邊有得咁計o既姐？
 

最近ATV狂炸呢首歌，我無睇字幕，
基本上只係行過無意中聽到，
(我都唔多睇電視，係我亞媽開電視炸)
昏睡百年國人漸已死，我就奇怪，
點解D歌詞咁大吉利是o既？
幾次都係聽到「漸已死」喎，
軀使我真係留意下個字幕唱乜，
原來係漸已醒，完全無諗過係醒添...
邊個作架首歌？風格已經娘到爆，
仲要容易聽錯，唔係剩係我一個聽錯嘛？
最近ATV公然阻止發牌比人開多間電視台，
唔gur好正常，唔好公開嘈啦，認真樣衰，
人地無線同埋其他收費電視都無出聲，
唔通發多個免費電視台對佢地無威脅？
醒D好無，真係唔想佢發牌o既，
咪比D錢疏通下政府洗橫手暗啞底阻止囉，
理虧o既方向仲大大聲唔會有人認同，
好似500蚊人情女咁，只惹黎全民圍插，
將呢D理虧o既諗法收埋，背後咀咒就算啦。
 

自從跟開果本日韓潮流雜誌改潮換代，
休刊期間賺得一個月唔洗通頂三四點前訓。
好景不常，要黎o既始終都係要黎，
呢期埋版又係避唔過通頂o既命運...唉~
一個人做50版有足夠時間o既話唔係問題，
通頂先係最大問題！不過編輯話下期唔會，
今期因為要改版心用多左時間先咁...
好聽住先啦，不過黎緊本時裝雜誌更煩，
有機會痴埋本手電蟲書一齊殺埋黎，
係就大獲比我一日48個鐘都唔夠用。
加上時裝個編輯無咁順灘情況極唔樂觀。
今朝八點半答港鐵番歸，油塘站塞到呢，
又係要四班車先上到車，入到車廂又迫爆，
間中一次半次咁樣都仲可以忍受o既，
真係唔清楚果D日日要咁番工o既人點頂...