SONY同Microsoft都紛紛放風話幾時公佈下世代機，
老實講，衣家o既PS3應該仲可以再戰3年以上，
好多FPS D畫面已經靚到幾可亂真，仲可以點靚上去？
機能再強，都好睇遊戲開發商功力，
好似果D咩三國無雙、GVG咁，D畫面咪又係又膠又假，
佢咁o既功力就算比佢出響PS4度唔見得會靚過PS3囉...
最近上youtube睇開D開發引擎o既示範片，
unreal、cry engine4 D片已經做到同真無分別，
即係你話段片係渣住個cam拍片都可能信咁樣，
下世代機唔該同我掌握好呢種技術先好出街，
唔係o既話我唔覺得佢有推出下世代機o既必要。
 

部macbook pro retina無DVD機，要用就要外置DVD機，
而我本身有部Buffalo外置DVD機，幾年前買落，
呢排拎番佢出黎用就發覺load乜都唔多掂，
想話裝Diablo3入隻碟又無反應，仲旨意佢裝windows假，
已插兩條USB去供電，咁都仲係唔夠力即係部野唔得啦。
部野買番黎應該用唔過3次，咁就打柴認真濕滯。
今個月o既開支已經超出左底線九條街啦！
DVD機又作多筆，無計...要用就要睇住D錢不翼而飛...

對上果次係三重芝士系列，
再對上就係三文魚芝士系列，
今次加粟米汁就黃金芝士系列，
老實講粟米汁同芝士唔係咁夾，
一個甜甜地一個咸o既，
不過又未至於有違和感，
但有得揀我寧願佢走粟米汁。
整體黎講都very good，
都係果句，芝士+煎雞無得輸！
好食過佢原配果D燒汁多多聲！
早排推出過一兩個奇怪系列，
令我都無乜幫襯吉野家好一兩個月，
衣家出番芝士就必定多多支持，
希望佢快D將芝士變做長期供應啦~

聽新聞話今日地鐵唔經油唐(好在出門前有開收音機)
哇乜咁大獲呀？只好答606番工，12點個巴士站都排長龍，
罕有地雙層606都可以坐爆，連上層都要有人企，
慶幸我上車個站早有位坐，去到北角好似唔再載客添...
坐得巴士當然一邊聽歌一邊睇風景啦，
窗口滲入暖意o既陽光，再加上振奮心靈o既歌，
即刻個人充滿正能量！好耐都無試過咁正能量番工啦 XD
 

上次病左因為凍親，今次唔知因乜事發病，
係窩入被竇入面開住暖爐都覺得凍，
仲有咳啦、頭暈頭痛發燒啦，通常一病就幾樣一齊黎。
尋日番左半日工早退，今日都請多日假，
7點幾去睇醫生，醫生好hea咁求其睇就開藥，
D藥一定唔會寫清楚係乜黎，或者只有佢地睇得明掛，
咁做應該係為左唔想幾個人同一個病，
睇一次醫生share番D藥咁佢就賺少好多。
我媽都有咳，不過幾包藥都唔知邊包先係止咳。
公司有保柏醫療津貼，不過出示果張保柏卡佢話用唔到，
咁就睇左240蚊，唔知拎張收據係咪可以cam番。