今日約咗ruby行街shopping，真係好耐無盡情購物啦，葵芳過然係一個好地方，買咗幾件衫都好鍾意，好開心！不過今時今日sales既服務態度就認真錯啦，見你無幫襯就即刻黑面，有無攪錯......佢哋都應該預咗10個有8個唔買架啦，EQ咁低點做大事呀。

話咁快4天的北京之旅就完結了，呢4天每朝早都係6點幾就morning call，一早出發夜晚9點幾番酒店，都算十分充實。因為明年就係北京奧運，所以好多地方都正在修葺，不過所有的旅遊景點都令我嘆為觀止，比想像中還要宏偉及壯觀，天壇、圓明頤、故宮博物館、天安門廣場、萬里長城...。雖然呢次旅行主要都係睇&聽，並唔係shopping團，但一生人點都要去一次國家首都既......。

今日阿姐突然call我入房，原來係俾信我，真係嚟得好突然。之前做完appraisal，一直都好擔心無得加or加得少...因為實在聽得太多負面消息。哈哈...so surprise，除咗加薪之外，仲有得升添啊，真係無諗過阿姐對我咁好，因為我都係入咗呢間公司1年時間左右，升職?!無理由咁快輪到我架...所以阿姐俾封信我的時候，我都不禁"yeah"咗一聲。

見完阿姐出番嚟，heidi問我係咪加人工，我好担白話咗俾佢知，佢知道我升職時都有d愕然，因為我對上嗰個秘書做咗幾年都無咩表示。攪到佢都好緊張...。

今朝一早去咗大尾督BBQ，早上11:00响大埔火車站集合，雖然遠就遠咗少少，但係嗰到既環境真係唔錯喎，都係阿碧好記性，原來Form 5嗰年學校旅行就响呢到，當時我哋幾個仲特登買咗件同款不同色既nike衛衣去旅行，幾friend。今日真係由頭燒到落尾，好飽...。夜晚約埋雞脾、ruby & 小魚食飯慶祝big生日，雖然一枱都係美食，但係實在太飽啦，只好靠文生你包底啦。之後去咗打麻雀，好耐都無打牌lu，今晚可以打個痛快。

今晚屋企人同我慶祝生日，去咗旺角正斗火煱打邊爐，間野勁偏僻好難搵，不過哥哥推介，咁一定要去試吓啦。墨魚滑彈牙、芝士墨魚丸夠特別、仲有我鄉下名菜順德魚腐、粟米超甜入晒味、冬菇&餃就麻麻地啦，總括大家都抱住個大肚腩走人。

哥哥特別訂咗個生日蛋糕送俾我，山長水遠由南丫島送出嚟，因為之前佢去南丫島行山時，吃過呢間handmade cake shop既豆腐芝士蛋糕...好好味。真的不錯啊!!!

 許番個願先......