岩岩順利完成左商業電台個訪問喇!!今個星期五1點至2點會播出街,記住係雷霆881啵!!頭先錄完音行出離就見到莫文蔚,蘇施黃好好呀!佢主動叫莫文蔚同我影相haha~~

聽日我11點要去整牙呀好驚......

呢幾日...個人又覺得好累又凍喇!!成日都好似訓唔夠咁.....唔知係咪血色素又跌左呢?而且...我d記憶又再差左好多!!

我今朝搭輕鐵都唔記得自己有無doo機....上到車問媽咪,我有無doo到呀?佢又唔知....我真係諗到諗唔到自己有無doo.....到到落車doo個出閘,原來我係有doo到既...但點解我會唔記得呢??之後去到又一城,黃小姐約左我去酒樓飲茶,佢係電話度講左個間野個名,我聽緊電話個時係記得架...但一收左線...我就完全一隻字都記唔番....去問reception,佢講左3個地方,講完又係唔記得曬....媽咪係咁問我...但我真係咩都唔記得呀!!點算呀??我個腦....一片空白呢!!!

依家情況愈離愈嚴重,再係咁落去,我就離咩都唔記得曬喇!!有咩補救方法呢??唔通真係要日日落本薄出街,寫低曬所有發生過既事同講過既野??我諗要了.....or...係咪有咩治療法架???有無人識....我已經日日玩訓練腦袋既games架喇!!個排玩數獨個人都無禁蠢

尋晚家俊表姐個BB滿月呀~~我去左飲

小baby真係好得意,真係好想日日都見到佢,因為我真係好鐘意岩岩出世至到幾歲大既BB,見到佢禁得意,又無煩惱,有時佢又會笑笑下,唔鐘意就喊,咩事都相當直接簡單,唔會好似大人咁,禁多野諗....做BB真係好

另外，最開心又係，我地尋晚食食下飯１０點３全部人都睇到我個廣告呀~~本來佢一出劉德華，我都諗緊會唔會出我呢??因為呢幾日都係１０點３出我，都出左禁多晚，可能唔出掛．．．我一路等，一路期待著．．．點知．．哈哈．．真係出呀，所有人都望住電視機．．．個刻我覺得自己好犀利架，愈離愈多人識我，佢地每個人你一句我一句，話我好靚好上鏡好犀利，攪到我同家俊怕怕醜得離又有少少驕傲．．．．．．．．．．．．總之就好開心啦~~

你話．．．．我會出名嗎??

聽日，我要去商業電台接受蘇施黃訪問，我好似好忙返工咁，希望．．有緣的話，呢樣野真係可以變成我既工作啦~~

哈哈．．．仲有一樣野．．．我今日仲有命坐係度打日記，全因我命大，哈．．講笑呢~~尋日我第一次坐家俊手車．．．WOW~開頭真係好驚架，因為家俊考左個排禁耐都係揸過５次到．．．比你都唔敢坐啦！！我只係敢坐佢船，真係好驚坐佢車而尋日．．．我獻出左我既第一次比佢．．哈哈．．真係成條命交曬比佢∼我坐佢隔離，佢揸車好似揸船咁，一去就去，一轉就轉，架車跟住好似船咁飄．．．開頭我真係好驚．．．．但坐耐左．．又OK啵．．只要佢練多D就無事啦~~第日我要佢揸入離天水圍車我出去

劉德華 - 沒有翅膀的天使

呢幾日我都無打到日記....係因為....我又入左醫院了~~點解???

個晚11點半party完左之後,我同媽咪一齊行去搭車,點知....行到出去酒店門口,個度個地下係唔平有少少斜而且仲好"線"架,我行緊個時已經捉住媽咪...但一下唔小心..我真係一字馬咁"線"底左.........而且仲係隻痛腳屈親,一"線"個下,隻左腳屈到過左100度....我即刻痛到大喊而無聲....只識捉住個膝頭....媽咪驚到又喊左出離,全部人都好緊張睇我咩事....之後...酒店派左醫生同我check下...但都無用啦...因為佢地唔識我呢d case....佢地又叫埋醫院個教授離睇我....佢地話安全起見,一定要送我入醫院.....so...佢地call白車,我就入左律敦治醫院喇!!(個間酒店係灣仔_君悅酒店)

去到急症室,醫生同我檢查,佢剪開我隻絲襪,先知原來我擦傷左dd....有個傷口...我照過x光同超聲波,醫生話我屈親度至創傷,佢驚我個金屬交整親,所以要我留院觀察,但律敦治係無骨科病房,迫於無奈...我地半夜1點幾佢張我送左過去柴灣既東區尤德夫人那打素醫院 .....真係so far ar,我地一路都想番番去威爾斯,但醫生話半夜無車會送我去,我只好乖乖留係個度訓一晚第日再送我番去......

