今朝阿榮打黎叫我自己搭車出九龍塘等佢 , 橫掂都係 .. 瞓多陣先 ~
出到九龍塘火車站 , o個陣都10 點喇阿榮都未到 ~
都係坐埋一邊睇下女仔先 ~  哈哈 !
坐左半個阿榮都到嚕 ~ 今日都幾多野做 ~ 仲要好熱添 ...
雖然架車個冷氣唔掂 , 不過有少少涼風都好過冇啦 ....
到6 點幾先收工 , 身水身汗 .. 好想返屋企沖涼呀 ~
不過今晚又要踢波 , 都係唔返喇 ~ 上去阿羊度坐下先 !

o係佢屋企食埋飯留到8 點先行 , 呵 ~ !
去到球場就要俾一舊水會費 .. 噢 ... 是但啦 ~
今晚既表現都係冇乜狀態 , 有幾腳都踢得唔好 ~
不過都有幾下踢得唔錯 ~ 操起ｄ狀態我諗會仲好添 ~!

踢完返到去上水都10 點幾喇 , 個天閃電閃左幾下 ..
睇黎夜晚會好大雨 .. 飲完野都係拿拿聲返屋企喇 ...

放左兩日假又回復正常既生活嚕 ~ 起身返工 !
今日ｄ天氣都幾反覆架啵 ! 時晴時雨 ..
不過今日都唔係好多野做 ~ 好早就收得工喇 ~
返屋企又打機 .... 勁無聊 !

呢幾日大眼妹都有打黎 , 自從佢同條仔散左之後就係咁搵我 ..
仲講話咩而家寧願搵個熟都唔想搵新識既做男友 ~
做咩冇啦啦同我講呢ｄ野既 .. 又提番以前既諾言 ....
唔知點解我覺得佢好似有ｄ暗示咁既 .. 其實佢想點o者 ?

琴日踢完波o係屋企無聊 ~ 阿賢打黎話想上 , 哈 ! 都話架啦 ~
講兩講就心郁郁 ~ 嘰嘰嘰 ! 行吧啦 ~
今次行皇崗 , 過關o個陣見到對面返黎o個邊關口o個度有人受傷 ..
唔知咩事呢 ... 唔理啦 ~ 上到去搵埋阿羊出黎打波 ~
嘩 ... 鬼死咁多人 ! 排都唔知要排到幾時咯 ... 都係去行下街先 ~ 嘿 !
到9 點幾再上去波樓 , 唔洗等就有檯喇 ~ 時間真係計得準呀 !
一打就打到差唔多12 點 , 一局都未嬴過 .... shit !
之後同佢地去左食野 , 阿賢就一邊諗返唔返落香港好 ..
諗到食完野都係決定唔到 , 最後用銀仔黎決定 ~ 個結果係 ... 留低 ..
哈哈 ! 諗咁耐果結果都係一樣 ~ 都係去按摩完朝早先走啦 ~
今次去左經典揼 , 初頭都有ｄ唔想 .. 不過都係是但啦 ~
橫掂裝修完都未試過 , 睇下好唔好先 ~ 都唔錯喎 !
裝修左真係舒服好多 ~ 乾淨左 ! 技師既質數都唔錯
下次都可以再黎既 ~ 不過唔知幾時嚕 ...
瞓左兩個幾鐘 , 俾阿賢叫醒左返香港 .. 嘩 ~ 真係咁鬼早架 ..
返到屋企都係10 點幾 ... 出面又熱到死 ~
今日都係留o係屋企瞓下覺好過喇 .. 

琴晚成晚o係屋企冇出過去 , 悶到死 .. 睇波睇到3 點幾先瞓 ~
瞓左幾個鐘 , 又瞓唔到喇 .. 7 點幾就醒左 ~
見咁早上左陣網 .. 睇下ｄ賽果 , 巴塞終於攞到聯賽冠軍咯 ! yeah ~
之後就換衫落左紅場踢波 ~ 嘩 ... 今日好曬呀 ~ 熱到出汁 ...
今日踢得都算普普通通 , 唔夠瞓係爭咁ｄ架喇 ~
不過可能呢排戒緊煙既關係啦 , 體能好似好左咁 ~
雖然未致於好似以前咁跑足全場 , 但整體黎講都已經好過食煙o個陣時架喇 ^^
幸運地都有一個入球 , 哈哈 ! 下次要有埋助攻先得 ~ 嘰嘰 !

踢完波去左拎眼鏡 , 拎左一副仲有一副要過幾日先有得拎 ~
終於有番副可以睇得清清楚楚既眼鏡喇 ~
o係上水行左陣 , 發覺都唔少靚女喎 !  點解以前唔覺既 ~ 嘿嘿 !

過左兩日 , 大眼妹好似無咩事咁喇 ..
不過我唔知佢真係無事丫定係扮無野呢 .... 希望佢識諗啦 ~
今朝7 點就要起身 .. 無辦法因為要叫醒大眼妹 ..
打左一次無人聽諗住再打啦 ~ 點知自己又瞓著左  ..
到7 點九阿榮打黎先起身 .. 都有諗過再打俾大眼妹 ~
不過自己都趕頭趕命 ~ 所以都係冇打到 ...
好彩之後佢都醒左打番黎 ~ 唔係又肯定鬧鬼我  ..

今日好鬼熱呀 ! 做一陣野都出晒汗 ..
不過星期六 , 我諗都好快搞掂架o者 ~ 哈 !
點知都要等到3 點幾先收得工 ... 呢個時間都係返屋企啦 ~
返到屋企阿媽竟然o係度 ! 唉 ~ 又無電視用喇 ....
成日就o係屋企上網 , 勁悶  ..
又冇人打黎 .. 我諗今晚都係留o係屋企架喇 .....