四月四日【星期五】
今日係清明節+兒童節
難得兒童節有假放
但係我今朝寧願今日無假放 但係到左晏晝又唔係咁諗喎
今朝一早
今日係第一次收到老豆第一份兒童節禮物
但係我不但唔開心 仲要嬲
果份兒童節禮物就打用粗口鬧我+打我
今日我啊媽話我老豆成日都唔送野比我
講真,咁多年我都只係收過佢送過三樣禮物比我
我真係好珍惜
十年都冇一次
但係我啊媽每逢節日都會送野比我
佢就話我老豆
然後我老豆唔高興就搵我黎出氣
我唔明點解唔係我講錯野,但係佢次次都係鬧我打我
今日都唔例外
一巴打埋黎話我唔生性
生舊叉燒都好過生我,叉燒都話有得食
但係自問我無一樣野做得唔好
我唔會去夜街 唔會識埋D唔三唔四既人 唔會唱K 唔會去網吧 唔會去埋D唔應該去既地方
我最多都係去籃球場多
連去街都少
而且佢番到黎我簡直係佢啊四服侍周到
但係佢唔滿意 我做錯少少佢就打我鬧我
我就係因為做得家務多搞到咁大力
我表面上係一個很壞既人 其實我唔係
同我相處耐左就會明
但係佢成日話我讀書唔好
咁我讀Band3學校考第一好唔好
不過我諗我幾時生日,今年幾歲,讀咩學校,我鍾意D咩佢都未知
從來得一個人知我生日,會同我講生日快樂,會送生日禮物比我 果個就係我啊媽
我只係希望到左今年生日有人同我講生日快樂就得
有人記得我既生日我會好開心
幾本上我有冇老豆都無所謂
我成日同啊媽講同佢離婚,但係佢話唔肯
係因為佢話有佢管住我好D,而且離開左佢我地無能力支付日常開支
但係其實為左呢件事
我可以書都唔讀去做野搵食
同時可以符合我老豆所講既"女仔唔駛讀咁多書"
但係其實我好享受校園生活
不過都係算啦 到時先再打算

然後到左晏晝
勁開心
約左施蓉妮,Theresa同Hey Man去西九溜冰
去之前有D緊張
因為成兩年無溜過冰
我怕我一入到去就仆低
但係入到去果陣竟然無乜問題
溜番15分鍾左右就回復以前既水準既50%
但係我始終都回復唔到以前既我
以前既我識做好多花式,可以話自學黎講算好有水準
果陣既我勁大膽
可以係冰上狂奔起舞
可以溜到無影無蹤
五秒前係你前面,五秒後可以溜完一個圈係你隔離擦身而過
一陣風咁經過
之前仲有個稱號
叫做冰之神風
但係最後因為1D問題而從始消失係溜冰場上
然後玩得勁開心
但係入左佢玩左一陣就清場舖平D冰
果陣既我先岩岩有番D水準
半個鍾之後入出番去再玩過
舖完D冰真係滑好多 亦都好玩好多
之後就愈黎愈大膽
溜得愈黎愈快
開始可以好似以前咁快
不過都係得番7成速度
我之前通常都係揀人少既時間去
所以可以幾快都唔怕撞到人
但係3點半果陣就開始多人起黎
所以都唔可以踩到太快
我溜冰果陣好開心
可以無拘無束咁滑翔
而且果陣跟本掉低晒D煩惱,唔開心既野
我覺得我宜家過緊既日子都好多壓力
所以都係"偷得浮生平日閒"
但係真係"青出於藍更勝於藍"
我今日溜得好快既時候有個細路係我隔離想同我鬥快
咁我見到有人想同我玩
我就同佢玩陣
但係竟然兩個圈之後
我比佢嚇親
仲仆低左
果陣沖力勁大,條褲又跣
都跣左好遠下 都有幾米
果陣仆落地之前用隻手擋一擋
宜家仲紅左一舊
而且仲拗柴
雖然有少少痛
不過唔緊要啦
我好享受=]
我同左我班FD講下個月再黎玩過

玩完之後我地就落左去買野食
然後就上左佢奇趣天地玩籃球機
我地兩個人一部機然後連線
超好玩
我係主力帶動大家過關有得玩得耐D
但係唔係次次都過到晒三關
因為兩個人玩好難配合
初初都火星撞地球咁撞晒原來入到既波出黎
但係就愈打愈合拍
雖然我今日自己單打果陣都打到三百分
但係我唔玩慣呢種機
我玩開通常都一定過400分
100局先得一局唔過400
我玩呢部機D分數都唔係幾穩定
有時149分←岩岩過唔到關
有時300幾分
真係唔知搞乜-_-
太離譜!