加加埋埋我住左醫生3日,番到個去kc wong同我檢查,我隻腳又無咩野啵,而且仲行得走得,so....我尋日就出院番番屋企喇~~今次番離屋企,kc wong要我再三諗清楚決定做唔做換交手術,如果係做...就會1月做了~~

哈哈.....我個晚影左d相呀!!我同一排導演一齊坐,仲有軟硬呀,我只知道個晚林海烽成日望住我姐^^~

個晚真係好開心架^^~

聽日我要參加麥當勞個化妝舞會^^~到時我會扮西部牛女呀 ~~今日我特登搵埋媽咪同家俊出左深水涉同旺角買牛仔服裝....買左好多好多野呀~~好開心....不過換來我好累呀....

一起身就見到禁正既陽光,心情都靚d呀~~

今日我要用曬全日既時間完成27號送比欣欣個幅畫....希望我師父更加到啦...其實我已經有少少靈感了....不過我想要更強烈同巨體d...加油加油~~~~畫一幅好畫

呢個月,只餘下日子還不多....我點樣渡過呢??

哈哈...比我相像中還要充實,還要開心,仲還要忙呀~~~個天對我實在太好了...比我咁忙,等我唔洗亂諗野....哈哈呢兩個星期既booking full曬了....如果想約我,要搵我經理人傾傾喇~~

今日...我約左miss wong,王姑娘,ZOE,周寶仲有佢男朋友一齊去荃灣食飯...

聽日星期6我要留係屋企休息,仲要畫一幅畫等27號dinner送比欣欣.....又係好忙...

星期日,我約左欣欣同家俊係沙田食飯,到時可能仲多幾個人....唔知呢???

星期一,我要出旺角買衫,因為好耐無買衫,同埋星期2有個麥當勞既party要去,到時我可能扮Little Bunny都唔定,唔扮就要買條裙喇~~

星期二,被邀請去麥當勞party,個晚一定又好開心因為有"小儀"做MC呀~~

星期三,本來要上山,但依家仲未知幾多號入院,所以應該休息....

星期四同星期五都唔記得左做咩了......總之呢兩個星期就好多野做啦~~~

依家我狂燒緊我27mins個廣告落DVD度....唔知要燒幾多隻呢 ?哈哈...好似派貼咁

燒呀燒呀燒呀......依家愈離愈多人睇過我個廣告喇~~~開心到爆....

今日收到一個好奇怪既E-mail.....send比我既人係我唔識架!!

事發....星期3即係睇演唱會個日....我同媽咪一落樓就見到兩隻龜蛋(police)..我同媽咪都係好似正常咁望左佢地一眼就無理佢地,兩個繼續行....點知,個兩個龜蛋上離逗我!!!佢話...."小姐,囉張身份証離睇下"...之後我笑住話"下??"當然我要比佢睇啦~~佢地就咁睇下我叫咩名,就比番我....覺得奇怪嗎??佢地唔係扮低,又唔係call上台....咁佢地想點呢???大家心知了~~~我走個時,其中一個龜蛋係咁望住我......我無理佢....但....我有無見過佢呢???

到岩岩我check E-mail就收到個喵喵係一個叫Anthony既男仔send比我....佢係喵喵度話....前幾日,有個警察打比佢,佢話果日係咁：「唔該Anthony, 我係警察, 想問你識唔識一個女仔叫xxx, 即係雯雯...」之後佢話唔識...就收左線...

依家我一路係咁諗緊佢地係邊個??點解個龜蛋知道我叫雯雯呢??點解個龜蛋禁多人唔搵,係只會搵呢個叫Anthony既男仔呢??仲有...呢個叫Anthony既人又係邊個呢 ??點解佢會有我e-mail呢???好多好多問題我都想知....迷.....

