AL已經考晒,不過仲爭clc一張oral paper.不過,我都當自己考晒了.

今日繼續要考,不過係ce.上年都有報到,不過表現簡直令我想殺左自己.既然今年AL,咁唔爭在報買埋ce,一次過考晒佢,以後唔會再掂公開試,今年係最後一年.

今日考既心情係前所未有咁輕鬆今日第一科ce既係英文既syl.b既paper 1 & 2.今年既paper 1超難,全部題目都唔易作.最後唯有退而求其次揀左第2題黎做,係寫letter.唔好以為letter易作,今年既letter一樣唔易作.但其餘兩題更加難作,所以唯有揀左佢.最後字數一定夠,不過寫成點,我自己都唔係好敢諗.都係平常心吧.過左半個鐘到就考paper 2,呢張係我4張卷入邊最唔驚,最有把握同最鍾意的1張.今年出得都係唔難.直覺上覺得好似淺過上年添.上年衰左,希望今次會好d.做完之後,雖然我唔知個結果係點,但係就好肯定一定做得好過上年.希望係啦!今年既open cloze同上年一樣,又係俾左個字頭你,跟住叫你填番個尾落去.上年就係衰左.點知今年又係咁!一睇,啞左.你以為俾左字頭d考生會做得好d咩?完全唔覺囉!唔俾反而仲會做得好d!我肯定!好彩今年個proofreading冇玩野!如果唔係我一定剷到個出卷員上天花板!總括黎講兩張卷都做得不過不失,至少我知道一定好過上年.希望係啦!唉.....禮拜六要考listening,我最驚,最憎,最唔掂既一張卷.希望會得啦!個oral又係,上年就係衰左.激死.今年一定要好過上年!

考完之後,突然間心血來潮不如約隻龜撐台腳,所以最後去左.不過唔係撐台腳,有其他人.原來今日有兩個實習社工last day,所以佢地約左d老師出去食飯.就係咁,同左d好耐冇見的老師一齊食lunch.

原本冇諗過會入番朱記,因為約隻龜都係響出邊,冇響學校門口.點知食食下,某個老師同我講佢話有野俾我,所以叫我番去.所以最後都係番左.其實佢果陣時監考我busi果陣都已經話有野俾我.咁而家仲好啦,唔使再特登番去一次.太耐冇番過去喇!番到去既感覺真係好舒服.一黎係考完晒試啦,二黎又見番d老師,真係好開心的.

同阿sir上教員室拎野,見到鄭太,好開心呀!不過佢咁arm又要上堂,so傾唔到偈,只係hi & bye.拎完野之後,跟住就開始搵d老師傾偈了.首先上左去library搵彭彭,不過傾左兩句,有d可惜.跟住落去搵阿謝,順便隻肥牛何見到我所以俾番我未走之前俾佢寫既紀念冊俾我.唔該晒呀!跟住同阿謝傾左好耐.講番考試既野啦,講下近況啦,講左好多好多.佢依然都係咁可愛,仍然係我心目既阿謝.跟住第二個就係阿pope喇!佢都依然係一個咁nice既鬼佬.又係傾左好耐,同佢傾完之後真係好舒服.跟住就係.....見到vicky,傾左唔係好耐,不過又係好舒服.佢都算係一個幾支持我同幾照顧我既老師.雖然佢冇教我,可以話係從來冇,但係我真係好鍾意同佢傾.跟住見到阿fok啦,又係講下考試啦.今次acc既paper 1比我想像中好,但係paper 2就真係唔知.仲未有得拎lcci既admission form囉!跟住撞到富華老師.真係好好傾.實在係太好人了.傾左好多野.講下人生啦,講下未來點呀,咁囉.跟住見到肥許!實在太正!呢個一定要見!又係傾下考成點,jupas點,不過好唔開心因為同佢講左我ms衰得好緊要.跟住又見到阿葉啦,傾下入u阿,講下考成點啊,講下今日會考點呀,咁囉.傾完晒之後,個人真係覺得好滿足.尤其是見番d我鍾意既老師,更加滿足.因為真係好想同佢地分享番考成點.今日見完之後都唔知幾時再見了.因為真係唔會成日番去.

