睇番深淵傳說，睇左十零集，睇到廿幾話，
其實開頭唔太好睇，男主Luke一副欠扁屁臉，
係中段比范棟左一野後變番大路主角應有o既款，
大佐先有領班o既風範，主角做左跟班，
王女真正未婚夫原來係亞修，Luke悲劇了，
後來發現王女只係傭人掉包，王女也杯具了，
伊昂神萌，比女角更溫柔，不過廿幾話便當了，
處處維護伊昂大人果個一直都係內奸，
表面好陽光查實整個劇本充滿住sosad劇情。

最近仲睇埋各類幪面超人片，
包括最新o既Wizard、上一代o既Fourze，
OOO、W、甲斗等...
細個都有睇開幪面超人RX，
之後斷左一排無睇，衣家先再睇番。
衣家D幪面超人同以前唔同係變身好多配音，
例如W變身器會發出「joker」叫聲，
Wizard變火狀態會叫「he he he he he...」
仲有每個成為幪面超人o既原因都好大唔同，
Wizard係主角被魔化失敗所以得到特殊能力，
W同Fourze係就咁粒條皮帶上去就變到，
OOO就係發現遺蹟(古文明？)
甲斗就搶左人地組織個變身器自用(好白木 XD)
即係邊個拎到條皮帶就邊個都可以變身。

為左有效管理資金流向，所以list出一週用錢記錄以供自己參考，
亦開一個新分類叫金管局(開開下居然開左咁多分類...)
當然有D細微位無乜可能計得清，所以只記D大路消費，
果D答車、買零食o既記到就記記唔到就skip...
星期一：COCO=約$75
星期二：KFC2號餐+雞粒=$47、六壬茶餐廳+的士=$100
星期三：富臨farewell=$105
星期四：美心粟米肉粒飯=約$30
星期五：吉野家野菜煎雞飯=約$30、的士=$80、G-zone=$15
星期六：TOA=$489
TOTAL：約$971
哇頂，未計答地鐵來回一個星期都用差唔多一千...

唔知會唔會係公司開辦以黎走得最多人o既一日，
日韓潮流雜誌裁員走左一個排版兩個記者同總編，
收工後一班同事同其中一位記者搞左個farewell，
響觀堂廣場15樓間富林酒樓打邊爐每位$105，
不過主角似乎變左亞超，個個都迫佢隊酒，
對於我呢個滴酒不沾o既人黎講好恐怖，唔多出聲，
另外今次因為無女o既關係，全部男同事講野好放，
又講夜總會又講淫野，亞昌連避孕套都拎埋出黎，
呢D場面之前o既公司飯局係唔會有機會見識到。
不過同部門o既另一位記者同總編居然無出席，
最尾果日仲係叫左個麥記，真係輕輕的走了...
估唔到原來同一日仲有個攝影叢書總編都走埋，
做左5年都係唔聲唔聲靜雞雞走，之前都無先兆，
係番到屋企見佢facebook話係最後一日先知。
仲有一位影音雜誌o既記者將會月尾走，
一個月走左六條友......

最近幾日鼓起勇氣山埋房門訓教，
好在都無再出現怪影，
但就唔能夠一教訓天光，
總會無厘啦間醒兩三次，
唔通係比野整醒？

其實間茶餐廳原名叫乜名無乜印象， XD
另一個特別之處係呢間野座落於某街426號，
明就明唔明就算，之所以有六壬呢個別稱，
係因為以前呂少個師傅壇o既人經常黎呢度飯局。
今日諗住OT趕手電叢到尾班車走，
點知公司d人居然11點幾就收工，變左早走，
咁就搵呂少啦，佢原來仲未食飯，
就飛的落銅鑼灣食好耐都未食過o既六壬茶餐廳，
入到去發現間野唔同左好多，裝修過，
無左以前果種有d老鼠響檯底閃過o既感覺，
依希記得以前呢間野仲有個特色鐵版星洲炒米，
仲有個有霸氣o既刀疤侍應，都唔見晒，
就叫左碟普通星米，都五十幾蚊好貴下！
由於之前食左個KFC 2號餐加雞粒，
所以其實唔算肚餓，個星米都食剩三份一，
終於學到Laurence果種食飯食唔晒o既格 XD
跟住呂少女友KK都黎埋，拎左部iphone5出黎，
呢部先達回收8千o既野都有幸渣上手，
真係比iphone4輕左好多！其餘無乜特別... XD