一年就有唔知幾多次呢類同人活動，唔同基構搞，
CW兩次、CWTHK、各大學祭，仲有主題Only，
搞咁多呢類活動唔驚飽和咩？真係唔驚，
今朝早10點去排隊，條龍長到可以包住半個九展，
到到兩點幾走果陣，條龍都仲係咁長，
所以點解呢D event長做長有，只會越做越多，
就係咁解，睇黎再開多幾個同人活動都仲有得賺，
只係一般老細基構唔睇好呢D宅界市場姐。
尋日就約左9點半會場見，結果遲到9點9先到德福，
就撞到小艾，原來根本個個都未到九展 XD
同小艾由德福步行至九展，傾下行下話咁快到。
買飛唔洗五分鐘，排隊就要一粒鐘，
飛有分普通($28)同VIP($75)，VIP可以唔洗排，
其實唔係想同班朋友一齊排下隊吹下水，
我肯定諗都唔諗就拍VIP，亦唔明點解有VIP，
都仲咁多人寧願排個幾鐘食西北風 @_@"
VIP其實唔係好貴姐(相比要排一粒鐘o既話)
本來大會安排響6樓排隊，上到去都見打晒蛇餅，
太多人大會都係趕番我地出場外飽受天寒地凍，
排下排下D朋友陸續join入黎(插隊 XD)，
首先有自製實體版UL o既chris，然後蔥西，
跟住仲有S梅倫同埋佢家大小姐join入，
今次係幫同事拎住15本禮猿小說本，
估唔到剩係我排緊隊o既已經有4個話有興趣。
原來唔只我帶PSV+3DS，chris都係 XD
可惜烈日當空兩部手提機廢左武功，只有睇書無事。
入到去會場即刻去同事檔放低D貨然後自由行，
行行下又撞到阿鳳個檔，賣特殊傳說本，
無記住魂魂個檔number，諗住入去行行下自然見到，
結果都係搵唔到佢個檔，無得拎艾喵聖誕卡 XD
有本血腥Alice本作畫超靚，全彩，好似D童畫書咁，
一幅插畫幾段字，諗住轉個頭番黎再買，
就賣晒啦，果然見到心頭好就要即刻扑鎚！
只係買左BRS初音本$110，都係全彩作畫都好靚。
然後再同小艾響3/F集合，果度算係cosplay集中區，
一堆cosplay響度hea同埋比龍友影相，
原來小艾同伯恩、里斯佢地坐埋一齊，
今次伯恩cos女體梅倫，佢個frd cos女體艾伯，堅靚！
跟住一齊玩潛烏龜，我居然手氣勁好贏左！ XD
五點鐘見同事出噗，佢D禮猿本完售，估唔到咁好賣。

送聖誕卡呢種習俗都係以前讀書時期先有，
好多年無做呢種行為，睇蔥西佢地又復古送番聖誕卡，
見過癮我又玩下，買幾張聖誕卡聽日送比佢地。
印像中普通聖誕卡都係幾蚊張之嘛，
哇，物價通脹到衣家要幾十蚊張！
見到H牌子果D聖誕卡，普通要四十幾蚊，
有音樂果D要過百蚊，痴線！鑲金咩？
不過一係唔送，要送就要送得特別D，
張卡點都要有D花臣，送張普通卡好似好cheap咁。
出銅鑼灣誠品，買左3張$55立體卡，
諗諗下送幾張比女上司同同事都好喎，
雖然有D遺和感，聖誕一年先一次，禮多人不怪嘛，
然後再去商務，衣家銅鑼灣又開多間商務分店，
果間先有多款式，價錢都合理好多，
立體透明膠或玩野款聖誕卡都係$28張，
買左3張，覺得呢D$28仲靚過$55果D，
起碼玩味夠強夠特別，一張拉開變左架船，
一張拉開變左間屋仔，所以話價錢同質素唔係正比，
然後諗諗下，不如送多張比老細啦，咦唔夠喎，
商務又收左工，只好再上SOGO旭屋睇下，
結果再買多兩張$45 o既立體卡，
老實講呢兩張立體得好普通，後悔響商務唔買多幾張。
前前後後買左8張聖誕卡($55x3)+($28x3)+($45x2)
咁就用左3舊幾水，衣家D物價真係癲左。

