| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2016 年 4 月 22 日 星期五  |
| 強化肌底DNA@ASANA一秒神水 |
分類: 美容 |
現今女士, 日頭忙於工作, 壓力大, 長時間受到電腦MON既紫外線侵害, 加上化妝關係; 返到家中, 食完晚飯沖完涼, 又會上網/煲劇, 搞到好夜先上床休息
以上係咪你既寫照呢? 我就一定係!! 照鏡時, 發現皮膚出垷暗啞, 幼紋, 色斑及鬆弛, 要改善根本問題, 除左改善生活習慣外, 亦要注意肌底護理, 使用肌底精華, 強化肌底DNA方為上策!
呢支就係ASANA最新出的一秒神水 ($333/150ml)
佢係一支肌底精華, 能有效1秒滲透，強化肌底DNA及保濕系統、59秒令肌膚回復濕潤; 更可打開肌膚滲透管道，放大吸收能力，令後續產品迅速滲入肌膚底層、加倍發揮功效
6種天然酵素的成份:
玄米乳酸菌發酵精華、清酒酵母發酵精華、大豆乳酸菌發酵精華、豆奶乳酸菌發酵精華、槲寄生酵母發酵精華及白茅根酵母發酵精華
韓國研製 - 無酒精• 無香料• 全天然• 敏感皮膚都啱用
樽身刻有份量度, 建議用1/2刻度份量浸濕化妝棉
使用方法有3個:
1) 日常用(肌膚回復年輕活力)
早晚潔面後即用, 將"一秒神水"浸濕化妝棉, 用化妝棉內面輕拍面頰, 再反轉用外面輕拍前額以增加吸收
2) 敷面用(深層補濕緊緻)
將面膜紙放於清潔容器中, 倒入"一秒神水", 待面膜紙被精華充份浸透後, 再慢慢展開, 輕柔地敷於面上約15-20分鐘
3) 急救用(告別乾燥肌膚)
洗臉後, 將"一秒神水"浸透化妝棉, 直接敷於兩頰, 脫皮及暗啞部位約10分鐘, 為肌膚快速補充水份
早晚使用, 都幾快被皮膚所吸收, 之後感覺皮膚好似飲飽水咁, 就算未能即時搽後續既護膚品都唔會覺繃緊; 連續使用, 膚色退暗啞, 毛孔望落細緻
效果令我滿意, 加上價錢親民, 一支都可用上一段日子, 識得用當然要轉用呢支"一秒神水"啦
想再了解多D? 即上 : http://no1.asana.com.hk/
萬寧有售
試用產品及產品說明由ASANA 提供
contact me : [email protected]
|
| 2016 年 4 月 19 日 星期二 |
| 抵食又ok@富田和食亭 |
分類: 飲飲食食 |
提起日本放題, 好多時都會去旺角/尖沙咀附近, 出開藍田探完朋友, 開餐時間發現呢個商場有呢間日式放題, "餓底"上身之際咁就試下呢間!
好彩早D去到, 一入去已經見到坐滿八成, 枱面上放置左一系列既點餐紙, 見佢種類都算幾多
放題包任飲罐裝飲品, 望下仲會發現有甜品專區, 鍾意飲咩食咩甜品就隨便自己攞
起動吧.............食日式放題, 點可以無刺身呀?
上枱賣相都算吸引, 點了幾款包括三文魚(味道幾鮮味), 甜蝦(頗大隻, 鮮甜感OK), 貝柱粒及魷魚都有口感, 唔會食到好大陣雪味
壽司大細適中, 唔會用太大舊飯"質飽"你, 呢款馬都貝壽司食落爽口, 推介呀
沙律小食方面都叫左幾款, 蟹子沙律好味; 枝豆食到豆甜味
天婦羅都以蔬果為主, 有南瓜(唔太甜), 蕃薯(香甜), 炸蝦(蝦肉唔係"梅"), 若然可以配埋專用醬汁一齊食會仲好味D
串燒我地叫左鷄軟骨(有咬口); 秋刀魚好大條, 燒到幾香口, 肉都嫩; 紫蕃薯仔都幾香甜, 一啖一舊岩岩好, 全部都熱辣辣上枱都幾唔錯
個人好推介個燒菠蘿, 甜度有仲要燒到一咬就有汁標出黎, 估佢唔到咁好味道
每人埋單都係一百八十幾蚊, 有飲有食, 包你食到肚腩都走埋出來, 難怪咁受人客歡迎
地址 : 藍田啟田商場2樓207號舖
contact me : [email protected]
|
| 2016 年 4 月 13 日 星期三 |
| 韓食新HEA點@小火焰韓式咖啡餐廳 |
分類: 飲飲食食 |
假期中相約友人食野傾計, 近近地就選擇觀塘區呢間新開既韓式咖啡店, 裝飾新穎充滿時代感, 開陽式設計比人一種輕鬆感覺
店內不時播放著K-POP MUSIC SHOW, 一邊食一邊欣賞MUSIC SHOW, 催眠自己身處韓國咖啡小店....哈!
