又放暑假喇!其實年年都放架啦,不過今年就好唔同喇,因為我再唔係以一個學生身分去放暑假了.

呢排既天氣真係熱到想死.呢兩日就俾阿太陽伯伯當荷包蛋係咁煎,煎到燶左.一,二,三,燶左!

遲下到左8月都唔知點算.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

年頭未考A-LEVEL果陣時,係咁同自己講話放棄,因為果陣真係唔想再讀落去.好喇,到左真係考喇,又係咁狂溫書,死做爛做,塊蓆都爭D俾我磨爛埋咁滯,卒之俾我磨左個FULL PASS出黎.

其實RESULT RELEASE之後,我就係咁諗,究竟繼續讀落去直到磨爛塊蓆為止,定係開始人生新階段,即係做野好呢?

其實我直到而家都仲係15/16,囉囉攣好鬼唔舒服,但係我真係好想有個DEGREE讀下.可惜成績太差了.直到而家都仲未有U通知我叫我去INTERVIEW,其實自己都知機會微啦.唯有一句嘆自己當初何必要放棄自己呢?!

又或者其實自己根本未去到果個料子,會考就算考得再好都係徙氣,就算當初中五放榜果陣我都係咁話,基本上我冇乜為自己既會考成績特別興奮同驕傲過,因為我好清楚,根本係煙幕,係假象.會考在我眼中,根本係一個越來越冇公信力既考試,質素一年差過一年,阿豬阿狗求其去讀下都可以執個合格番黎.上到黎中七先係考真功夫既重要關口,結果亦都證明左一切,會考考得幾好都唔係真的.所以,考到呢個成績我應該慶幸,好彩,而唔應該再奢望有更好既成績.因為,自己知自己既料子去到邊度.

其實最令我開心既就係我地班今年UE既成績比起上年黎講大有進步喇!足足有6個咁多呀!雖然唔係好高成績,但係合格已經好難得喇.點解?因為我地大家會考上黎既,英文都係得個D或者E,上到黎A-LEVEL都仲可以合格之餘,仲有人拎D呀!證明我地係KEEP到個水準架!勁呀!7A!放榜果一刻知道左真係好感動架!所以我真係唔可以唔讚下我地喇!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

一切等JUPAS放榜再算吧.暫時唔想再諗住.

今日冇咩做.

晏奏番左朱記拎本同學錄.

大家唔使奇怪,係,我番去拎左同學錄.

其實前幾日當我仲訓緊既時候,師奶鄭已經打左俾我,叫我forward出去叫大家番學校拎同學錄,只不過我,第一,唔知邊個有訂,如果打俾某人但佢又冇訂就會好奇怪;第二,呢幾日其實唔得閒;第三,原本諗住透過呢個日記同大家講但都因為唔得閒而冇打到.響度講番聲sorry.

如果大家見到我呢篇日記而你又有訂同學錄既就可以番朱記拎架喇.同時亦都唔該有睇呢篇日記既人將個消息forward出去,無論你有冇訂都好.唔該晒.

首先要同福仔講聲生日快樂先!今年係我地相識7周年喇!哈哈!

今日約左福仔行街shopping,咁都arm既,番工咁耐都好少買野,加上正日生日,都應該要獎勵下自己既.

同佢去sogo買香水先,跟住去左dusty買衫買褲,收穫唔錯!

跟住同佢出番望角,今次到我買喇!買左條牛仔褲呀!開心........

跟住join左lily同阿蘇,就行過去太子既大排檔度食野喇!pinky同阿坤到左添喇!之後小小都放工過埋黎喇!

食大排檔點可以唔飲酒架?!

班友無啦啦話玩遊戲,罰飲酒,唉.......

一向自命冇乜運氣既我梗係成日輸啦!我同阿蘇輸得最慘,照pinky估計,我個人應該飲左3枝左右!唉.......

飲完之後個頭好鬼痛,好暈,差d想嘔添,好彩最後都冇.不過都好鬼辛苦.

不過咁開心既日子,辛苦d都冇所謂啦.

跟住大家過番望角打機,打左一陣就走喇!

我同福仔都好疲累喇!因為我地兩個晏奏開始已經直踩.

今日壽星仔話事嘛!幾歹都陪你啦!

至於飲酒,梗係要俾面啦!辛苦d都唔緊要啦!幾多都陪你飲!不過.......唔好成日搞呢d咁掯既wine gathering........會死人的!

原來唔經唔覺已經響HKJC度做左半個月.當然,唔係日日番.

真係估唔到,一個唔嫖唔賭既絕種超級清純小男孩,我,Danny仔,竟然會響JC度做,幫人買飛.不過,始終我是我,原本既我係唔鍾意賭既,而家既我都會係.

唔計今日,仲有3日就RESULT RELEASE,話緊張,其實又唔係太過緊張,但係話一D緊張都冇就假既.唔知點講,個心總係有少少期待既感覺.

高分實在唔敢望了,但願到時唔好輸得太難睇.

學做人,其實係一個人一生人入邊,對於終身學習,既一個最重要,最長久,跟足你一世既學習課題.佢好奇妙,你越係想擺脫佢(我相信人人都想),佢就越係要纏住你.你會討厭佢,好憎佢,但又卻要與它作伴.你對住佢,會透唔到氣;對住佢,你會充滿無奈;對住佢,你會感到無限既煩惱和焦慮.點解?因為你唔知點先至可以處理好佢.你對佢放寬,佢會變得橫行無忌,到最後甚至會令你陷入萬劫不復;你對佢嚴厲,其實亦都係懲罰自己,你既身心會遭受到耗損,因為你會因為對自己既過份壓抑而終日悶悶不樂.要完完全全將佢握在掌心中,相當係天下間最難的事.你同佢既角力過程入邊,你贏既機會係近乎零.你,完全係處於被動既狀態.在呢幾年入邊不斷學緊,到而家我尚未有見到任何既成績.至少,自己既心未能完完全全洗滌.可能,人心根本就係一樣充滿污垢的物質.你越想將佢洗滌,佢就越係變得黑,係越洗越黑.

人既一生我會將佢分成3個階段,頭尾分別係兒時同埋老年時.我相信呢兩個係人生最理想的階段,中間呢?係最苦澀,最辛酸,亦都充滿傳奇,帶俾你無限既高與低,平坦和凹凸.呢個階段係最難捱的,偏偏呢個階段就佔了人生的2/3.真係可笑,亦都好諷刺.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

當全城冇晒壓力既時候,我呢一刻卻感覺到呼吸越來越困難,慢慢地喘氣加速,直至抖氣既聲音變成sum to infinity,個電路圖逐漸converge,直至成一直線...........