但係我完全無諗過佢地會岩玩
佢地仲話下次一定要再玩呢部籃球機
我真係既開心又感動
終於都有人同我志同道合~
我下次一定要再同佢地黎玩成日
仲要佢地請番我玩籃球機-3-
期待中..

四月三日【星期四】
今日係第一次番學上堂唔駛帶書~
我朝一早上DT勁悶
我做黎做去都做錯
終於做左好多次之後都係放棄左
我簡直係個DT百痴+電腦百痴!

上完之後到小息就要換衫
第一次見到學校四個女廁爆晒
所以盲 搞到等左好耐先換完
然後等到黎換完已經完左小息

之後就係最緊張既表演
好憎咁多人望實晒我
所以我全程都冇望過人

我覺得今日既表演簡直出乎意料之外
D男仔今日個個都好合作,投入,認真
琴日綵排果陣都仲係唔記得晒歌詞同無節奏感
我今日真係好感動!

然後我諗住2E一定會有第四甚至第三
我都唔敢期望有第二名
諗住唔包尾就得，而且我都諗住包尾一定唔係我地2E
我諗住2B一定第一
2A一定包尾
2C,D,E都係差唔多

之後公佈結果果陣
真係離晒大譜
我地班包尾
我覺得點都一定唔差過2A啦
之後2C第4
2B得第3←勁離譜,個個都話2B一定囉硬第一
2D第二←0K啦,不過條氣都唔係幾順
2A囉第一←簡直100%造馬
跳舞又冇，歌又唱錯，節奏又冇齊，揸咪過過唔記得歌詞
跟本都唔知佢地唱緊歌
個個都話離譜
校長簡直偽君子
係造馬都唔好咁明顯啦大佬
水準差咁鬼遠
佢分明唔想2A出醜，亦都唔想自己無面啦
成日叫人誠實，你自己好誠實咩
我以後都唔會再聽你講野
自打嘴巴，誤導學生，簡直用肺講野!←我都唔想鬧得咁離譜，佢真係太過份
第二又係造馬
成班男仔都無唱過，不過跳舞唔錯
其實校長唔係比面Miss Tsang，唔係2D跟本都無本事囉到第二
校長我真係100%勁討厭你
你係今日第一個令到我好嬲既老師
2E包尾我真係條氣點都唔順
差D喊左出黎

之後仲要我地換番校服
仲要鎖左課室
然後要等好耐先囉到D衫
換完之後我地又要搵校工開番課室擺野
過左五分鍾之後溫sir囉左條鎖匙出黎比我地
真係好彩，唔係要企成世先有得放
但係搞完之後時候都唔早
已經搞到1:10
食鬼咩-_-
要用極速食先得
真係激死

然後第五第六堂就係F.5 Farewell Party
坐低果陣差幾個位，我地要分開坐
好彩都仲有個fd係我隔黎陪我
因為D F.4真係勁恐怖~
嚇死我
唉..總之就黑仔

到係禮堂走既時候溫sir就話
"我和2E有個約會，請2E留係課室等我"←勁串囉
事由係因為我地班D人囉D"核突膠"掟晒上天花板痴實晒
要問我地原因
之後主席勁狗,屈我掟上天花板
我跟本只係玩過一野
我都無做過
但係佢D FD有做過就話佢地冇
全部屈晒我到
呢D人真係無品
包庇朋友，推卸過錯係無辜既人身上
呢D人簡直唔應該做班會主席，係2E班既恥辱
此時我既無奈，又憤怒﹗
勁想喊

本來我約左成哥放學上去睇中文卷嫁
宜家搞到4:30先上得去
但係好激氣啊﹗
我琴日先係blog講過話無論中文無八十分都唔緊要,但係都唔好低過70or79分
點知....我竟然79分!!!!!!!!!!!!!!!!!!!!!!!!!!!!!!!!
我勁唔開心
點解次次都係9字尾﹗
小學已經次次都係咁,點解又要歷史重演!
我差一分先囉到成哥首詩﹗
仲要有一個人高分過我一分
佢岩岩囉到首詩
我勁妒忌
竟然上堂唔聽書都高分過我
我真係太冇用
溫晒書都係79分
成哥話我錯埋晒D大意既野
話我唔應該得79咁少
錯少D唔小心野90分都有
我跟本勁緊張
連睇戲同冷氣既書面語都唔記得
然後啊sir又問我上一次考幾分
我上次得66炸
然後佢話你今次進步左好多啦
我話無80分我1D都唔滿意
佢就話79分好好嫁啦←成哥呢句激嬲我﹗
之後我講左一句話我下一次一定會囉夠80分就走左
然後我就喊..
點解我會咁失敗

