話咁快又一年，今日又係母親節！在此祝所有為人母親o既朋友都開開心心喇！

記得舊年Cally 送左個流心芒果蛋糕俾我，今年佢都係送芒果蛋糕俾我，因為芒果好味！

個蛋糕好新鮮，d芒果又甜，價錢又唔貴，真係好抵食！

包租公話要反傳統，唔好食雞，食鹵水鴨喎，好在都隻鴨都好好味！

在此特別祝大姑媽身體健康，因為佢今日好頻撲，為左肥仔畯，佢付出很多，希望肥仔畯冇事，快ｄ出院，唔使佢亞媽咁辛苦喇！

之前種o既大岩桐成日都係紅色同紫色，今次終於有新品種俾大家睇吓喇！

呢隻叫噴點岩桐，望真d...朵花入面有紅色點點，出面仲有大大點...

其實朵花開出黎應該係咁樣o架...    

成朵花都有點點，不過我呢盆花好艱難至種到，由蚊滋咁細棵種起，d葉好似指甲咁細開始種，種到佢開花，成三個月咁耐...

呢棵都係同事培植俾我種（左），我自己浸葉種出黎果棵（右）就中途死左喇！

咁辛苦先種到佢開花，我一定要將佢發揚光大，下次開得更靚更大朵至得！

尋晚去o左「新斗記」食晚飯，提早為Cally爺爺慶生辰，唔知大家有冇去食過呢?

果度有好多招牌菜，入口寫晒俾你睇，「海鮮價」一目了然，唔識睇你個事...

門口仲見到師傅係度燒乳豬，佢見我影佢就即刻E起棚牙望晒鏡頭，仲耍o左幾吓功夫我地睇...

佢地用大公雞碗筷，有d懷舊feel....

由於招牌菜太多， 我地都係食o左其中幾個：

金牌即燒乳豬  (唔肥、好脆)                   啫啫生菜煲 (好啫)

  薑蔥魚雲煲 (好香口、乾身)                   蜆介鯪魚球 (唔夠誠昌好食)

大澳蝦醬骨 (幾好)                                   上湯浸絲瓜  (普通o左d)

豉油皇炒麵  (炒得好靚)                           泥鯭粥 (至正！起晒肉、好甜)

仲有不含味精o既老火湯：白菜豬肺湯，唔錯！　

上菜好快，一個鐘就食完，因為佢地要做第二轉，結果明明訂o左壽桃，等o左好耐都唔見影，最後竟然話唔記得同我地訂，分明趕交枱，費事我地坐咁耐就真！真係有d失望！

自從開左 fb 之後，真係好耐冇黎寫野喇...

難得二姑媽差唔多日日都黎睇吓有冇野睇，又不停叫我地淋花剪草，唔好將呢度變左荒田，一於寫寫寫...

上星期北上修煉，成績已經出左，希望冇記錯大家o既成績喇！

雖然冇 MM 咁叻，科科唔係攞 A+，就係 A 同 A-：

大姑媽： A+ (一枝獨秀)

董事長： A (穩打穩紮)

所長： A- (底子深厚)

二姑媽： F (仍需努力)

 我： D (頗具天資)

亞邊個邊個： E (大熱倒灶)

Ponchi Papa：U (超級爆冷)

一睇就知今次修煉成績如何， 當然有人歡喜有人愁喇...

二姑媽要繼續補課，我要多D做補充練習，Ponchi Papa 要多d北上修煉...只要持之以恆，下次出黎o既成績一定唔同晒！

尋晚同馬來西亞黎o既親友晚飯後去左黃埔新邨「芝麻綠豆甜品屋」食糖水，原來果度好多明星幫襯過，牆上貼滿晒相，不過我一個都撞唔到 =_="

我食左個話係全港首創紅磡名牌甜品「芝麻蛋白燉鮮奶 」，就係呢個喇...

枱面仲寫左教你點樣食先至最正喎...

我跟足指示去食o架，好滑，唔太甜，中間收埋d芝麻糊，都好好味，價錢又唔太貴，抵食過 XX 涼粉好多...

Cally仲勁，食完楊枝甘露後再食o既又係首創...櫻桃小丸子...

雖然d香蕉係迷你左d....不過Cally一樣食到 lam 晒嘴話好味...正一為食貓！