好耐無睇o既eva就快出Q所以衣家睇番，
好可惜PPS只係搵到序，破呀繞呀都無，
咁就睇住序先啦，一睇之下勾起左好多回憶，
記得以前睇eva時係讀緊中學，
當年eva文化係一種潮流，
呢套野創出好多好chok o既字眼，
例如：使徒來襲、AT力牆、人類補完計劃、
第二次衝擊、第三新東京市等等，
就算作文都不時引入呢D字眼(中二到爆 XD)
響學生手冊入面又有玩eva果種又橫倒又直倒、
忽大忽細o既粗宋體typography，仲有畫使徒，
當然教科書上唔少得Nerv同埋Sound Only標誌，
上堂時會擺出錠司令果個招牌動作，
殘酷天使同fly me to the moon係MD常播歌，
能夠造到咁深層次洗腦o既作品，
可謂前無古人暫時後無來者。
(可能中學時期先會比動畫影響得咁深遠)
講番套序，其實D劇情都知晒，只係溫溫書，
真嗣將零波麗推倒果幕居然有露點！
稍嫌劇場版太急，好似第4使徒襲完第5使徒就來，
對於未睇過eva(有咩？)o既人黎講會唔知想點，
整套序明日香亦無出過場。

查實段片本身唔好笑，講D野亦九唔答八，
但係兩樣mix埋一齊產生左化合作用，笑左！
畢比特蒼桑o既眼神希虛o既鬚根，
加上果把頹聲，好正經咁講膠野，
比起好多懶係好笑o既片好好多！
呢個惡搞畢比特仲有好多個版本，
我都唔知邊個創先，不過暫時呢個最好笑。

做乜_野，但係笑左！
其實原版更好笑，呢個只係司徒夾帶扮佢，
不過原版條link河蟹左......

今年想走型格路線，物色緊件西裝褸，
試過izzue果D款個型都係爭緊D，
Ape同QuickSilver就一定唔會有呢種款，
響5cm見到件西裝褸試上身好fit，
原價$999，做緊減價$700，想買！
其實唔係等果季完左先減咩？
衣家就快入冬D褸仲唔開天殺價？
所謂減價都唔係堅減掛？
不過5cm黎講褸賣$700又唔算貴喎~

食鐵版乜扒物扒一定簡大快活，
貪佢個酥皮湯，其實個湯先係主角 XD
佢個鐵版餐配菜好似每個禮拜都唔同，
今個禮拜跟粟米一條同埋牛仔腸，
個腸係白色睇落都唔似用牛肉整，
由於宗教關係我戒食牛，所以無食到。
不過唔食條腸都飽，份量fit晒，47蚊。