睇完卷之後我就無晒心情練波
4點45分了，唔練算
之後Miss Man又鬧我
我解釋佢又話我博佢嘴
之後佢教訓我
佢今次終於挑戰到我底線
我都忍左佢好耐
由於我今日受左咁多氣既原故
我就鬧左佢八婆
因為佢真係令到我太嬲
我已經失晒控制
仲比佢鬧到喊+激嬲左我
之後佢仲要勁厚面皮話八婆係話緊我嗎?如果係既話就帶你搵潘sir!
然後我就話你鍾意自認無所謂
不過我唔係話緊你
然後佢就走左
我真係勁想佢消失
勁討厭
我知道話佢八婆係過份左，無尊師重道
不過我覺得實際上話佢八婆完全無錯
But never mind la~
同類事件以後都唔會再發生
我只會做一次
因為以後佢同我講咩我都當佢透明算

而且我希望不久既將來可以完全戒晒粗口同鬧人呢回事
我要做個自閉既人，我要扮cool乜都唔理
我要忍氣吞聲，總之凡事都要忍忍忍
我以後都唔要再鬧人
我宜家得兩個選擇，一係做好學生，一係做壞學生
我嘗試下做個好學生先
唔得就做一個勁壞既學生，不過要成績好好既=]
但係我知我一定唔係一個做壞學生既材料
我做唔到好壞
因為我知啊媽咁錫我會心痛我學壞，上次試過扮壞一日已經唔掂~
我大過左之後要好好養佢，唔要餓死佢

四月二日【星期三】
今天裹，我受了許多刺激
今朝一早，我以為今日係Day7
我執晒Day7 D書
點知原來今日係Day1-_-
我完全無印象放假之前果日係Day3
我完全唔知發生咩事
我本來一直好期待份中文卷
Day7有五份卷派ga~
我想早死早著
點知今日係Day1
Day1同Day3都冇中文堂

雖然聽日係Day2
但係我地F.1同F.2聽日只係上頭兩堂炸
上我好憎既DT堂>_<
聽日第三第四堂singing contest表演-_-
要帶黑色T恤同牛仔褲番去換
著潮衫扮潮人
我地班唱We will rock you
我地輸緊啦>33<
人地D歌長過我地
我地D人連歌詞都仲未記得
點唱先
節拍感又冇
我覺得聽日出醜都幾正常

但係最慘就係D F.1唔駛表演,只係睇我地
我地上年F.1都要表演
我都宜家都仲記得上年係唱Perhaps Love
D歌詞仲記憶猶新

但係我地表演只係用一堂
第四堂玩遊戲,,同埋班F.1仔玩
我唔要玩遊戲啊,,無聊
比番堂中文我好過﹗

然後第五第六堂F.5 Farewell party
又冇多兩堂@_@
還番四堂比我啊﹗

今日只係派左一科-Science
真係好傷心
做唔晒+唔合格
得40分﹗﹗﹗
我溫左呢科7日ga
點解同上次一樣得40分ga
咁溫黎做咩啊
唔知係唔係比得自己壓力太大同期望太大所致呢？
我宜家宣佈我會一直頹落去
因為我預計左有3,4科會唔合格
仲衰過唔溫果陣
唔溫都係肥兩科
溫左肥三,四
我真係無用﹗

如果..如果中文得79分or低過70分既話我唔知會點
我真係怕我會受唔住壓力癲左
我既最後希望真係得中文身上
中文都衰埋我就一冇所有﹗

放左學之後等到4點9上去singing contest既最後綵排
真係一盤散沙咁
無藥可救﹗
期望聽日順利完成吧﹗

綵排完後都係一如以往咁打排球
我真係好想發洩
然後我講某人既野佢就係咁打我
打我唔還手唔代表我唔嬲
我廢事大蝦細
如果係我班D人我一定第一下就還手
仲比你打到十幾下我都唔還手？
打人大力都死﹗你打得爽姐，我唔痛嫁？

