埋左本日韓朝流雜誌，響農歷新年前都無野埋，
今日番到公司就做自己野，冗左一日~ XD
都係執番自己之前做o既公司廣告，
server del左原本o既入稿檔，搞到d link斷晒，
重新連結過佢，再封裝保存。

所謂職場上無真朋友，我好努力維繫同同事之間和諧，
不過一件無心插柳o既事或多或少又會得失同事，
無論幾咁小心，總係有D位唔為意...事後先覺唔對路！
可能做十件好事都彌補唔到一件衰事(拍打地下
唔通千年功力一朝喪？希望只係我諗多左啦，
或者果位記者說話上無提及到某D關鍵字呢~
所以話當大家唔再係同事就唔再咁易有利益衝突，
之後先可以交心...

寫完個宵夜，寫埋個晚飯~
個鹽燒雞食落同佢3號餐隻燒雞無乜分別，
鹽燒？唔係好覺，D芝麻亦只係裝飾品，
食落又係唔覺，另外跟個日式咖喱飯，
D飯亦唔係珍珠米(可能只係APM分店偷工)
都係傳統o既1號餐同2號餐好食D~講完~

搬公司前買落o既杯飯等到衣家先至試食，
今晚又係埋版通宵夜，杯飯就係今晚宵夜，
打開後見到幾包料，拎晒幾包料出黎後，
個盒只係個乾淨o既盛載容器，
並唔係好似杯麵咁一早就放好晒響個盒入面，
而幾包料放埋一齊都只係佔個盒一半高度...
睇落幾唔化算，亦無附送膠匙之類餐具，
拆開最大包料，係一包生米，根本即係煮飯咁煮，
倒左D米落個盒得3份1高度左右，
再倒埋其他料，然後倒水果陣條滿線都遮住左，
呢次應該係倒多左水...跟住微波爐丁熟後，
總容量係唔到個盒o既一半(已經倒多左水呀下)
飯係珍珠米，咖喱味濃郁，整體麻麻地啦，
D肉就好似杯麵果D咁o既質感，
35蚊黎講係唔抵食(份量都唔合格)
純粹個牌子夠過癮，包裝都幾美觀，
算啦日清都係去做番麵啦。

圖為cup noodle味杯飯發相(我試果隻係咖喱味

較早前訂左UL兩週年周邊紀念品，
見K島都有唔少開箱文，但我遲遲未收到領取通知，
send email去問都無回音，於是都係打電話問，
我係訂購A套組+B套組，店員話由於B組未到貨，
要等齊A+B到齊先會通知我去拎貨，
哇~咁咪等到頸都長？同埋唔公平喎，
只買A套組o既就已經拎得，買兩個反而無得拎...
打去追問之下先知可以拎左A套組先。
於是放工就答地鐵落油麻地拎貨，
圖片唔貼啦，要睇網上都有唔少開箱文有圖，
講下D角色卡，質地同bee牌/單車牌接近，
可以fan到牌同埋做到滑出黎o既colour change，
証明牌質夠爽先做到，真係要讚下！
不過場地紙同說明書係收響最入面，
要暴力掘開張long卡o既紙座先可以拎到...
全角色L1不過有三招，仲未研究點玩，
不過肯定D骰一定唔夠用，得果幾粒...
其實要實體對戰都好混亂，純粹係收藏價值。
角色卡係重新畫過，所以線條好sharp，
如果原用番game果張圖印到啤牌size一定勁蒙。
而個紙袋店梅張圖好明顯格硬拉大，
所以都係蒙左少少近睇不宜(職業病發作...)
紙娃娃同摺骰果張紙無壓摺痕同埋cut位，
只係好hea咁將D圖案印響塊比較硬靜o既卡紙上，
要自己用cutter界出黎，不過我唔捨得界，
公器私用公司部printer彩印幾張A4紙先黎摺骰，
黑骰個接口位係白色，接得唔靚就會露白邊好核突，
設計呢張野條友唔夠細心，白骰就無呢個問題。
本設定集仲係包住左未拆所以無得講~
 

適逢今日天氣和暖，過年前當然去剪個髮~
今次都係剪番之前普通款，無剷青無盛。
明知去洗剪當然剪髮前唔會洗頭啦，
唔通洗完又洗咩？通常剪完髮番屋企會再洗頭，
咁就一日洗幾次頭架啦~