跟住走喇!多謝你地同我傾左咁多野呀!我唔會唔記得你地架!

P.S.1:今日其實都見到其他老師,不過傾唔到太多.人物有:miss lo,志華老師,肥牛何,何榮蔭老師,湯太,容副校,連sir,miss yu.我同樣會記得你地架!

P.S.2:唔該晒肥何你幫我寫張紙呀!你寫既野我會記住.

"Treat a friend as a person who may someday become your enemy; an enemy as a person who may someday become your friend."

P.S.3:每次睇番大家寫俾我既野我都覺得心情好複雜,希望呢份友誼能夠真正在我們心裡長存.老師們,你地都係呀!

今日一個字,累.

今日凌晨12點幾訓落去,但係兩點幾自己起左身.諗住"典"一陣間都會再訓得著,點知唔係!!!!超想死,竟然一路響張床度碌黎碌去仲要越碌越精神!!!!!!搞到6點幾都未訓得著.跟住索性起身洗面整野食,跟住出門口考busi!!

成日都話中文睇唔明,要轉睇英文,唔係我特登晒英文勁,而係事實真係咁!因為今次真係出事!由呢一分鐘,我憎爆中文!

事源做paper1果陣既短題目有一題出現一個咁既名詞:認沽期權.第一個反應,什麼來的?!當時響度估,究竟係Warrant定係Future呢?個"沽"字係講出售,但認Warrant係買入股票,有d唔同,後者似d,所以揀左後者來答.跟住直到晏奏考完paper2果陣打番學校問阿謝究竟"認沽期權"係咩黎,點知真係Warrant!點解我可以咁好運?!買大細二揀一都可以揀錯?!個Probability高達50%!都揀錯!你好野!但Warrant既中文唔係"認股權證"咩?點解會變左"認沽期權"我唔知?蝦我唔識睇中文?!!你竟然將個名轉左佢黎陰我?!過份!如果我知係認股權證我一定識答!唉!!!咁就冇左5分!你好野!如果個問題括住個英文名稱我實知係咩黎囉!好唔抵!輸得好唔抵!今次做錯唔係因為我唔識!而係你玩我文字!你好野!

今日兩張卷考得好唔好我真係唔敢講,因為呢科咁既死人野你做左自己都唔會知arm唔arm!

但係今日我真的盡了力,應做既都盡量做晒,唔識既真係冇辦法.今日坐足6個鐘,直到收卷的一刻,真係盡做,識唔識,有理冇理,寫左落去先算.因為你唔會因為我答錯而倒扣我分!咁我點解唔搏?我真係寫足6個鐘.隻手幾乎廢左咁滯.

今日真係盡左力架喇!做到最後果一刻先走.不過都係果句啦,busi呢科如果我有幸合格既,一定係好運;如果唔合格既,其實亦都預左,我相信我到時可以好冷靜.

今日個頭有d痛亦有少少暈,聽日唔知起唔起到身.但係聽日希望可以溫到accounts,雖然我真係好累.

今日又係溫書日.

相信大家都好奇怪點解我個標題會咁奇怪.但以上兩個名稱係分別由一個老師&一個學生既專用名詞.當中既意義亦都只有呢兩位師生先會感受最深...........講講下,好掛住呢個老師.

今日溫既Business Studies.我拎住堆past paper連答案響度睇,希望搏佢番炒,記得幾多得幾多.作用有幾大呢?其實自己心中有數,不過睇下都係想安心d遮.其實都係roughly咁睇,記得幾多自己知.其實你問我係咪唔識bs入邊既理論,其實又唔係丫,但係一考就死.可能呢科係唔適合我呢d思維狹窄既人去讀.我都係適合讀d一成不變既科.(以上講既野係承接我上一篇日記)

聽日就考,但係而家既我彷彿響度等死.唔知點解,緊張既心情一d就冇.可能都讀左bs呢科成年半,成功與挫敗,高與低既情緒我都經歷過,所以而家真係冇咩緊張.有幸可以pass既,我只會嘆好運;考得唔好,亦都係意料中事,相信到時我會好冷靜.