之後我仲激到想叫人囉界刀插爆我隻手
我之後有少少淆淆地
但係佢準備插落黎嚇我我都冇縮過手
不過之後我就話唔玩啦
然後縮手果陣都係比界刀界到-_-
然後佢地就話有血流出黎，好型啊﹗
我一D都唔覺得型 只係得個痛字~

四月一日【星期二】
今天是愚人節，一整到去就比人整估
但係我今朝好擔心數學會考成點
因為"愚人節"既原故
愚人節對我呢個愚人黎講有好大意義
呢個節日唔通真係為左我呢D蠢人而訂立既？

今朝一早又落下滂沱大雨←對於我黎講
我好想傾盆大雨淋落我個頭淋醒我
我覺得我做左咁大年人都仲係不知做緊D乜
我覺得我跟本連普通做人既資格都冇

講番今日考試
初初我以為得一個鍾
嚇到我個心都跳埋出黎
後來先知原來數學考個半鍾=_=
如果得一個鍾既話肯定死緊
但係總括而言都算唔錯丫
起碼都識做好多
同埋做唔切6分姐-_-
對於我黎講真係算少
我有邊一次做到咁多~"~
次次都空好多-_-

回顧：
今次UT
7科裹面有4科做唔晒
包括Science,英文,中史同maths
點解咁多科目屎屎聲ga
咁討厭>33<

唔好以為考完試好正
對我黎講只係收卷果陣開心幾秒
其實考試果陣係最快活
考完試其實就係惡夢既開始
由派卷到派成績表先係惡夢既高朝
經我既精密頭腦計算過
我已經估計出D科目有幾分
中文:81分
英文:35分
數學:59分
IH:61分
MCE:55分
中史:20分
Science:42分
希望有我理想既成績吧
不然便大穫了
最衰英文累事﹗

三月三十一日【星期一】
今日考左英文同中史，全軍覆沒﹗﹗﹗
我發覺我寫野愈黎愈慢
今朝好似食左雲吞咁
45分鍾先做晒reading
究竟我係到做緊乜
平日最多用30分鍾
竟然今日可以慢成咁
我真係好想自殺
英文卷我係真係全部識晒
但係最大問題係唔夠時間
睇番我未做果D真係可以岩九成
但係點解我要咁折惰
人地個個都做晒
得我做唔晒
乜唔係一定付出就有收穫既咩
點解有D人可以不勞而穫
我付出埋時間同精力
點解唔可以得到一定既成果

我真係第一次咁努力溫書
第一次就失敗左
我無信心再溫落去
我宜家連數學都想放棄
一直衰落去仲好
我知道聽日數學得一個鍾一定好多都做唔晒
我都唔知我有邊一次係可以科科都做得晒
我連寫字都咁慢
大過左之後點出去同人競爭

我覺得我今次考試肯定仲衰過上次
如果中文都衰埋
我真係唔知會做D咩事出黎
我宜家再諗中史仲衰
英文都仲話有合格既機會

但係唔好見話同人玩得咁開心
其實我好傷心
我通常都係同人玩黎掩飾哀傷
我今日都無啦啦大聲鬧人
佢地無啦啦囉我本中史作業
我果陣溫緊作業
佢地囉左去我個位到
囉左上307
最憎行咁高上去
我果班D怪物係課室玩黎玩去
點溫書？
之後佢地唔肯同我上去囉番落黎
我講左十五分鍾先囉番落黎
最後仲要大聲發佢地脾氣先囉番落黎
搞到成個Canteen D人都望住我
你估我想咩!?
最幣就係竟然我鬧完人會喊
次次都係咁-_-
我今年勁小鬧人
真係唔係普通人可以迫到我鬧人
如果比我鬧既人你小心D
你已經挑戰緊我既底線~
唔好再刺激我﹗
講真我今日真係唔想鬧人
我真係一時衝動
但係呢件事我肯定錯唔晒
之後仲要嬲我
講某人既事就咁緊張問我
仲要握到我實一實
唔痛既咩-0-

咁中史呢？
中史做得一半多少少
我諗住最多得25分
中史包尾都似

我知道我一定兌現唔到考50名既承諾
算吧啦~我呢D廢物
點會有出人頭地既一天
但係我知道自己已經盡左力
無論得出黎既結果會點都要接受結果~
希望聽日數學識做晒同做得晒吧﹗
但係聽日係愚人節
唔知愚人節會唔會做事特別蠢呢
點解要愚人節先考數學-_-

祝大家聽日愚人節快樂﹗
日日都咁蠢=]