尋日好開心呀! 我過左一個好特別o既生日, 就係自己一個人去左海洋公園啦!

嘻嘻...

香港人o既福利, 唔駛俾入場費, 仲有生日優惠劵tim! ＜（￣︶￣）＞

冇去兩年, 好多野唔同左啦! 最正係新開o既海洋列車, 3分鐘就由山腳上到山頂, 又有冷氣, 好正啊!

仲有新開o既中華鱘魚館, 可觀性都好高!

山腳差不多重建完, 亞洲動物天地裡面有新建的熊貓山莊, 鱷魚潭,金魚寶殿等, 好有新鮮感, 連空中飛人都搬埋落黎tim!

由於又大一歲, 所以任何機動遊戲都已經冇膽玩, 加上排長龍, 咪搞我啦!

所以我淨係欣賞雀鳥劇場, 高台飛魚大匯演, 海洋劇場同埋雜技表演, 不過d乜館物館都行晒睇晒, 好正呀!

出年生日又可以去啦, 因為新建o既夢幻水都2010年底揭幕,世界十大水族館之一播, 梗係要去睇啦!

夜晚包租公同Cally仲買左生日蛋糕俾我, 真係回味無窮.....

各位好嗎? 今日係乜野大日子?

我牛一呀? 哈哈! 有乜野恭賀o既說話俾我呀? 快d留言啦!

牛一梗係要放假啦, 唔好返工做到氣咳, 影響心情嘛!

咁去邊度慶祝好? 一於去 ..... 唔講住, 聽日先話俾你知!

不過, 生日禮物已經收左好多份,

包括二姑媽送o既龜龜盆,

Cally 送俾我o既龜龜禮物, 

送俾自己o既龜龜袋, 好實用啊!

 包租公送o既大利是同請我食龜包!

董事長同Cally 爺爺未俾紅封包喎, 唔得, 一定要後補!

 MM, 所長同ponchi papa, 我成功為二姑媽上載左佢去日本d相啦!

用左我5個鐘頭呀!

用公司部機先咁快咋!

成350張呀.... 快d開email睇啦!

第一個email係邀請你登記,第二個有張名信片至真呀!! go go go....

呢個禮拜好鬼熱, 熱到有人中暑tim, 真係鄧嗰個81歲阿伯唔抵, 為了遵守停車熄匙, 就連命仔都冇埋 ...

咁熱o既日子, 一係o係屋企開行冷氣嘆, 一係搵有冷氣o既地方避暑, 我當然唔會"哩"係屋企啦, 包租公就諗到一於去會所嘆冷氣....

  (見到包租公嗎?) 

嘩! 原來咁多人同我地一樣, 個個坐晒係度睇報紙, 有d仲瞓著覺tim...

我地除左睇報紙之外, 仲帶左幾本書去刨, 最熱o既三點至六點, 就涼浸浸咁過左啦!不過有人就好堅持留係屋企唔出街, 淨係睇書同睇碟, 寧願扮宅女, 果個咪係 Cally攞!

我係會所仲發現到一樣野, 睇o下:

好似好抵喎, 咁熱o既日子, 有得食又游足一日水, 如此消磨一日, 唔怪得好多人book啦!

大家都黎左我呢個小小世界一段日子, 但有冇諗過點解我會用隻狗而唔係用隻龜做我個 trade mark 呢?

(咁多隻用邊隻好呢?)

其實我除左鍾意龜之外, 我都好喜歡狗o架!最鍾意個d大大隻, 個樣又傻更更, 例如八哥, chow chow, 大笨狗, 金毛, 真係個樣越蠢越傻便越可愛!

我細個果陣住村, 屋企又養貓又養狗, 記得董事長有一次買了一隻好瘦o既狼狗返黎, 叫做樂都, 日日俾d雞腸煮粟米佢食, 食到佢好強壯, 然後同屋企d唐狗配種, 就生o左好多混血狼狗出黎看門口, 防賊兼看住d雞,真係唔打得都嚇得!

不過最唔開心就係有一次董事長劏o左我心愛o既狗仔"小白"去孝敬d親戚 (呢, 好肥果個呀!) 令我喊餐死,自此, 我就唔食狗肉啦! (細個無知乜都食!)

我屋企仲有養貓, 又係養到佢肥騰騰兼雙下巴, 塊面肥do do, 因為佢除o左食魚外, 菜, 蝦條, 薯片, 乜鬼都食, 成日咋嬌, 朝早又識得"貓"我起身, 所以我叫佢做亞嗲 ,屋企人仲講笑話隻貓係我老公 (o甘都得?? ) 不過佢有一日被屋企隻大狼狗咬死o左, 令我非常傷心, 之後都冇再養貓了!

而家我住果度唔准養狗, 只准養細路仔, 唔經唔覺都養o左十幾年lor! 養貓同狗有個好處就係唔會"駁咀駁舌", 又可以打同鬧, 但養細路仔就唔得, 一唔打得, 二唔鬧得, 又會 "駁咀駁舌", 真係好難教, 你地話係咪?