正值奧運熱播進行中，又令人進一步思念日本，同一個問題究竟幾時先可以去東京LOOP完又LOOP，掛住當地嘅居酒屋氣氛同食物，今晚一於上黎呢度扮住去咗日本先
場內佈置真係幾似去咗日本嘅居酒屋，一入門口侍應打咗幾下鼓聲歡迎，頭頂掛滿各式日式燈籠布幡
睇下佢個酒櫃，唔少種類嘅日本酒都有供應，客人可以慢慢睇慢慢選擇，揸唔定主意嘅仲有俐酒師比D主意你，最吸睛莫過於"全場清酒果酒照價半價"呢個貼紙
我呢就被呢個Corner吸引住眼球
夏天係梅酒季節，自家製梅酒共有5款，材料源自日本，點可以唔叫返杯?!
呢杯白桃梅酒 ($78)，選用山梨県白鳯桃，南高梅 (完熟)，配上純米吟釀，飲落有滿滿香甜白桃味，搶咗少少梅嘅風頭，酒香味飲落順口，加埋冰凍飲就更正斗啦!
呢杯檸檬Highball ($58)，成串冰震檸檬帶點霸氣，加入清新嘅梳打水，比起就咁單飲威士忌少一點壓力，成件事突然變得後生咗，去居酒屋就係要放輕鬆嘅感覺!
最先出場嘅係日式炸鷄 ($48)，配以芥末沙律醬
即叫即炸，每件係一口份量，鷄肉仍然保持少許肉汁，唔會炸至變肉乾，用黎送酒無叫錯!
天婦羅選擇種類多，比較鍾情蝦天婦羅 ($78)，4隻大蝦加一片南瓜
天婦羅炸漿鬆脆薄身，唔會成口粉都未食到主角真身，入口唔油膩，點埋個汁食就仲好味D!
居酒屋必食串燒，我地都花咗少少時間去諗下食邊串好，小試燒和牛舌($38)同燒鷄皮($22)
自從係日本食過燒鷄皮，從此愛上但唔係間間都有得食，呢間燒得真係脆卜卜，食到鷄皮味道，唔錯!
而串牛舌就有相當厚度，口感軟身得黎帶點嚼口，帶有黑椒鹽嘅味道，仍有肉汁係口腔流出!
一客三隻嘅炸芝麻鷄翼，有埋尖位，炸至啡黃色再灑上芝麻，香上加香
入口相當熱辣，炸得皮香肉嫩，食得快果個可以獎食多一隻
食完前輪Happy Hour，都要食返D主食
日本黑毛和牛鍋燒烏冬 ($88)，份量一人前，有牛肉，昆布大蔥及溫泉蛋
湯低清甜，牛肉薄切再用熱湯浸熟D，入口軟棉; 烏冬質感係滑口，若果係我歡喜嘅彈牙口感就仲正!
丼類係手機搵唔到，可以搵侍應代為落單，友人選擇海膽三文魚爆丼 ($171)
叫得做爆丼，當然要食材舖滿飯面啦，呢個重任就由三文魚負責，海膽份量應該有1/5板，飯份量都唔少，食晒成碗超飽!
淋上醬汁混入芥末於飯粒中，海膽就先單食試味道，鮮甜味係有嘅，顏色都吸引人，留返D一齊撈飯食!
有少量甜品供應，但今次無預留位置比佢，暢飲豪食超爽皮!
contact me : [email protected]
|
