| «‹ September 2026 ›» | | S | M | T | W | T | F | S | | | 1 | 2 | 3 | 4 | 5 | | 6 | 7 | 8 | 9 | 10 | 11 | 12 | | 13 | 14 | 15 | 16 | 17 | 18 | 19 | | 20 | 21 | 22 | 23 | 24 | 25 | 26 | | 27 | 28 | 29 | 30 | |
|
| 抵食又好味@INDIA CURRY KING |
分類: 飲飲食食 |
九龍城真係美食天堂, 有選擇困難症既人係呢度開餐會病情加多2錢重, 今晚同友人又再戰於此, 選擇食印度菜, 果真好出奇呀!!
等位期間見到好多印度人都幫襯, 心諗應該唔會差得去邊, 好....................一於照等(最後等位足足等左成粒鐘)
見到佢有套餐, 岩岩好六人, 就叫呢個啦 ($599)
先上左個胡椒脆餅, 配上三款醬汁(綠色: 薄荷; 紅色: 酸辣; 另外一款係酸洋蔥), 夠晒香脆, 個人黎講覺得個紅色汁好味道
燒烤精選 - 熱辣辣鐵板上枱, 食物包括魚, 鷄, 羊肉, 肉質都幾好, 唔會太乾; 個配襯洋蔥好甜, 友人連一片都唔放過, 通通清晒
呢款係雜菜咖喱角, 外型隻隻飽滿, 唔油膩, 切開見到入邊係有薯蓉加埋雜菜一齊整, 入口時小心燙口呀, 唔辣又好味!
鮮蝦咖哩, 咖哩羊肉, 瑪莎拉燴鷄一次過上枱, 配埋印度烤餅(蒜蓉牛油味)
辣度同濃味黎講, 以羊肉為第一, 鮮蝦咖喱入面隻蝦都幾彈牙, 咖喱汁唔辣但好香, 而個瑪莎拉燴鷄個鷄件一啖一件, 個汁伴烤餅又係一絶, 三款汁都比我地全數點乾淨
呢款印度香飯, 係旅遊節目就見得多, 食就第一次食, 飯粒比較長身, 煮得好乾身(可能要來咖喱汁關係), 口感好岩我胃口; 至於點炒青菜, 係蒜蓉炒通菜, 炒得好香, 而且食得出通菜既嫩, 無渣既, 坦白講, 炒得好食過好多菜館, 真係估佢唔到!!
埋單時, 侍應送上糖粒及香料, 糖粒普通甜味, 試左少少香料, 似食緊八角一樣既味道, 都幾得意
總括黎講, 呢餐印度菜好滿意, 六人餐份量都幾足, 叫埋飲品, 每人都係百幾蚊, 回頭率好高呀!!
地址 : 九龍城城南道24號
contact me : [email protected]
|
| 抵食好味之選@糖佰府 |
分類: 飲飲食食 |
食完泰菜, 係九龍城呢頭開左咁多甜品舖, 無理由唔食埋先走架, 行多條街就見到呢個"易拉架", 比D相吸引, 就呢間啦
係屋企唔可以有榴槤出現, 出到街仲唔食返碗榴槤忘返, 可選配西米/黑糯米/豆腐花 ($38)
見有豆腐花咁得意就選佢, 呢碗材料有榴槤肉, 榴槤漿, 小丸子, 水晶珠及椰果, 榴槤味道幾香但又唔會太濃, 所有材料撈埋一齊食, 有小丸子及椰果既咬口感, 又有豆腐菜既香滑, 口感好有層次
呢款賣相咁靚既係佢既招牌推介甜品 - 法式玉桂蘋果批加自選一球雪糕 ($35)
製作需時, 批焗得好香脆, 又夠熱, 配以雲呢拿雪糕一齊食, 一凍一熱, 好過癮, 而蘋果片食落夠爽口, 味道帶點酸甜, 整體黎講係好味既!
亦都食埋佢既招牌拿破崙, 可選芒果, 香蕉及雜苺 ($34)
我地要左香蕉, 拿破崙餅底好香, 配以自家製既吉士醬(少甜及少牛油), 加埋香蕉一啖放落口, 滿足感爆燈...........................
甜品款類選擇多, 價錢亦唔貴, 叫多幾款無論肚皮及銀包都話: 我願意
地址 : 九龍城龍崗道6號地舖
contact me : [email protected]
|
2016 年 5 月 11 日 星期三  |
| 食好泰@泰風情 |
分類: 飲飲食食 |
又去九龍城搵食泰菜, 今次食呢間位置係食泰菜既主場地街道, 一D都唔難搵
早到關係, 唔係太多客, 環境都算幾舒適, 電視播著泰國節目, 哈..............一句都聽唔明, 可以專心食野! 我地選坐卡位, 展開我地既泰菜之旅
天氣有D悶熱, 試過泰式木瓜絲沙律($48) 開下胃先 - 份量都幾多, 配送生菜一藍, 材料都幾多, 當然有青木瓜絲, 蕃茄, 伴以花生碎, 味道酸辣好開胃, 怕辣既可以伴以生菜包住一齊食, 就可減辣!
店員推介我地試呢款泰國黑毛豬串燒($88/半打)
燒得好香, 好香豬肉味而且肉質比較嫩滑, 點埋佢既醬汁一齊食, 半打好快就被KO了
呢款係招牌海南鷄 ($88/半隻) - 上枱前再以熱湯淋上以加熱, 食落幾香鷄味, 而且肉質都幾嫩滑, 果然係招牌菜呀
加多個咖喱炒大蜆($168) - 大蜆"浸泡"係香滑惹味既咖喱汁內, 蜆肉唔算大隻但食唔到有沙, 個汁配以白飯/法飽就絶配啦!
