八月廿五日，距離考琴仲有一日。
呢日再去左學琴，奈何首“A”同“C”都彈得唔好，
講真丫，話雖已經考過幾次，但仍然好緊張！
學完就去左上環同阿妹慶祝生日，開心。
話說我今日都有抱佢，但次次都唔超過半分鐘……
可能阿妹有啲眼訓，所以呢日有啲扭計。
八月廿六日，係屬於我ge大日子。
朝早十點幾起左身之後就一直彈琴，
用左成個幾鐘先至Warm-up到，開始投入-.-
最後彈到兩點先至收工，跟住食野。
去琴行途中，我簡直驚到要叫救命，
始終對自己都真係冇咩信心！
個女考官都幾nice，真係好彩好彩。
Scales彈得可以，半音階彈錯，有時禁左側邊啲音。
首“A”就比平時好，放慢左少少彈，隻手就平均左^^
首“B”就幾投入，堆裝飾音就幾清楚，唔錯唔錯；
放慢彈首“C”之後，就好左好多，唯獨有個位kick住左！
Sight-reading就有啲危險，始終拍子同啲音都唔多準……
Aural呢部分仲係最精彩架，就算Aural Part D唔錯，
都難以「單天保自尊」啦！話雖如此，總分應該合格架。
離開考室之後，成個人鬆哂，終於放下心頭大石。
夜晚就去左銅鑼灣間「松屋日本放題」餐廳道食，
話說都有段時間冇黎呢間食野啦，好開心喔！
食左超多樣，好飽好飽，幾乎想嘔。
有牛脷、雞軟骨串、芝麻雞翼、三文魚、馬刀貝、
炸豆腐、綠茶雪糕、天婦羅蝦、少少羊肉同烏冬……
同樣地，天婦羅蝦唔係幾好食，其他就推介推介！
選自：http://hk.myblog.yahoo.com/yatcheung_1997/article?mid=4624 |
