今朝都係差唔多,擺行李同食早餐.好快就去機場喇.我地一路開車一路同個市長揮手講再見,佢地黎送我地呀!

去到機場好快就check in,派機票同boarding pass,好快就上機喇.我地既小孔導遊送到我地入閘就走喇,好多謝你陪左我地咁耐呀!

今日輪到奇哥唔舒服,不過佢都上到機,好彩.

兩三個鐘之後就番到黎喇.降落果下真係好正.跟住我地就坐旅遊巴番警署喇.好快就解散喇.呢個旅程亦告結束.

羅文既daddy已經等緊我地.唔該晒你呀!

番到屋企都冇咩事發生,咁就一日.

P.S.1:今個旅程太難忘喇.好高興識到你地呀!亦都好高興你地唔嫌我同我做朋友.尤其是樺哥呀,多得你響我病果陣照顧我.

P.S.2:今個旅程入邊識左兩個好好既導遊,多謝你地呀!

經過一次咁大起大落,我已經獲得重生喇.好番晒!

朝早都係果堆例牌野,唔多講喇.

今日我地坐船過劉公島.尋日有事既人今日好似仲係唔多掂.有d仲要番酒店添.個島上邊有個甲午戰爭紀念館既物體,好多野睇架!我地個個係咁狂掃入邊d野呀!d野勁精緻!有砲啦,有軍艦啦,當然全部都係模型啦.我就買左個鎖匙扣同個襟章送俾何記同梁sir.跟住我地就去參觀呢個定遠號喇!聽講佢係甲午戰爭時期既軍艦,而家將佢仿造番出黎人去遊覽.隻船真係造得好靚架!可惜入邊唔俾人影相啦.蝕晒!

食完晏就即刻去小學交流喇.佢原本唔係叫世昌小學架,唔知叫乜乜小學咁.今日我地去係參佢個更名儀式,由今日起佢就叫世昌小學喇.內地學生真係同香港學生好唔同.小小年紀就已經咁出色,真係勁.原本我有個speech要講架,不過由於時間關係同唔想d人曬得咁耐,所以cut左個speech.真慘.事緣今次既活動係戶外,響操場度進行架!所以都幾辛苦下.我地jpc係壓軸表演既,我地唱左兩隻歌.表現唔錯.我地排左唔係好耐咋.

跟住我地入校舍入邊參觀啦,入邊d設備一d都唔遜色架!電腦都有好多部.間學校都幾靚下.我仲捉左幾個小學生同我影相添呀!其中一個係做司儀添架!佩服佩服.人仔細細,表現相當出色,有前途!番到去呢間小學,真係令我諗番起以前讀小學既好多好多野.活動完左,我將手上邊既禮物俾送晒之後,就排隊走人喇.

5點幾去食dinner喇,跟住坐車番煙台.因為差唔多走既關係,我"拿拿臨"問晒d人拎icq果d野.

番到去,英姐幫東東買左個生日蛋糕,佢聽日生日呀!因為聽日早機,所以提早幫佢慶祝,恭喜晒!

今日真係好開心呀!

跟住都係咁啦,沖涼訓覺.

朝早都係果幾味野.好早morning call,跟住擺行李食早餐,d野都係好難食!

今次我地去左蓬萊閣同戚繼光紀念館.今次真係睇野多過學野.因為入邊太多野睇喇!

好快又係食晏時間(救命!),不過今日係宋b生日呀!我地全部人幫佢慶祝呀!恭喜晒,佢仲眼濕濕添呀!

跟住又係長途車去威海市.

唔知係食錯野啦,定還是捱左咁多日咁難食既野,終於都支持唔住.病左喇!係腸胃炎黎架,仲發埋燒添呀!我已經算係strong果個喇,到左第六日先有事,有d人之前已經病緊添喇!到左威海之後,英姐同奇哥"拿拿臨"送有事果幾個去醫院.去到之後個個都要打吊針.我係好得最快果個,好快就吊晒喇!可能係細個果陣吊慣左掛,所以吊得好快.其他果d就要慢慢吊,因為一快隻手就會痛.今日我真係經歷左大起大落,病得快,好得亦都好快.我仲驚死聽日個speech講唔到添呀!我地個個都好似當病唔係一回事咁,個個都苦中作樂.我地又影相,又傾偈,又響度玩.其實咁咪仲好,唔使搞到間房死氣沉沉咁.今次真係辛苦晒奇哥同英姐喇,你兩個為左我地真係兩頭走,辛苦晒呀!唔知係咪冇番大陸太耐,好多野都唔上手咁.一開始要坐響度吊架,我呆左一呆囉,以前都唔係咁既.奇哥諗都唔諗就幫我地book左間房,等我地可以舒服d咁吊.廿蚊一個床位架!最搞笑既係入邊個廁所原來係公廁黎架!污糟到爆炸!我問個護士有冇廁紙,佢竟然同我講呢度係公廁,真爆笑!仲有一樣好激氣既野,就係d辦事效率勁低,要逐樣同你計錢先至可以同你做果樣既治療,唔似香港咁一次過最尾先計.大佬,死人架!

原本今日我地要去中學度做交流,不過病左果d冇去到.有d可惜添.

我地好夜先番酒店,辛苦果度d廚師喇,搞到咁夜先收工.唔該晒呀!都係一d好清淡既野,食完之後就番房喇.

沖完涼,等個頭乾埋,煲埋滾水,拍左粒panadol就訓左喇.都已經成兩點幾喇.

今日又係好早咁醒左.食完早餐又開始遊.

今日去既地方有趵突泉同大明湖.大家係咪覺得好似曾相識呢!入邊真係好靚架!大明湖d荷花雖然唔多,但係真係幾靚下.我仲買左d竹書籤添呀!勁靚!去到趵突泉又係勁靚,佢同好多名人有淵源架.好似李清照咁.

玩完之後坐車去食晏,今次有d野玩下喇,就係逐個人出黎present,講下自己對今次旅程既感受.食完晏好快咁就坐車去煙台.

去到之後就食dinner,再番酒店.

又係好辛苦既一日.