自從上星期病果排早訓教，一直到衣家都keep到早訓，
平均十二點前就入睡，中間雖然都會醒一兩次，
不過都順利訓到天光，遲訓都係三點就訓到，
可能天氣凍卷入被竇都好訓D，
D人話呢D鐘數訓教先可以吸收咩野黑色素，
亦都係生理狀態最適合休息o既時間，
keep到就好羅，不過我知道下星期女性雜誌埋版，
多數都要通宵，好不容易維持o既早訓又被迫摧毀。
鬼咩，本野八十幾頁，到目前只係做左12頁...
仲要夾住25號26號放聖誕假，本野情況絕不樂觀。
 

emolio、師圖夾帶、5公子、薑0樂、達哥等，
相信有蒲開youtube都唔會對佢地陌生。
除住網絡發達，造就左呢班紅人，
佢地唔洗報藝員訓練班，無參加咩星光大道，
亦唔係靠人事，更加唔係靠樣，
單憑拍一D無聊片得到廣傳，點擊率破萬。
呢D人唔一定要有福山潤果種靚聲，
但把聲一定要夠觀眾緣，emolio講野有底氣，
最欣賞佢D小學雞同埋九唔答八系列，
佢係擅長搵到D生活盲點黎吐糟，
你日日都對住D荒謬野但習以為常唔覺有問題，
例如D商場點解set到D樓層又LG又R1等。
夾帶有umove班底所以拍D片都超越左業餘水準，
5公子可能吸收左台灣魯蛋o既成功，
做左一系列打機實況，其實個人覺得佢未到魯蛋級數，
不過都算唔錯，講開又講達哥都係做打機實況，
佢手法更似魯蛋，聲線亦達到魯蛋o既霸氣，
可惜打機功力唔夠，經常卡關影響左暢快感，
5公子打機方面係做得好過達哥。
仲有個笠住鬆弛熊頭，講野好似星爺D電影咁一氣呵成，
用剪接將中間o既停頓位cut左，
一輪咀加入一D懶係深奧o既物理述語入去，
可能佢份稿度左兩日，用兩分鐘爆出黎，
亦係擅長捕捉生活盲點，做得幾好。
本來拍呢D片都係玩玩下up上黎大家一齊笑下，
不過有D已經發展到商業化，越拍越高成本，
加左唔少特技，搵埋model參與，變晒質，
呢D片仲有例如SONY或主題公園呢D基構贊助，
雖然專業左、華麗左，反而悶左。
一黎收左錢就唔可以亂講野亂吐糟，
二黎段片又要帶出宣傳o既訊息，針無兩頭利o既，
好難兼顧到又要賣廣告又要有營養。
emolio仲租埋studio，睇黎想全職靠拍片搵食，
不過我都係話佢最精彩都係果D低成本整o既片。
曾幾何時我都係想玩呢種拍片搞下爛gap o既方向，
仲早過umove年代已經有呢個方向，
果陣亦拍過小小片，整埋個短片網，自問懷才不遇，
不過概嘆欠左D天時地利人和，亦無乜資金，
孭住左D包伏，結果到今時今日只能做個觀眾仔。
PS：其實好多野好似唔難但都係想做未必做到，
好似玩cosplay咁，無D多餘錢，屋企衣櫃無乜位，
個樣唔掂，屋企人有微言之類，最多玩兩野就收皮。

經某編多次叫我買黎玩，而且呢隻Game風評唔錯，
咁就買番隻試下啦，又傳話一度賣斷市，
的確響觀塘問過幾間都話無，不過觀廣頂樓老闆娘有賣。
部3DS搵唔到火牛，條USB叉電線又借左比同事，
都要響觀廣一樓間藍店$38買，叉滿電先開波。
一開始創角創村名啦，創角無得揀樣，事後上網睇番，
先知原來係答問題o既選項會影響角色外表，頂，
仲有村個形狀都有得揀，又係唔知頭唔知路揀左第一個。
隻Game都幾多字，日文程度無番咁上下會一頭霧水，
跟住比村民屈做村長，搵事務所隻野講一大堆廢話，
然後去地產商搵撻地起屋，然後種棵村長樹，
跟住就萬無目的無所事事咁唔知點玩啦。
我估係要不斷賺錢然後買呢樣買果樣掛，
不過由於我通常都係放左工先得閒玩，
但遊戲又係實時進行，我放工D動物訓晒教，
乜野店都無開舖，即係要日頭玩先得啦？
除非又係調校部機o既時間...