講其他....個晚去睇演唱會所有人都睇到我個廣告呀!!!而且個晚欣欣(導演)燒埋隻碟比我,長到27mins...哈哈....第日會係全港M記見到我架喇!!個晚我番到離即刻播離同媽咪仲有家俊一齊睇,我地一路睇一路喊....哈哈....總共睇左兩次....兩次都睇到喊,尋晚我又播比爸爸睇....我又睇到喊....欣欣話..wendy(製片)睇左好多好多次,次次都有喊...哈哈....係真架...真係好感人,拍得好好....遲d呢隻碟我會比miss wong囉番學校播比班學生睇.....

依家有個煩惱....就係欣欣燒比我個隻係DVD...我依家手頭上only得vcd碟可以燒,聽日就要比miss wong了....點算好呢??

p.s個晚個演唱會超級好睇@100%值得值得非常值得一睇呀~~so cool~~~

我決定左提早下個月做手術呀~~大家多多支持我啦~~

各位觀眾.....我終於睇到自己個廣告出街喇~~~真係等死我......我足足等左成個星期喇~~依家會每日每朝8點幾睇到我,同埋中午2點做完宣傳易就會播出街架喇!!大家有機會就係呢兩個時間睇下啦~~

我依家有種特別既心情....大吉利是就係好似快要死了....依家就係臨死之前做曬我想做既野,去一d我想去既地方,食我想食既野.....只要自己開心就得了....哈哈....因為依家唔做....可能第日後悔都無用了............

今晚,我同媽咪仲有家俊去睇麥當勞叔叔兒童之家慈善演唱會呀~~有好多明星....有華仔,Eason,twins,軟硬.........等等.....一定好開心呢 ~~

收到個個消息之後,我喊左一日,現在心情算是好好多掛!!! 唔知?

現在....我腦海只得一個空洞,空空的...靜靜的....愈是想就愈是不想東西,起伏不定.....脾氣十分暴躁....每個人都頂我唔順.....對唔住呀...我真係控制唔到!!點解會咁架 ??依家連一句好少事既野,我都會即刻發脾氣......我真係唔想咁樣....我唔想因為我既脾氣而令你地唔開心

表面上,我看似好好......但實質上...........我真係好想一直喊落去,但.....喊...唔係一個解決辦法,喊幾多都係於事無補,喊幾多都係要做手術,喊幾多都係要做人.....我已經好累了.....係我心深處....有隻魔鬼成日都叫我放棄....我真係好驚有一日會比佢講服,我依家只靠你地每一個人既關心,我仲還可以支持住....如果呢個世界只得我一個....唔知會變成點呢?

有個好朋友教我,唔可以再依賴其他人,我大個女了....有d事要自己去面對,自己去解決,要接受,忍受,享受....但......我可以做到嗎?

今朝終於收到黃醫生電話,佢打離同我講解個手術點做,問我意願同問我想幾時做....我答..我想過埋農曆新年.....因為今次一做....起碼要訓係醫院4個月或以上....我唔想無得出離過年,我唔想家俊媽咪爸爸擔心,唔想所有人擔心....

當我訓係醫院個幾個月,我同家俊之間既感情又會變成點呢?希望唔會太差罷.....辛苦你了家俊....我成日對你發脾氣,又要你就曬我......一個大小姐.....家俊對唔住呀~~

今朝一早7點半如常起身刷牙洗面,心情輕鬆地同媽咪出發.....因為我當今日都係普通比班鬼佬醫生睇下就算....點知............那個壞消息終於出現我眼前,終於要我面對了.....

坐緊巴士個時,媽咪突然問我,"如果一陣有咩唔好野你會點?仲有家俊又再會點諗?"我覺得奇怪....因為我一路都無諗呢個問題...點解佢咁問我呢 ?我認為今日唔會有事發生....所以我話..."家俊唔同以前架喇....佢同我都經歷左禁多次,佢開始明白我...."(我咁講都係想比多d信心媽咪,其實我自己都唔敢肯定家俊會點諗!!)之後...我亦都無再諗呢個問題了....

