2011年12月31日（星期六）

由於我地未辦e-道，所以尋晚同今日出入澳門都排左至少半個鐘，真係晒時間！奉勸各位準備去澳門ｏ既朋友，最好辦左ｅ道先呀！

今日我地主要行程係去三盞燈個邊行下同搵食！打的話咁快就去到！

睇真ｄ，其實係四盞燈至啱呀！

首先去左＂小休咖啡＂食緬甸魚湯粉，湯底係以塘虱魚作膽，再加入多種魚加以熬煮，湯底好濃呈糊狀，超好食！

跟住去左＂光輝咖啡＂食豬扒包同飲奶茶，仲要等左一輪至有位，可見好受歡迎！尤其個包係軟包，又熱辣辣，令我地非常回味！加蛋就要俾多幾蚊喇！

 轉頭我地又去搵＂怡文軒＂呢間台灣餅食專門店∼

 呢款雪梅娘，有好多種味道，用薄薄的一層糯米皮包住忌廉及鮮果肉，食到我地lam lam嘴~

食飽飽後諗住打的去大三巴個邊買手信，點至行左幾條街都截唔到，ｄ澳門人話好難截架！當諗住搭巴士個陣又好好彩見到架的士，＂呼＂一聲就去到！

只見果度人山人海，仲有人肉廣告牌，宣傳大利來記豬扒包，因為係附近開左特許經營店，不過好似冇乜人知！

最後我地都買左幾袋手信返香港，又再計劃２０１２年行程喇！

2011年12月29日（星期五）

一早食過早餐後我地就去左新開果間美高梅酒店一遊，果度都好靚，間賭場都好大，我地當然入去參觀一下喇∼

之後行過隔離一號廣場，間間都係名店，一行出去外邊海濱長廊，係一幅３Ｄ立體畫，根據雜誌介紹如何擺ＰＯＳＴ，便可拍到立體效果了∼

玩左一輪後，我地又坐車去新開ｏ既澳門銀河一遊∼

啱啱睇到水廉表演，都幾好睇！

入到ｌｏｂｂｙ，除左見到好多薑餅人之外，仲見到呢幾個好踟跦俠打扮ｏ既人，攪邊科？咪人肉指南針攞！

呢度有個美食坊，食店較為平民化，不過要你先買＄１００儲值咭至可以買野食，用剩再去換番錢，真麻煩！

之後我地去左隔離官也街，一試沛記出爐合桃蛋糕，不過遲左少少，已經冇咁熱，好在味道也不差，起碼食完唔會飽滯！

行經已被封舖ｏ既大利來記，有ｄ懷念舊年係度排隊買出爐豬扒包同奶茶....

去完熊曲奇同日興堂工房買手信後，即刻坐車去關閘經拱北過珠海，因為我地會係珠海住，一過關就見到來魅力酒店，唔駛５分鐘就到，ｌｏｂｂｙ都幾靚，不過比起尋晚間房就細得多喇∼

酒店旁有個女人世界地下商場，好大，不過要 趕番酒店睇＂我的如意狼君＂大結局，所以行左一陣就走，乜都買唔到！

<待續>

一年一度澳門遊又黎喇！今次都係以食為主，不過盡量唔好重複食舊年去過o既地方，2011-12年最新版天書當然唔少得喇！

2011年12月29日（星期四）

原來去澳門無辦e道入境真係好唔掂，因為只開兩條通道，我地足足排左一個鐘至入到境，好多人都即刻排隊辦e道入境，但Cally又未成年，耍出世紙正本至可以做，冇計，唯有下次去澳門至搞

我地第一站即刻去食水蟹粥，今次唔去誠昌，去係荷蘭園o既皇冠小館，呢度o既水蟹粥同蝦籽竹昇麵都好出名架！

d粥好綿，蟹又多， 好食過誠昌，d蝦籽好香，麵又爽，真係好好味，值得下次再去食過！

跟住行左去新馬路議事亭果邊＂掃街＂，沿途d聖誕燈飾都好靚...