而家既我,心情非常平靜.bs?!平常心吧.

尋日考完m&s,結果如何已經唔想再提.

今日留左響屋企.其實原本同自己講要出去溫書的,不過最後因為訓晏左既關係而冇去到.

訓醒之後成個人都仲係好累.好清楚自己咁既狀態溫書一定溫唔入腦.所以都冇咩點溫.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今日星期二檔案係講補習,我睇左.節目入邊教育界既人士同補習老師拗得好厲害,其實各有各對啦.傳統既教育界要求學生要全面發展,但現實唔係咁.而補習界就以現實為目標,但就同教育既理念背道而馳.其實,一句到尾,學生係最終既受害者.

我一路睇,一路諗,其實自己都係其中一個受害者.身邊既朋友個個都話我考會考考得好好,好叻,但其實我覺得自己正正就係其中一個高分低能的學生.

有一個大學既spokesman講得好好,唔應該怪晒補習社,要怪既應該係而家既教育體制,因為高分既人先入到大學,呢個係不爭既事實.就算你係高分低能,佢都會收你.你就算個人幾有創意,好多ideas,但你低分,大學就係唔收你.呢個就係現實.

有個補習界既老師亦都講得好arm,呢個世界出到去有邊個唔係睇你張沙紙?呢個亦都係現實.

而呢個咁既現實只會促成d學生求學只會求分數.遺忘左教育既真正意義.

但教育界就講到好好咁,話唔應該有d咁既思想,學野要全面,補習求捷徑係唔arm.其實我都好認同,因為教育就係要咁,但係現實呢?唔通唔使理咩?佢地冇提到呢個問題,亦都冇提出建議既解決方案.呢個我有少少失望.

睇完個節目之後,我個心開始有d亂,開始諗好多野,因為我好清楚補習同教育存在好多既矛盾,而我自己都曾經去過補習.我開始反問自己,究竟讀會考同預科黎做乜?好似都係為左考試.為左考好d成績.結果,我中五果年真係做到.但我知道,除左讀書既野,如果你問我其他觸覺既野,我諗我好多都唔識.

個節目入邊有一個對比既case,令我感受好深.A學生高考果陣PURE MATHS拎A,B學生側拎D.前者當時有補習,後者就冇.結果上左大學,A學生要重讀大學二年級,後者已經做到全給第一.咁證明左D咩?大家可以諗下.而我既結論就係,大學係一D有多方面思考既學生先會讀得好,而大學既收生制度則係係相反.我覺得好悲哀.我諗如果我有幸上到大學,我同A學生只會係同一命運.

我越來越亂,究竟我讀會考同高考係咪錯?

但係大家可以放心,黎緊既科我會盡力去考.

今日,係我中七生涯既最後一日;係整個中學生涯的最後一日.兩年前考會考已經好唔捨得,但係始終都唔算係真,因為最後都冇走到.但今次唔同,今次話走係真係走的.實在太唔捨得喇!

好多人都唔鍾意朱記,因為朱記唔係好好,呢個事實我唔會否認.但係就算再唔鍾意,始終都係讀左兩年,而且開心既一定多過唔開心,淨係呢樣就已經足夠你去唔捨得.間學校唔好,緊要嗎?相信答案係肯定的.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

尋晚拎定晒相機,充好晒電,今日要拎番去影相.

朝早班主任節,師奶鄭話學校係唔俾帶相機的,仲話學校果邊要佢特登搜我地書包.我心諗正一白癡的,last day都唔俾人帶相機,有病的.不過阿太話佢唔打算搜,只係叫我地唔好周圍走俾人睇到.thanks呀!

