早幾日睇左本書，裡面提及IQ題，一於考吓大家先...

1) 可樂加七喜 (猜四字詞語)

2) 益力多咩味?

3) 2000年奧運男子100米短跑賽事，邊個最先到達終點?

4) 連續放兩日假，猜一個地鐵站名?

5) 邊種行業最臭?

6) 達文西的密碼上面其實是什麼?

7) Keyboard 入面那個掣最靚仔?

8) 最多人喜歡聽的英文字母是?

9) 有乜野飯是最慘不忍睹的呢?

睇吓你地邊個d IQ最高先!

自從新年期間開左facebook a/c 後，唔好話寫blog，連入黎睇o既人都買少見少....

沒法喇 =_=""

二姑媽中左facebook毒，加上e+有私家機，晚晚上網修鍊，又周圍去偷魚，好唔得閒，莫講話睇我地d blog，連書都唔睇 tim!

帥軒尋晚又宣佈即日起唔用電腦，直至UT完畢，雖然冇人信佢講...

所長都係中左facebook毒，佢同阿邊個邊個去完泰國返黎只係寫左一日遊就冇左下文....

MM自從兩個朋友仔飛左去日本探佢，就掛住遊山玩水唔寫 blog.... 加上日本3月11日發生九級地震 + 海嘯 + 洩漏核幅射 ... 佢o既留學生涯都被迫提早結束，過幾日都飛返香港，唔駛再報導佢o既留學生活俾我地知攞...

我諗 facebook 將會成為我地以後溝通o既橋樑，大家d blog 都會變成荒田無人理，未開 facebook a/c o既你就唔知我地o既近況o架喇! 

今日晏晝去o左睇音樂劇＜說＞．＜夢＞奇緣．．．

本來一月已經有得睇，但時間唔啱冇去睇，一直等到今日，原來係最後一場，唔怪得成個會堂坐滿人喇！

呢個劇係由「四月．天」劇社演出，演員係一班住係天水圍o既師奶，又唱又跳...

雖然佢地唔係專業演員，但有板有眼，真係唔好睇少，因為佢地付出o左好多時間去練架，劇中只有兩個男演員，其中阿伯就好搶鏡，佢d對白抵死之餘，仲跳左一輪舞，勁呀！

劇中佢地一共唱左4首歌，全部由專人作曲填詞，寫出d人對天水圍好多誤解及負面報導，其實佢地呢班師奶都有夢想... 一齊睇最後一幕佢地唱「衝出這個圍」:  

連民政事務局副局長許曉暉睇完聽完d師奶心聲同夢想後都感動到喊唔停...

今晚星期日檔案都介紹佢地，唔知你地有冇睇呢？

大家仲記唔記得舊年我牛一果日去左邊呀? 咪呢度攞...

隔左9個月，上星期又輪到包租公去喇!

去到至發現唔同左，入口要坐自動電梯上去，因為下面做左停車場喇...

包租公今次主要去睇 "海洋奇觀"，話係世界十大水族館喎，一定要入去睇！

入口  

不過佢話有d失望，唔係想像中都 "正"， 等我今年牛一去睇吓係咪先

反而佢話新起o既人工湖仲靚...

日頭係音樂噴泉有片睇...

呢個全球首座360度、高達9米o既全景水幕夜晚就上演極具視聽震撼o既 "雙龍奇緣", 有片睇...

 包租公話係足本黎o架，所以條片至咁長，嘻嘻...

自從新校長上任後便經常攪唔同o既活動．．．尋日佢又請左前任警隊一哥黎教佢包餃子同煮餃子，我有幸抽中有得去食！

一去到就見到幾個報紙記者黎左，唔駛問梗係公關安排o架喇！

成個過程好似做show咁：

一哥真係好認真咁教．．．亞校長都好認真去學，大學好多高層都黎呢個俾面派對，嘻嘻哈哈一輪就有得食...

雖然只係每人一只煎餃同一只湯餃，但有其他野食，又一人一大碗上海麵，真係食到飽飽！

 (有牛展、义燒、雪菜肉絲、油菜)

公關仲印埋張菜譜派俾我地，食食吓有人謄粗粗走去叫一哥同校長簽名，我地成枱人都唔執輸走出去排隊，結果都攞到...

最搞笑係未夠鐘校長就走人，淨低一哥係度...好在佢大受歡迎，個個排隊同佢影合照，我地當然都有影喇，不過唔知官方會唔會晒番俾我地啫?

我發現原來一哥好高大威猛o架！我行埋佢身邊影相果陣，要 "鄂" 高個頭至望到佢個樣，唔通我真係咁矮? 我同事幫我用手機影左一張單人合照，可惜鬆郁濛，大家淨係睇吓我地點樣 "電燈柱掛老鼠箱" 好喇！

我地話下次再有呢d show o既話一定要參加，做吓fans食免費午餐，何樂而不為? 哈哈！