Cally要重溫上次食過o既檸檬車露.... 檸檬味+芒果味+紅梅味＝好好味！

轉頭我地又去帝鈞食碳燒胡椒餅，熱騰騰真好食，本來想食埋隔離潘榮記金錢餅，但起碼排成個鐘至買到，今次又要放棄，留待下次先試....

跟住我地又去食老字號明記食＂碟仔糕＂，只有椰汁，馬豆同朱古力3款味道，風行40年，仲要晏晝3點至有得賣，細細舊，唔會滯，正！

食極都未食飽，於是我地又去食瑪嘉烈葡撻，又要排隊....好彩熱辣辣出爐, 好味！

終於捨得番酒店了，今次我地住利澳酒店，入到房間嚇了一跳！好大呀！原來呢間係deluxe房，要$4,880一晚架！

休息一會後，又係時候食晚餐，今次去左祥記麵家，又係食蝦籽撈麵，白灼魚皮同金沙鯪魚球...

不過好失望，D麵又細碟又貴兼唔彈牙，碟底好多油，15分鐘唔夠就食完，仲係肚空空，唯有再過隔離街三元粥品專家再食過，一碗牛肉丸粥+一碗豬肉丸粥，大大粒肉丸，好抵食又好味！

本來仲想去添發食翅，可惜門口已有人龍，加上已經8點2，Cally要趕番酒店睇＂我的如意狼君＂， 唯有打的回府...

睇完電視梗係落樓下娛樂場拉下老虎機喇！點知....冇！！豈有此理....唯有再次打的去附近o既金沙酒店玩兩手喇！有冇贏?...輸少少喇！當食左兩碗翅算攞！

咁早番到酒店，好在有宵夜食：加蛋餅+士多啤梨~

＜待續＞ 

今日係圖書館聽講座，講者係著名作家君比，唔知你地有冇睇過佢寫d書呢?

佢寫左好多書架，多數係針對青少年而寫o既，包括<叛逆歲月>系列，<叛逆青春>系列，<夜青teen使>系列，<港孩心語>系列等等，經常獲選十大好書，十大作家榮譽，我同Cally都好鍾意睇佢寫d書，大姑媽都肥仔畯都有睇架！

不過佢d書我一本都冇買，只係係圖書館借黎睇！所以佢一有新書出左後，我就成日都要等等等，等圖書館有得借就即刻book黎睇，都幾吊癮架！尤其係＜叛逆歲月＞系列，已經寫左20本都未完，好在君比話寫多5-6本就會大結局，不過佢話<夜青teen使>系列會寫約30本，嘩！咪有排追?E+至出左4本咋喎?

個講座都有差不多30人出席，中學生居多，有d仲拎埋佢d書俾佢簽名。

最後佢送左簽名海報俾我地，我都搶到一張留念，仲同佢影左合照添！

話咁快暑假又完左，又開學喇，真討厭！

d學生又開始出現，明明lunch time，都係咁敲門！又唔到收工時間都唔入黎搵你，講野又大聲，又冇乜禮貌，真係俾佢地激死！雖然有同事應付佢地，但有陣時我都要出吓口同出吓手，好影響我做野嫁！

開學日仲要設宴招呼呢d大帝，算係唯一帶挈俾我地o既福利，因為例牌訂一大堆野食，次次都益左我地，食飽飽兼可以打包番屋企！今年d學生大食左，不過一樣大把野淨低！睇吓：

數吓我地打包左幾多野食∼∼有雞翼，餃子，三文治，春卷，咖哩角，雞串燒，菠蘿腸仔，吞拿魚卷。。。

嘩！每人可以分到一大盒燒賣∼∼

中間三個妹妹仔都係新同事，第一次又食又拎，睇吓佢地笑得幾開心！我都分到一盒雞翼，春卷，咖哩角同吞拿魚卷添，真係皆大歡喜！