餐牌食物選擇都算唔少, 有韓式湯面, 芝士鍋飯, 炸鷄, 韓式豬手, 沙律, 飲品及甜品都有, 望清楚早市特設港式早餐, 可能照顧埋附近返工既人士
好啦.....肚餓啦, 叫左以下食物, 先黎個沙律開下胃, 呢個係鮮果明蝦沙律($78)
份量都唔少, 色彩繽紛, 令人望見都胃口大增, STRAWBERRY 味道香甜, 而隻鮮蝦係就咁白烚, 食落似係有煎煮過, 食落幾彈牙!
跟住點左呢個韓醬肋燴牛肋刀切面($68)
個醬一D都唔辣, 怕辣既友人都可以食到, 牛肋肉唔軔, 唯刀切面個人覺得腍左D, 份量足夠二人分享
重頭菜黎啦........................溶岩芝士炸鷄面包 ($108)
一客份量有7-8舊炸鷄, 皮香肉嫩, 侍應教我地先點面包內既溶岩芝士, 然後再點一些碟邊既千島醬一齊食....................WOW.....真係好正, 一啖有齊芝士既香滑同酸甜既千島醬味道, 食到停唔到口, 身為芝士控既我又點可以停口呢!
食晒炸鷄後, 我地當然連呢個焗到咁香口既面包都唔會放過啦, 用刀切開再點埋芝士及千島醬食............似食吐司一樣, 就算肚皮已經增多吋都唔捨得唔食
食到呢到我地開始後悔, 食到好飽, 想食個韓式甜品都食唔落啦, 唯有安慰自己下次一定會返黎再食既....................你等我呀...............................
地址 : 觀塘觀塘道410號觀點中心1樓1號舖
contact me : [email protected]
|
| 有水準@ocio |
分類: 飲飲食食 |
經過槍街, 發現呢頭附近出現左好多唔同類型既食店, 尤其係開左好多甜品舖, 於是就係呢度開餐, 咁之後就可以試埋其他甜品舖
呢間裝修咁精緻既西餐廳, 面積雖然唔大, 但比人舒適既感覺
打開餐牌, 見佢有晚餐, 包餐湯/沙律, 主菜任選一款, 甜品及餐飲, 價錢OK, 主菜食物選擇都幾多, 咁就一於食晚餐
是日餐湯係磨菇湯/蕃茄湯(配小面包一片), 咁就一於每人點一款, 磨菇湯夠晒菇味, 而蕃茄湯就似蕃茄濃湯, 兩款湯仲要夠熱, LIKE!
主菜就選香煎帶子伴蟹肉意大利飯 ($159)
賣相吸引, 份量亦唔少, 帶子粒配以鮮甜蟹肉, 配料仲包括甜椒及菌類, 飯粒吸收晒D汁, 口感適中, 唔會太硬/腍, 好味道!
呢款係熔岩芝士豬肋骨意大利飯 ($189)
以鐵鍋上枱, 熱辣辣既芝士汁係鍋邊係咁繼續煮, 香味已經令人流口水, 睇住D芝士係咁熔化, 令我已經開始失控
呢份牛肋骨都有成8條骨, 用熔左既芝士包住一齊食, 哇............不得了啦, 食完肋骨, 再食埋底下既意大利飯, 撈埋D芝士汁一齊, 真係好邪惡呀!
餐包埋精選甜品(奶凍)或自選口味雪糕球一客, 食完呢餐好滿足呢
食物水準唔錯, 服務OK, 埋單兩位三百幾蚊, 都算幾抵食
ＯＣＩＯ地址 ：旺角煙廠街33號朗廷軒地下B舖
contact me : [email protected]
|
| 2016 年 4 月 11 日 星期一 |
| 大杯酒, 大塊肉@KING LUDWIG |
分類: 飲飲食食 |
每次想食德國菜, 就一定第一時間諗起呢間, 突然心血來潮想食, 無訂位情況下雖唯有早D去食, 大約五點幾已經入座, 仲可以有HAPPY HOUR
HAPPY HOUR又點少得黎杯冰凍BEER呢..............CHEERS~~
有酒又點少得馳名燒豬手, 燒得皮香肉嫩, 每次黎到都必定要叫, 侍應幫我地分埋, 一聽到落刀切開果下"喳喳聲", 連隨肉香就會一齊聞到, 口水都流晒
一客份量都唔少, 足夠我地四人分享! 覺得"漏"?!, 可以食下佢伴碟既酸椰菜, 別有一番風味!
德國菜當中當然唔少得香腸啦, 咸香肉腸配酒就真係一流, 幾款香腸每款都有唔同性格, 有D皮脆, 有D就腍滑, 都幾得意
配埋薯仔塊食, 都幾滿足!
友人想食薯餅, 於是又點埋呢款鴨肶配薯餅
薯餅煎到好香口, 啖啖都充滿薯味, 而隻鴨肶充滿鴨香味, 配少少蘋果茸一齊食, 友人食過讚不絕口
大杯酒, 大塊肉, 豪情暢飲, 果然夠爽! 侍應服務令人滿意, 係我地食德國菜中既首選餐廳
地址 : 尖沙咀港鐵尖東站32號舖
contact me : [email protected]
|
« | 54 | 55 | 56 | 57 | 58 | 59 | 60 | 61 | 62 | 63 | ... | 147 | »
|
