今日晏晝突然落左場大雨, 又行雷閃電同刮大風, 都幾嚇人!

點知放工時天空中上出現了一條超大彩虹, 我地成車車友都嘩嘩聲, 個個頭鄂鄂望向天空, 有人仲用手機係咁影相, 我都想影, 可惜冇相機係身, 手機又冇影相功能, 心諗不如打電話番屋企叫Cally 影, 但佢實話唔駛旨意=_="

當我番到屋企問佢有冇見到呢條超大彩虹, 點知佢話有, 仲影左相tim...^o^

哈哈,真係心靈相通啦! 一齊黎睇下佢o架傑作:

條彩虹太長啦, 幾張相連環影都睇唔晒, 因為條尾俾對面樓遮住左, 影唔到, 真係有d可惜 ....

後記: 今日(25/6) 睇蘋果日報, 原來當時出現了雙彩虹, 不過因為雙彩虹係出現係尾部, 就係俾對面層樓遮住左, 所以睇唔到!

從蘋果日報下載出來給大家看看:

唔知點解呢排中大咁黑仔, 新民主女神像單野都未擺平, 又爆出收埋個孫中山銅像係貨倉幾個月,真係失威...

現任校長俾人鬧餐死, 仲將個波拋俾下任校長, 梗係啦, 佢做埋呢個月就走人, 同新老婆印印腳嘆世界, 不知幾爽, 晨早已經請左個常務副校長番黎打骰, 乜都唔駛做好耐啦!

其實d學生又有d過份o既, 未經許可或商討,就漏夜搬入黎中大, 先斬後奏,當然有人支持亦有人反對啦! 之不過中大o既反應又唔需要咁激, 人地港大支國殤之柱都擺左十年啦! 呢個新民主女神像同天安門屠殺浮雕咪好好地搵個地方擺好佢任人睇, 大方d怕乜喎?

趁住佢地未俾人趕走,我拿拿淋幫佢地影番張相先

新女神"高大有型"

想當年八九六四真係好震撼世界, 我都留起左好多剪報, 仲買左一只小民主女神像tim ~~

舊女神"嬌小玲瓏"

呢份係中大學生報响八九年六月出o既號外~~

仲有10 周年同17周年紀念刊物~~

原來時間過得超快, 已經係21年前o既事,果陣唔單只未有Cally呢個人仔, 連包租公係乜誰都唔知啊!

90後o既Cally, 帥軒, 肥仔畯... 俾你地見識o下啦~~

話咁快又係父親節! 老一輩o既人好重視o架!一定要慶祝慶祝, 咪大棚人坐埋一齊食一餐, 即係好似我地董事長咁, 一吹雞, 就開兩圍啦! 都好o既, 俾機會我地聯誼下嘛, 哈哈!

Cally 都好識做o架, 上個月母親節買左個芒果流心蛋糕俾我, 今次佢話請包租公食晚飯算lor, 唔重覆買蛋糕呢招, 所以我唯有攞番上次張相出黎, 貼俾包租公睇, 當父親節禮物la, 嘻嘻...包租公, happy father's day!

我o既"豪宅"內同外大家都睇過啦, 不如帶大家遊下公園~~

不過唔係濕地公園bor, 係龍園, 係根據蘇州果d公園模式建成o既, 跟住我行啦 .....

呢個龍園好大o架, 先睇入口, 大大個招牌, 又有logo, 又有大石, 慌死你唔記得個名

再黎紋身大柱看門口, 真有氣勢! 拍得住中大圖書館門口果舊石!

裡面亭臺樓閣, 小橋流水,景致怡人, 得閒觀賞下d錦鯉, 真係寫意啦!  

裡面d燈同垃圾箱都與別不同, 呢d 就係特色啦!

最最特別o既係呢度種左一棵瓦勒邁杉, 又名恐龍杉, 極品黎o架! 而家細細棵, 第日可以生長到 80-112呎, 非常有價值, 所以日日有"食蕉"巡邏, 驚俾人偷o架!

呢度叫踏星, 好明顯俾你行下石春路, 唔知痛唔痛呢?

呢個叫舒懷, 俾你入去涼亭舒暢下,小睡得唔得呢?

呢個叫飄香, 咁又係乜野意思呢?

上個月貼左我種o既花俾大家睇, 當時最靚o既係蝴蝶蘭, 而家開得最燦爛o既變左係大岩桐了...

五月尾果陣, 仲只係含苞待放,

跟住就一日一日長大,

塊葉仲大塊過我隻手掌

 嘩! 呢兩個大花球好勁, 有超過20 個 lum,

除左紫色, 仲有紅色, 都開左好多花

呢個咪上次係塊葉度生出黎o既苗仔, 唔知種唔種得大呢?

再黎張大合照

對比起舊年果兩個花球, 你又覺得如何呢?