今日同鍾斯北上按摩, 收工後約左佢先去旺角食海南雞飯, 好味

以往因為我唔鍾意火車多數無得坐既關係, 北上多數都係搭旅遊巴由皇崗過關, 但自從識搭深圳地鐵後, 發覺真係好方便, 於是就決定今次係羅湖過啦。

等車既時候, 我開始唔想企到去羅湖, 於是諗不如坐頭等啦, 鍾斯當然係話等有車睇下點先啦...

有車, 超多人, 鍾斯無我符o甘話:坐頭等啦....

得左!!開心

上左車, 好眼訓, 未到大圍我已經訓著左 。

到步後, 我地先到吉之島買上次見到少有地平過hk既lego車車, 跟住發現左隻桑果汁, d味似我以前同迪好鍾意飲o個隻, 點都要買返兩盒先

跟住去書城, 買左幾本書後, 再去"頂"太豐食飯, 都係台灣o個間好味d。

食飽飽後就去按摩, 今次個女仔好大力, 按到我個博位有d痛呀

話左要收手之後, 諗起自己今個夏天無買過袋, 於是又好想買一個好夏天既袋

同多多msn, 佢今日偷懶無返到工, 講講下佢又好想買袋, 兩隻野越講越想即刻去買, 於是....11點3決定請半日假, 12點收工一齊出tst 搵小冰lunch後去睇袋

lunch之後要去長沙灣幫朋友攞野先, 兩隻野唔識路, 去到長沙灣攞住個得街名大廈名無號數既地址問人, 遇到個好熱心既地鐵職員伯伯(真係好老下架, 似有六十幾)但佢唔識o個座大廈係邊, 幫我地再問其他同事之後都係無人識

於是我地唯有再打電話問朋友, 朋友話應該係深水步出先岩, 兩個又再搭地鐵到深水步, 都係唔識路, 打比鐘斯求救, 鐘斯話搵唔到座大廈係邊, 只能教我地點行去o個條街, 兩隻野, 大熱天時烈日當空身水身汗行左6條街, 去到竟然見到一堆唐樓....朋友明明話係大公司黎架 ...再打返公司叫angel search下座大廈到低係幾號, 點知答案係:無wor!!

好茫然下我地再打比朋友, 得知係個地址寫錯, 本來長沙灣出先岩....我地已經筋疲力盡, 唔想再行返6條街去地鐵, 決定搭的士。

完成任務後, 我地立即去睇我地既袋, 係IT玩左一輪, 衫就睇岩幾件(話左收手架啦, 只可買袋), 袋就睇極都唔多岩o甘, 最後都係一人一個遮仔

買完袋後約左鍾斯食飯, 等佢既時候去商務睇下書, 又有收獲。

同鐘斯食完飯後去citysuper買左少少野食....完來, 唔買衫買鞋, 都仲可以有好多野買

最近購物狂發作, 日日都去買買買, 見到咩都想買 。

上星期同angel shopping時買左兩對涼鞋, 同鍾斯行街時又買左衫, 明知金百利係貴, 但鍾意都無計。

跟住同多多佢地食壽司後又買左4件背心, 第二日意猶未盡, 自己再去shopping, 再買外套, 背心....立立雜雜一大堆。

要收手啦....

想瘦身時永遠都多意外, 哩排不斷食食食....

上星期六柏七生日bbq, 燒完野食已經飽飽, 跟住再食生日蛋糕, 再黎楊支金露...飽到第二朝。

第二日一早比老爸嘈醒, 佢地約左wing飲茶, 又死都要我去, 眼訓死人呀!

飲完茶同鍾斯出去行下, 無野想睇就搵地方tea, 又係食...

跟住老媽子叫我地兩個返屋企食飯, 細路同wing都會返去, 於是我地去買左個榴槤做飯後甜品, 食完之後真係有左5個月o甘。

星期一同多多美屎熊msn, 講講下大家又話收工一齊去峰壽司, 再約埋多多家姐, 四個人46碟, 對美屎熊黎講唔算紀錄, 但我地三個都好飽呀。

今日本想食清d, 老細又話一齊去九龍城食炭燒燒鵝, 八個人食左一隻燒鵝加十幾樣野, 食到好飽之後發現有榴槤班戟同布甸, 大家又忍唔住叫黎食。

再加埋每日換大口仔買既魚仔乾, 牛肉乾, 薯片, 朱古力, 雪糕.....幾時先會瘦呢

上星期7仔開始買滿廿蚊就送大口仔匙套, 我同angel一見瘋狂, 覺得好令令呀

於是, 兩隻野就心甘命低o甘每日去奉獻, 買到成公司都係零食....

因為買滿廿蚊送一個, 三十送兩個, 四十送三個....

於是, 每日都會發生哩d情況:

鮮奶+雜誌$15, o甘加多包薯片就$25, 無理由唔買夠$30, 又加多兩條雪條......

就係o甘經過一星期既努力, 我地兩個已經有成四十幾個大口仔....算唔算過份呢?