番到醫院...我見到kc wong都仲有講有笑....之後有一班鬼佬入離就開始討論我隻腳.....佢地講曬英文,咕嚕咕嚕唔知講嘜?我只聽到少少.....佢地又按我個膝頭問我邊度痛,屈我隻腳,叫我行比佢地睇,張我個交左右搖,睇左我張X光片好耐,張張都囉離比較,放大又放細,成班都係咕嚕咕嚕.......佢地傾左半個幾鐘,之後好似有定論......

kc wong同我講....."你個交因為發炎膝頭個位原來開始鬆緊,但下面都仲生得好實,依家班外國教授話要你換左個交,囉左呢個出離,放d骨髓入去,之後可能等兩三個月之後再睇下放唔放番個新交入去..."我問佢係咪因為排斥....佢話..."唔係,唔關排斥事,係關發炎事"我又問...係咪一定要換,佢即刻好肯定咁話..."係"..............

當場我即刻喊到痴左線.......kc wong見到我咁喊個心都好唔舒服,但佢又要同班鬼佬去第度,之後佢都無理到我就走曬......佢話遲d打比我再講清楚d...

我終於又有番個種心情了....

依家我心情就好似岩岩發現有骨癌個時一樣,喊得淒涼....再度迷失方向....腦海一片空白.....好累....好辛苦.....好想再次逃避.....嘜都唔想知....我快要崩潰了.....

我一路最擔心都係....我又要做大手術,家俊真係會點諗呢?佢會唔會因為我今次呢個換交大手術離開我?佢會唔會唔開心?佢點諗一直都好影響我,而且係我心魔,我好怕好怕佢再次講個句說話......

如果唔係有佢....我想...我可能可以自己好好堅強地繼續支持落去....但有了佢...我又要擔心多個人點諗,心靈上所有野....

我今日見完kc wong,之後去左搵譚姑娘傾計,譚姑娘陪住我一齊喊....佢一路地安慰我,我一句說話都唔想講.....因為....我個心真係好痛好辛苦,無曬心機....個15分鐘我只係喊....快要哭崩了.....佢問我好多好多問題.....到我講到家俊.....佢就話"如果今次家俊能夠接受你呢個咁嚴重既消息,你兩個感情已經可以又昇華喇!!"佢仲有講左好多好多野.....我都唔係太記得了...但係我明白佢講既所有野.....

原來家俊對我真係禁重要.....譚姑娘話我因為無左佢唔得!!!我好在乎家俊每一句說話,佢一直都係我既心魔.....我知道個消息一直都無打過比家俊....我好驚面對佢...好驚影響到佢心情...好驚我講得唔好攪到有反效果....好驚我一聽到佢把聲只係識喊咩到講唔到.....好驚..好驚...好驚佢會離開我.....所以我忍...忍....一路都無打比佢....

我一路搭車番去都無曬心機,諗一諗就流眼淚,我番到屋企樓下,終於忍唔住打比家俊,原本我諗住唔同佢講呢件事....點知我一打去,佢好緊張問我睇完醫生點....我就偏偏且開話題,表現到咩事都無咁....佢一次又一次咁追問我,我一路一路都係逃避佢問題,之後佢話"你唔講我收線架喇!!"終於我講左出離了.....家俊唔單止無悔悔氣同我講野,而且仲更加支持我,更加關心我,溫柔的聲線,比我想像中完全相反!!我個心即刻舒服曬...聽到佢咁講,我個心感言地落起淚來!!

家俊!!你是我唯一的精神支柱~沒有你,我怕我堅持不下來....你的每一句說話,都可以令我喜怒哀樂,我真係好開心好開心你會咁錫我,唔會離我而去.....

經過呢一次,我地之間既感情又進一步昇華了~~~多謝你....我地又UP LEVEL喇~~~

我發現依家隻腳會跟隨著我心情而變,我開心,佢真係唔會痛,當我一喊or發脾氣,佢會跟住發脾氣跟住喊,攪到我好辛苦好痛.......

其實依家個天係咪玩我呢?一物換一物,佢唔會比我好過,只要我得到一點快樂,佢就立即比d壞消息打沉我,我可以好開心拍廣告,見好多明星,有導演送部鋼琴比我,其實通通都係要我付出代價架....

呢條路真係好難行.....只要自己有dd意志唔夠堅定,一定比佢打敗!!!但我.....我相信...我會打不死罷!!!!雨過天晴~~~希望在明天~~~