又幾日冇打過日記喇 .... 都唔知點解呢排唔係咁想打 ...
懶左咁多都有既 .. 加上心情又唔知點咁 ... 咩事呢 ....

今朝起身返工 , o係樓下等阿榮o個陣買埋野飲 ~
唔知係咪琴晚踢完波攰得滯啦 , 俾左張 $50 當 $20 喎 ..
自己仲係咁話係張 $20 , 好彩人地有睇清楚o者 ~
癡線 .. 都唔知做乜傻下傻下咁 !

今日得3 個櫃送 , 所以好早就收得工嚕 ~
天氣真係好熱呀 ~ 好彩架車ｄ冷氣仲頂得住咋 ~
唔係既話中暑都似 ...
之後返左上水去龍豐買mouse , 買完就去搭車返屋企喇 ~
行到半路見到高妹 , 丫 ~ 做乜成日都o係上水見到佢既呢 ~
仲要次次都係o係番o個個位置喎 ~ 又會咁岩既  ..

唉 ~ 今日又休息喇 ... 再係咁菅去真係唔掂喇 !
成日o係屋企都冇出過街 , 係咁打機打機打機 ....
出面又突然間落鬼死咁大雨喎 ~ 今晚仲要去踢波架 ..
好彩落左一陣就停左o者 , 不過個地咁濕肯定唔好踢 ~

8 點幾去到球場 , 見到ｄ草地都已經唔想踢喇 ...
仲要踢埋ｄ陣式都唔慣 , ｄ水氹又o係晒我個位 .. 唉 ~
最衰就係個波好似係咁追住我黎射咁 ! 幾次都中我 ...
總之今日就真係黑仔啦 ~ 踢完都係早ｄ返屋企喇 ~

呢排都唔知點解咁靜 ... 好彩今日都有工返 ~
不過就好熱囉 ~ 好彩架車ｄ冷氣整番好o者 ~ 唔係實濕晒都似 ..
晏晝鄧啟文打黎同我講話架車琴日炒左 ~ 乜咁唔小心呀 ...

收工返到屋企 , 勁悶 .. 係咁上網搵人吹下水都冇 ....
唉 .. 算吧啦 ! 都慣架喇 .. 以前咪又係咁過 ...

今日瞓到11 點先返工 , 不過都仲係好眼瞓 ...
無辦法啦 ~ 鬼叫之前o個日瞓得咁少咩 ~ 琴晚仲要咁夜先瞓 !
好彩今日都唔多野做 , 淨係送3 個櫃o者 ~
但係就好鬼熱囉 .. o係架車度好似焗桑拿咁 ! 熱到爆呀 ....
到3 點幾收工o個陣 , 趙倫打電話黎話ivy 叫今晚唱ｋ喎 ~
諗諗下先記得 , 丫 ~ 係喎 ! 佢今日生日啵 ~
不過我約左ｄ小學同學今晚食飯 , 而家先約我 .. 都係唔去喇 ~
話晒成十年冇見過 , 梗係見下ｄ同學仔先啦 ~

返到屋企冇咩做 , 又未夠鐘出去食飯 ~ 都係打陣機先 !
玩左陣終於爆埋隻鬼武者 3 喇 ~ 呼 !
之後阿賢打黎同佢吹左陣 , 講番琴日ｄ野 ~
都話左佢唔想走架啦 ~ 哈哈 ~ 不過傾左陣就收線喇 ~
到8 點幾就去左上水中心海港食飯喇 ~
去到門口等o個陣見到鄧啟文佢地幾個 , 竟然冇人認到我喎 ~ 哈哈
係得徐漪講得出我係邊個 ~ 之後等到9 點就有檯喇 ~
其他人都黎埋喇 , 都有成十幾個人架 ...
有一兩個我就真係認唔到喇 , 不過始終都係我最難認 ~
真係冇人認到我 , 連范老師都話我變左好多 ~
原來我自己係變左咁多架 ~ 其實個個都大個左好多啦 ...
咁樣就過左十年喇 .....
食完飯之後 , 有ｄ就要返屋企嚕 ~ 得返我地9 個去食糖水 ~
一邊食一邊講返以前細個既趣事 , 再講下而家既近況 ~
有講有笑 ~ 都幾開心  ~
我諗我地呢幾個應該係最玩得架喇 ~ 哈哈 !
仲約定左下個月又成班一齊出黎唱ｋ添 ~ 都好丫 !
我諗到時應該會幾好玩既 ~ 嘻 ~

返到屋企都成點鐘喇 ... 沖埋涼就瞓覺喇 ..