我自己有用Monster Beats solo(無HD)，
上年10月響豐澤$1799入手，
哇原來唔覺唔覺都買左超過一年。
上星期響百老匯買紫色solo HD $1800送禮，
向來都知Monster Beats係山寨o既熱鬥對象，
(不過我從來無買過假Monster)
驚收禮果個以為我送個山寨版比佢咁cheap，
所以上網睇下正貨同山寨貨有乜分別，
好等如果佢問起上黎都可以證實番。
睇左好多網站同youtube o既真假對比，
發覺佢地果D話分真假o既特徵次次都唔同，
梗係啦，唔同山寨廠出o既質素都唔同啦。
有D就話b字個logo假貨係印上去真貨係刻上去，
有D就話假貨內側無左好多detail o既logo，
我又睇過有個假貨內側都有果D detail logo喎，
又話真貨隻紅色深色D假貨隻色淡D...
呢個算罷啦，認隻色真係唔拍埋一齊都認唔到。
所以結論係......無一個判定o既準則，
主要當然睇造工囉，真貨係工整好多，無乜霞痴，
例如關節位唔會條條fing，伸縮位好順暢唔卡住，
有次去女人街一拎起件假野，拉下個伸縮位即刻知分別，
真係爭好遠(雖然唔排除假貨有可能撞手神整到個順o既)
仲有真野包裝、說明書D印刷都精美D，個盒都紥實D，
可以肯定o既就係，百老匯豐澤呢D大鋪唔會賣假野！
同埋真貨包裝係有貼住原廠行貨貼紙，
有乜衣旭憑貼紙可以拎番代理維修。
以上分真假論係for果D想淘寶或網購水貨o既朋友參考，
不過D高仿品唔睇真D都未必分得出，
專登想平D買假野就話姐，最怕係比左接近正價買左假野，
奉勸各位水貨都係買唔過，出得起錢唔爭在比多小小，
去大鋪、連鎖店買貼住原廠行貨標籤果D包無死錯人。
當然亦有好多假野一眼就睇得出，
例如觀廣賣果隻假solo好似玩具咁，
上面個軟皮位都可以唔見左，好似賣$59。

正當唔少打工仔呢響屋企o既被竇，
我今日係要番工，本煩野聽日埋版，
今日都不敢怠慢做到零晨3點，
又call的番屋企，咁又無八十幾蚊。
不過公司仲有手機果邊o既編輯未走...

USB抄左幾版稿諗住拎番屋企排，
不過完全無mood做，
結果深夜先求其hea d圖落個版面，
其實都係聽日先番公司做...

早左番到公司，實行派聖誕卡比同事、老細，
雖然唐突，不過一年先一次，禮多人不怪，唔驚啦。
不過D聖誕卡跟o既信封居然係紅色好有問題，
買果陣都無諗咁多，送比人果陣佢地以為係紅色炸彈，
先知領野，但只有隨卡附送o既信封先fit到張卡size，
無理由買過D信封假。不過公司除左我都無人送聖誕卡，
呢間公司真係唔興聖誕搞下D動作咁，
以前亙動果陣都有搞交換禮物，其實好多公司都有搞。
有同事今日生日，聖誕+生日喎，緊要送份大禮比佢，
買左1800蚊o既monster beat solo HD紫色耳機比佢，
番工前響觀廣文具舖買禮物紙，番到公司包起，
不過估唔到送比佢居然到放工都未拆開。
 

呢幾日網絡都充斥住呢個topic，真係講黎都覺滲氣，
但咁大件事唔講下又真係唔得。
20號打開收音機聽gimme5，講末日只可帶1樣野你會帶乜？
打開Yahoo!，又睇到有關末日o既新聞，
例如有個港童避末日避到過台灣，真係戇居無極限，
如果香港有世界末日台灣就無o既，咩邏輯？
21號打開Google，個logo又用瑪雅雕塑砌出黎。
facebook、噗浪，又一堆「末日都要番工」「是芥末日」，
今期G-zone、GameWeelky又末日feel遊戲、末日前必玩遊戲，
今年12月真係末日氣氛完全蓋過晒聖誕，除左末日，
仲有好多說法，例如話會進入新紀元，
又話太陽風暴會無太陽3日又話大停電，
又話會有外星人降落，又話進入光子帶，又話南北極逆轉，
講真呢幾日我又無咩不安過，因為唔覺有咩野先兆，
無理由末日咁大件事世界無任何異樣之後突然1秒黎料掛？
如果有末日斷估早幾年已經好多事，唔洗等12月20先有野，
結果到今日當然係乜事都無發生，連少少異常都無發生。
anyway，全世界人可以放下心頭大石，開心過聖誕~
呢個世紀惡作劇究竟曾經令幾多人恐慌過，
曾經又有幾多人半信半疑過？
對上一次1999年，好似話中間2005年都有傳過一次，
但果次真係無乜風聲，過左都唔知有傳過，
係之後好似聽摩星嶺4號講番。