每次食泰菜都會叫馬拉盞炒椰菜苗($65), 可能自己唔會買椰菜苗卦炒卦(哈..), 呢碟份量正常, 味道唔會過咸, 椰菜苗若然炒得"淋"少少會仲好D
埋單時仲會送上甜品一客, 有我最愛既大菜糕(我估係卦, 味道好相似!)
地址 : 九龍城衙前圍道62號地舖
contact me : [email protected]
|
| 食完會笑住離開既甜品店@JOYFUL |
分類: 飲飲食食 |
知道旺角呢一頭開左好多甜品店, 今次試呢間仲打住有米之蓮推介既光環, 又點可以唔試下呢?!
店內面積唔算好大, 但環境比人舒服感覺, 係呢度同朋友食下甜品吹下水都幾唔錯
打開餐牌, 食物選擇都唔算, 亦有提供飲品, 我既選擇困難症又好似出現左啦
最後同朋友幾經商議, 終於選出以下"佳麗"
1號 : 芒果拿破崙($59) - 芒果夠香甜, 而個拿破崙用刀一切開時已經聽到"CHAK"一聲, 未食已知應該唔會差得去邊, 食落口果然好香脆, 配以特濃芒果味既雪糕, 滿品充滿芒果味
2號: 英式面包布甸 ($49) - 好耐無食過呢個甜品, 見到餐牌有仲唔叫返個?! 哈.........上枱時仲保持到熱度, 食落好香面包味, 底層有唔少提子乾一齊焗, 最好既就係唔太甜, 食完唔會覺好"漏"
3號 : 比利時朱古力慕絲伴雪糕 ($56) - 賣相相當靚仔, 友人係朱古力控, 對呢個甜品讚不絕口, 個慕絲好幼滑, 而且底部仲有少少脆口感, 朱古力雪糕球又好香滑, 食完呢個會變成一個"朱古力獎門人"咁呀!
4號: 宇治金時芭菲($56) - 上枱時友人呈現O咀一個, 份量相當唔野少, 成杯芭菲包括有紅豆, 綠茶啫喱, 綠茶雪糕, 紅綠白咁一層層咁間住, 味道香甜又有咬口, 點捨得唔食晒佢呢?!
款款甜品賣相精緻, 真係既睇得又食得, 米芝蓮推介果然亦有D料到
地址 : 旺角黑布街74號藝興大廈地下2及3號舖
contact me : [email protected]
|
| 滿足的一餐@The Grill Room |
分類: 飲飲食食 |
放工後約左友人於銅鑼灣"血拼", 血拼後要搵個地方食飯, 心血來潮好想食扒仔, 友人就帶左我去呢間開餐
電梯按5字, 門一打開就見到餐廳真身, 面積唔算大, 一眼望晒, 但裝飾加上昏暗燈光都幾令人有放鬆感覺
打開餐牌, 有前菜, 主菜, 小食及各類飲品, 當然包括酒精類飲品, 呢度5-8仲係HAPPY HOUR, 飲品買一送一
肚餓指數爆燈, 先點左菜先, 見呢度既SET DINNER都幾抵食, 包括前菜三選一, 主菜六選一, 及甜品二選一
前菜要左西蘭花忌廉湯, 所有材料打爛晒煮成香滑濃湯, 配一口小多士作為呢餐既序幕
另一款係三文魚他他配香乳酪汁 - 食到香滑三文魚粒, 份量岩岩好, 食完有陣清新感覺
講明想食扒仔, 當然睇中佢既炭燒美國安格斯肉眼配薯泥雜菌($388)
肉眼扒有成16安士, 非常夠晒份量, 要左七成熟, 用刀一切開見到中間仲保持到粉紅色就知控制生熟程度到家! 肉質嫩滑多汁, 好濃香牛肉味, 愛牛人士必定歡喜! 仲有佢個薯泥, 香滑都無朋友, 就算兩者一齊食都唔會有太膩既感覺!
友人點了葡式香辣燒鷄配薯條椰菜沙律 ($278)
細食既友人望見第一個反應係..............................."咁大份既?!"
包括黑松露薯條(炸得好香口, 熱辣辣架!), 椰菜沙律味道就普通左D, 作為減下肉膩感都OK! 至於個主角燒鷄, 肉質燒完仲保持肉汁, 唔會燒到嚡口, 配埋底下既葡式醬汁, 味道有少少辣, 絶對接受得到, 好得喎!
唔好記得仲有埋甜品架, 我地一致睇中呢款意式奶凍配濃朱古力湯
香滑奶凍, 面層黑色一粒粒既我估係雲呢拿籽, 一口奶凍配埋朱古力湯再加少少杏仁脆片, 口感味道有多層次變化, 我地一致讚好, 估唔到SET DINNER既甜品有咁好水準
食好飽, 再慢慢品嚐呢一次贈飲, 真係無野好講........................只好同友人講一聲: CHEERS!!
埋單每人三百幾就可以享受一餐咁好味既西餐, 回頭率有幾高?! 仲駛講既!
地址: 銅鑼灣駱克道459-461號The L.Square 5樓
contact me : [email protected]
|
« | 52 | 53 | 54 | 55 | 56 | 57 | 58 | 59 | 60 | 61 | ... | 147 | »
|
