哈哈！呢個就係超級無敵梳乎厘啦！

外型有如人頭咁大，差不多成呎長，未食先興奮，熱騰騰，味道似紙包蛋糕，質地軟綿綿的，內裡有如燉蛋般滑溜...  

原來炮製呢個巨型梳乎厘係要用8隻蛋白，用人手打至企身，加入砂糖及雲呢拿香料再焗便成，冇加麵粉同忌廉，所以口感較清新鬆軟，由於打蛋時加入了大量空氣，吃多了也不會有過滯的感覺... 不過咁大盤焗到成個枕頭般 脹卜卜的梳乎厘，份量係足夠4至6人食o架，所以至少要等半個鐘，一定要落單叫野食時寫定先．．．

話說上次同包租公去太平館撐枱腳無Cally 份，令佢睇見d相流晒口水，所以今次趁住去睇動態版清明上河圖，順便帶佢去食番補數，今次我地去左油麻地分店，原來呢間舖同我同年誕生o架!

今次我地食左 "瑞士雞翼餐" 跟意粉~~

"雙肶餐" (豬肶併牛肶) 跟飯~~

仲有瑞士汁干炒牛河，好味過上次個濕炒．．

每人一個餐包，又有羅宋湯同海鮮湯，又飯又意粉，加埋甜品... 我地已經飽左 9 成，加上我地 6點鐘入去食，所以... 唔敢夾梗食，結果個梳乎厘咪食唔晒lor...

下次，我地要叫少d野，再食過呢個超級無敵梳乎厘同埋要食佢地馳名o既燒乳鴿同煙倉魚....

 P.S. 今日係二姑媽牛一大日子，睇住個梳乎厘當蛋糕先，下次同你去食... ~~Happy Birthday~~

上星期六睇完動態版清明上河圖之後，Cally 話要去朗豪坊間無印良品買野，順便行吓街， 難得佢 "出關"，梗係無問題啦！

一去到門口就見到呢個大招牌．．

啊！原來所長o既至愛黎左呢度呀！上到四樓通天廣場，人山人海，無論小朋友抑或小情侶，都俾 d Kitty 吸引住，影相影唔停...

原來 Kitty 一共有八款唔同造型，分別放o係:

大笨鐘

London Eye

千禧巨蛋

雙層巴士

郵筒 

d Kitty 有人咁高，又可以攬住黎影相，而家仲白雪雪o既Kitty，可能未到聖誕就灰晒唔靚lor...

雖然Kitty 唔係我o既最愛，不過我都覺得d公仔好靚，唔只咁近睇，仲可以摸同攬住影相tim，正呀!

所長你快d去睇啦！d Kitty 公仔真係好靚呀!

我地尋日終於睇左電子動態版清明上河圖喇!

雖然我地睇十點場，但九點半去到亞洲國際博覽館已經好多人，仲要排隊入場，好似以前係羅湖商業城打蛇餅咁，

好在唔駛十分鐘就入到去，果陣都未夠十點，有賺添！

一開始我地都係快速由頭到尾望一次，然後再細心逐ｄ睇，無論郊區，市集，以至城市，都慢慢欣賞，尤其日與夜o既分別真係好大，我見好多人都有做定功課至黎睇，特別係＂虹橋＂果度，ｄ人除左睇艘船點過橋外，就係睇個小朋友捉肥豬，每當呢隻豬走出黎，現場就會發出起哄聲同埋閃光燈係咁閃，真係眼都花。。。

見唔見到隻豬?

 Cally都拍低左呢一段，一齊黎睇吓：

其實睇電子動態版o既清明上河圖，真係要慢慢睇，望吓ｄ人係度做緊乜，我地影左好多相，而家俾少少大家睇吓。。。

漕船  過橋情景 打水BB睇醫生

一個鐘頭真係睇唔晒，我地都係俾ｄ工作人員拉住條繩迫吓迫吓咁行到出口，唔走唔得咋！

哈哈！今日我又放假啦，不過唔係去食，而係去睇...

我去左參觀香味花園，裡面種o既花全部都有香味o架~~

入口種左d好大朵o既菊花

旁邊種左金連翹

花葉鴨腳木

細葉龍船

一入去就見到薄荷 (真係想meet d葉聞吓)

再黎九里香 (係咪可以香到九里外o架)

迷迭香 (迷唔迷到o架)

九層塔 (九層??)

d花好似個塔但唔止九層bor?

真係暈得一陣陣@?@

又有福建茶 (唔知摘d葉番去沖茶得唔得?)

仲有鴛鴦茉莉 (邊種茶好飲d呢?)

米仔蘭都種左好多

呢棵係紫玉蘭

呢個究竟係佢o既 lum 定係已經開完花呢?

仲有雞蛋花（呢棵冇花 tim）　

枱高頭見到一棵好高大o既白蘭樹

突然飄來好香o既桂花味，終於俾我搵到佢啦!

最後見到兩棵 "呢" 係中間o既樹, 係乜野樹?

zoom 近d個牌睇清d先，原來係櫻花，不過冇花o既...好野，唔駛去日本都有櫻花睇

因為而家已經進入左冬天，好多花都已經開完，所以冇乜香味，等春天到左，我相信呢個香味花園就會散發出陣陣香味，到時再去聞花香，影靚相!

唔知你地有冇去過呢個香味花園呢？又知唔知佢係邊度o既呢?

咪就係呢度lor:

 係咪好近呢? 我唔駛使$就可以睇到櫻花啦!

嘩！香港地震呀！震央係后海灣，好近我屋企播！

天文台公佈今日2:42 pm 錄到輕微地震，震央係深圳后海灣，即香港天文台之西北約 30公里，震級為黎克特制 2.8 級。乜香港唔係冇地震o既咩?

當時我係公司用緊電腦打緊字，突然聽到 "隆" 一聲，跟住感到keyboard 震動，當時我心諗乜野大車經過出面咁震動呀? 轉頭睇即時新聞見到地震呢個消息... 心裡都有d驚...我有個同事都話feel到地震...

即刻打電話俾包租公啦，佢話係屋企聽到 "隆" 一聲，跟住覺得有d搖晃，書房個風鈴隨即噹噹聲響， 真係聽到都覺得好得人驚... 但佢又好淡定喎，完全唔驚咁，唔...淡定有$剩，我要向佢學習學習...

E... Cally 係學校應該都會feel 到，唔知佢地學校即時反應係點呢? 日後駛唔駛好似MM係日本咁有地震演習呢?