之前響Ice Fire買左頂類似RO學生帽o既帽，
幾個月黎都係主力配備，太好襯，
一直都想買多頂做後備，直到今日先買，
前日去灣仔分店店員話無，
好在朗豪坊間旗艦店仲有，買左頂藍色，
不過黑色全線無晒新貨，要訂陳列品...
話晒都出左一段時間o既舊款式，
可能已經停產，去晒D貨就唔再出，
衣家唔買可能無得再買，照殺啦！
搵過好多間有賣帽o既，都無咁靚o既款式，
就算Ice Fire其他款都唔靚，千金難買心頭好，
一口氣買左兩頂，每頂$290，咁就$580...

早幾日買左正版FLASH5，不過係二手，
今日買埋正版FLASH MX，係全新未拆包裝，
買左350蚊，不過個盒都殘到甩色。
呢個係2004年出品，距今都有9年歷史，
盒上面印住支援Window XP同埋Mac OSX，
裝邊個平台都得認真貼心，值得一讚！
盒上仲寫住此產品要網上認證先可啟用，
問題係....佢間公司都收左皮...點認證？玩野呀？
不過我並唔打算拆黎用，純粹收藏紀念，
個人認為都係FLASH4/5最好用~

響公司pantry個全盒粒左D瑞士糖黎食，
拆開包裝，咦？點解得一層紙包住o既？
以前食果D係裡面仲有張白色類似牛油紙o既野，
卷住粒糖架喎，心諗可能家陣D瑞士糖改左包裝，
(Kinder繽紛樂都由以前有絲帶撕開衣家都skip左啦)
唔出奇丫，少張紙又慳D成本，其實都無壞o既，
果層白色紙經常痴實粒糖，要用指甲撬開張野，
衣家呢隻一拆就食得仲方便左添，味道亦無乜分別。
最近又食響呂少果邊拎番黎o既瑞士糖，
一搣開，咦？仲有果浸白色紙o既？
咁即係之前食果D係山寨版啦？唔係呀fa？
瑞士糖都要老翻咁無出色？翻都翻D貴野啦~
以前都聽過黃色包裝果隻蜜蜂糖有翻版，
而且翻版比原裝更好味，以前小學小食部有賣，
都係兩毫子粒，唔知以前食果隻係唔係老翻啦，
比佢賣一千粒唔計成本只賺兩舊水，咁都好翻？
仲有藍威寶o既翻版藍鳥，又係比正版效力更強。
山寨真係乜都有~ :o)
 

一隻應該出左超過10年o既軟件，
發明呢個軟件間公司macromedia都收左皮，
衣家o既FLASH係Adobe出品。
以前有一段時期自學鑽研FLASH，
可以用佢製作Animation、Game，勁好用，
由FLASH4開始上手，唔多like 5打後D ver，
嫌界面操作變左好多，又係無得向下兼容，
一直好想有一隻FLASH4或5正版放屋企，
純純出於一份情義結，
今日響一間唔多起眼o既軟件鋪見到，
雖然係二手，相信今時今日都幾難搵全新版。
安裝響Win7無問題，暫時都正常運作到~

睇完新宿事件，窗外傳黎一聲巨響，
本來都不以為然，仲諗住係咪電視聲聽錯之類，
點知之後接二連三再發生巨響，
然後屋企都傳來火藥味，從窗外睇見到濃煙，
然後有消防車聲，諗緊係咪附近D大廈火燭，
但就算火燭都會有火警鐘聲架，
附近D大廈響火警鐘無理由我地呢度聽唔到，
連隔離鄰舍都走出黎同我媽議論紛紛，
都唔知發生咩樹，之後出面無乜煙，
就當無事發生照常訓教。