尋日所長一見面就話我知阿 "邊個邊個”話我種果棵唔係發財樹，懷疑我種大麻樹  (5塊瓣喎)，唔係呀馬，我邊有咁大膽種呢d野，分分鐘俾人拉o架！

嚇得我返到屋企 "咋咋淋”數下d葉有幾多塊瓣先… 好在，細個d係5塊，大個d係6塊，咁先冇咁驚！

  (今日影的肉照)

仲有，原來發財樹會開花o架，我真係未見過，咁啱今日係人地個blog 見到。貼出黎俾大家睇下啦！

照片來源:  http://hk.myblog.yahoo.com/jw!hKR5U1maBQRVD2P35.BdiaBY/article?mid=4582

網主說佢棵發財樹移植落地種左5年至開花, 仲係幾個鐘頭就謝左，唔知我果棵 ... 品種好似有d唔同，而且室內用盆種 ... 究竟要種幾多年至開花呢？

哈哈... 所長叫MM問我佢嫲嫲d野喎，仲話我有好多口頭嬋都係跟佢嫲嫲學返黎，真係"咬"晒頭啦!有咩???

我諗最經典咪 "不求引" law ... 乜野黎?

我講左N年"不求引"， 直至某日我見到正確名稱原來係 "不求人"，真係嚇左一跳，仲笑大人個口 tim...原來我滿口鄉下話 ...

MM嫲嫲真係好勁架，千祈唔好睇少佢！所長話佢唔識字，淨係識講唔識寫，不過當年佢有病之後，要學寫數目字， 因為佢每日要自己磅重同量體溫，寫落張表度俾醫生睇，佢好俾心機學寫字，d 字仲越寫越靚 tim!

佢計數同cho錢真係好叻架，想當年董事長d麻雀癮好深，日日收檔後就去開檯，夠鐘食飯都唔見人，MM嫲嫲就會叫我打電話摧佢番黎，有時仲親自打，係電話度鬧到拆天， 哈哈！好彩呢樣野淨係遺傳左俾二姑媽咋....

女人睇數點都好過男人o既，就係咁養大左我地6條化骨龍，至於我地鍾家成員學到幾多成就各有不同，不過就學晒董事長d打麻雀真功夫，個個都有番咁上下功力！嘻嘻！

大家都知我鍾意種花，唔好話我讚自己，成績真係唔差o架！

上次俾大家睇過d大岩桐花球，今次俾 d新o野你地睇：

呢棵樹好似棵聖誕樹，吊晒d聖誕鐘係度，望落去真係好靚o架！

(張相係上星期影o既, 而家仲多聖誕鐘呀!)

佢個名叫做角桐草，又名花貓 (個名有d九唔搭八?)

我由佢一吋高小苗仔兼冇根種左成兩個月以上先有今日咁o既樣咋！ 

另外呢棵發財樹都係由細細棵種起，

 (用$10買佢番黎果陣, 得最矮果幾塊葉咋!)

(又係上星期影o既, 而家已經多左三塊葉以上, 仲一塊葉比一塊葉高!)

家陣已經半個窗台高，我換左個大盆俾佢，佢仲大得快左=_="，遲 d可能要擺落地下，再遲 d頂天花o既話， 都唔知點算=_="""，唔通又係要佢 "移民" 去所長屋企住？

唔.... 佢"發"成咁，係咪暗示我都即將"發財"...係就發達攞!!! 哈哈哈!!!

我個名讀 "咩" d 叫 "種樹難"，我要平反，種樹 ....... 一 d都唔難！

哈哈！呢個暑假我請左個家務助理呀！對於包租公黎講，梗係話正啦！何況呢排日日都咁熱，有人幫手做家務，汗都流少幾滴！

我呢個家務助理，每日上班時間唔定，做幾多個鐘又唔定，因為係每件job計錢o既，每日報告我知，再由包租公確認，即日出糧，一家便宜兩家著，大家開心，而且又不受最低工資監管，抵到爛呀！

佢最主要幫我煮飯，洗衫，long衫，收衫同摺衫，厭惡性o既工作，例如洗碗，洗馬桶，倒垃圾呀就唔做，寧願賺少d，無辦法啦，我呢個家務助理係果種賺錢買花戴o既人，d錢賺黎買自己o既心頭好嘛！

你地有冇需要請我呢個家務助理呀？佢話做到８月尾咋，有興趣人仕，可留言於本日誌，睇下佢想唔想幫你地打工？

話咁快就七月中, 又係d學生放暑假o既日子, 佢地就開心啦, 有一個悠長假期, 日日可以瞓到 "黃天百晏".....

Cally就係一個好例子, 第一日放假就瞓左差不多12個鐘! 嘩! 對我黎講, 簡直係冇可能o既事!

雖然我o係學校做, 不過我做果個部門一年365日都冇停手, 個個月都有唔同o既野要做, 7月同8月d學生放假, 我地就大把野做, 好難放長假, 我已經比同房o既同事好dd, 可以連放幾日返大陸玩o下... 冇計啦, 鬼叫你係打工咩! 不過, 只要每逢月尾見到銀行簿仔多左d $$$, 就知道唔可以冇左呢份工o架啦.....

d學生一放假, 我最鍾意流連忘返o既圖書館就會人山人海, 乜書都俾佢地借晒, 好在我有個好助手, 日日幫我check住有冇新書預約, 幫我book d 新書黎睇咋! 佢仲幫大姑媽 book 書 tim!

佢係邊個 仲使問, 梗係Cally 啦! 因為佢都係書蟲黎o架, 嘻嘻!