跟住busi,冇上堂,阿謝都好識做.我地係咁同佢傾偈,好開心.

跟住ue,都係冇上堂,鄭太好有心,派左兩份exercise俾我地,一份c一份e,連埋上次份c總共3份.thanks呀!跟住同我地傾下偈,問下我地有d咩計劃呀,咁就一堂了.跟住仲同我地講話放學果陣校長會上黎同我地fairwell.

跟住小息,影左少少相.

跟住acc,都係冇上堂,我同軒軒,婷婷+紙淇捉波子棋.捉到咁上下就開始影相了.同阿fok啦,全體讀acc既同學又影啦,好開心.

跟住諗住出去食飯啦,上到樓梯果下fish已經同我地講話肥梁請食飯,所以我地去就去左百樂度食.多謝晒呀!搞到最後有少少遲到.

跟住cl&c堂,梗係唔上架啦!狂影相!正!不過天賜極度唔合群,仲要話"呢個時候仲影相?"超無奈......仲等我好期望咁佢一定要last day番黎,點知俾佢噴到面懵懵,唉........

跟住最尾堂原本要落musci room,不過因為校長上黎既關係,所以我地過左E103.影相既熾熱氣氛梗係唔好俾佢停啦,繼續影!好開心呀!跟住d老師,校長果d上晒黎.訓勉當然少不了.多謝你地!跟住.....繼續影!同埋好多謝校長預備左d食物同飲品俾我地,多謝!

跟住放啦,過左去同何耀國影相,連sir,仲有miss fung,李富華同miss law,最後仲有miss ip呀!多謝你地!影到我兩張既memory卡都滿晒,正!兩舊電都差唔多用完咁滯.

跟住真係走了.番屋企,即刻充電.跟住一路等到兩舊電都充完之後就出發了.

今晚約左一大班人過觀塘食韓燒,約9點.

首先好多人都去晒打機,差唔多夠鐘就去番地鐵站等埋其他人.飛峰都有黎呀!好開心!好難得!除左fish之外,都齊人喇,所以就開始過漢陽苑了.行到半路,我驚fish唔識行過去,所以番轉頭等佢.跟住又一齊行番過去.超搞笑,佢聽日要去做姊妹,所以著定對姊妹鞋,搞到襯到成身好搞笑,仲要對鞋鬆,所以去左mannings買鞋墊.跟住就上到去食了.有成18個人呀!太正喇!跟住聽到有人話健威仔都會上黎,開心到彈起,點知最後都係冇,超傷心.跟住大家都食得好開心.我又同j仔講d搞笑野,笑到死左,仲要笑到超大聲.同時我又同阿紙鬥食得多野,佢做"綠"野,我做燒野,最後兩敗俱傷.小娟俾我迫到食左好多野,勁!跟住埋單啦,原本有人提議去唱通宵k,點知太貴喇!搞到冇人去!超傷心!咁就cancel左了.跟住大家響漢陽苑樓下影相,超樣衰!好多人望住.不過唔緊要!影相最緊要.原本我都有帶相機去架,不過冇乜點影到相.跟住大家散喇,走既走,打機既打機.咁就一日喇!好滿足呀!

我同seven最遲走.我地住得近,冇咩所謂,所以最後我地兩個行番去,一黎可以當做運動消化下d野.跟住我地又果左ok一陣,飲下野,跟住就真係番屋企喇!

跟住沖涼訓覺,咁就一日!好難忘的一日呀!以後真係唔知仲有冇呢d機會咁多人一齊,好懷念呀!

多謝你地俾左我咁開心年半時間,我唔會唔記得架!

P.S.1:If you fail to plan, you are planning to fail.-----------by 鄭太  <----------多謝你呀!

P.S.2:好多謝所有響呢7年裡面教我既老師,我從你地身上學到既野我會銘記於心的.多謝!

P.S.3:真正要同你講聲:"再見喇,朱記!""再見喇,老師們!"