今日阿Sir話補十一點，點知十點半阿婷已經話到左，打電話問我係邊，之後係屋企出去，去到仲係得佢一個，得佢唔記得左係補十一點…等到十一點都係未齊人，之後阿Sir 到左，阿良仲未到，之前阿良話唔補架喇，所以阿婷同阿Sir 講，阿Sir 打個電話阿良就返黎喇，真係奇怪！今日教D 野真係好多都唔識，好多都係要計數，寫方程…不過做做下又幾好做！勁快就補完喇，可能遲左開始喇！跟著我就返屋企了…返到屋企就汁野食野，之後就去慈恩度，準時兩點正係佢屋企門口出現，無遲到。入到去已經好眼訓了，不過自己帶左好多野，好想溫書，點知睇睇下中化就去左玩阿肥，真係幾好玩架阿肥，好好笑…玩完阿肥我都唔知點解去左電腦面前，一上網就停唔到手，慈恩又訓左話唔到我，我就一直係咁上網，連我特登地帶黎o既Bio P.P 都無咩睇到就係咁上網了…激氣！一上就個幾鐘了…之後慈恩訓左就溫書喇，對住D Bio 我唔知可以點。

之後收到媽媽的電話就知道夠鐘入麻麻度了…之後就走喇，去左天耀個邊等老豆黎！之後去左婆婆度拎部電腦先，之後就入麻麻度了…入到去已經六點幾喇，睇左幾眼中化就已經可以去食飯，真係好快！食完飯就無聊一下，等D 大人洗完碗就走了…出到元朗搵阿婷，佢又係刀削麵度食…之後睇到佢今日上堂的筆記同阿Sir 個份一樣，真係唔知邊個抄邊個…不過阿Sir 個份真係清好多，睇落係阿Sir 原創o既多…

食完野就上左去三聯逛逛，之後行下千色就上阿Sir 度了…上到去又係個個自己做自己野，我就打機，hehe~ 過左關！今日o既補習個個都冇心機上，連阿Sir 都只係掛住玩魔術…最後好早就唔教書了，佢叫我地聽日要精精神神咁聽書補數…hehe之後就繼續打機喇，打到十一點幾就走了，阿良就等阿Sir 返黎教佢魔術。落到地下，落雨喎，真係嬲呀…之後只好搭輕鐵轉西鐵喇，去到西鐵我已經係咁跑架喇，都係岩岩比個架車走左(睇住佢走添)…要等成十分鐘，豈有此理！之後返屋企時都仲落，返到去就沖涼了…好快就訓左。