今日係關sir教我地既最後一日,上埋呢堂佢就走喇!相處左咁耐,真係好唔捨得. 今堂都冇上到,大家傾下偈咁啦.佢預備左16份既贈言俾我地,佢話係同我地相處左咁耐既一d心聲喎! 而我地亦都寫番d野俾佢,係心聲加評語.呢堂過得真係好有mood.

跟住上上下,無啦啦要走火警,原來係誤鳴,激死囉!破壞晒d氣氛. 之後響操場度企左好耐就到recess time喇,諗住上去影埋d相添,唯有等晏奏acc堂啦.臨尾果10幾分鐘,關sir落到黎同我地影相,個氣氛好令人感動呀!好唔捨得!

聽日淨係番3堂咋,個死肥仔又唔知溜左去邊,咁仲好添,等我地有時間prepare d野送俾關sir!放左學,我同j仔,大魚,傻碧再加埋主席先生首先過美心度訂左個蛋糕,再一齊過旺角買野,預備聽日送俾關sir.好累,d書有重,買完之後番屋企超眼訓.

跟住都冇咩特別野發生,咁就一日.

P.S.:聽日要預備相機影相留念呀!

今日一朝早諗住番到去果陣,睇下阿艷佢點,點知佢冇番,好擔心呀! 反而班8婆依然響度督眼督鼻,見到真係火都黎埋! 希望聽日可以見番佢啦!

順帶一提今日發生過咩事啦,今日基本上都係上堂,頭3堂係cl&c,唔係做listening就例牌悶架喇,所以我地班好多人都好累.我都算係咁啦,冇咩點訓.跟住acc呀!派番禮拜一既test paper,開頭我係16.3分既(full mark20),不過之後我都知自己做錯(明明應該寫"add"架,點知寫左"less",好唔抵呀!d數字計arm晒架! 不過唔知點解我又唔係好care喎,可能唔想自欺欺人啦!),所以叫miss改番,扣番2.5.其實冇咩所謂啦,知道自己值幾多分咪仲好,唔使自己呃自己.j仔今日見到我既分數,話我拎a喎!傻啦,預你一堂做既題目兩堂先做得晒,仲要唔係拎full mark添喎,咁有鬼用咩!唉....真係好唔開心!好想做得好d呀! 跟住兩堂m&s,振誠因為唔得閒,所以今日成班一齊,工科既同學仔終於見識到隻死雞教成點喇!同肥許真係差天洞地,唉...食完晏之後,要划艇呀!我果part都划到有275m呀!都好開心喇! 跟住ue test,以為份paper唔難啦,點知估計錯誤,唉....

跟住諗住搵肥許,不過佢話今日唔得閒喎,冇所謂啦!跟住番到屋企好鬼眼訓,訓到8點.

之後都冇咩發生,咁就一日.

P.S.:希望阿艷冇事啦,好擔心呀!

今日基本上唔打日記,因為之前講過話呢排都唔會打,想俾個心冷靜下.但係今日真係唔打唔得.

其實今日響學校都係咁過,冇咩特別.我最想講既係今日既lcci考試.

今日因為要6點考,所以冇番到屋企,同j仔留番響班房度溫,兼幫j仔再鞏固下d概念.5點2到我地就過到去觀塘麥記join埋阿紙.而我就同j仔食埋野.今日實在太緊張, 搞到食野果陣不知不覺越食越快,j仔都係咁話我.食食下,想拎起支野飲果陣我無啦啦甩左下手.唔係咁緊張下話?係呀,真係好緊張 .好快咁食完,踏半到就開始行上去月華地利亞.上到去,一切settled down晒之後,個監考就叫我地check下份paper.我armarm揭開第一版,隻眼已經凸左9成出黎!佢竟然番炒Branch!? 我第一時間唔係擔心自己唔識,因為我點都叫溫過下,所以點都應該執到d分.反而我係第一時間擔心我前邊既阿紙同j仔,因為佢地冇溫過架 !咁就已經身先士卒左25分!Shit!跟住我再睇埋第二題,隻眼已經凸到跌左落地下.佢竟然出Stock Valuation!? 死得啦!一題Partnership同Limited都冇?你唔係咁玩野下話!我又即時諗到佢地兩個,好驚佢地會...坐左3個鐘,終於考完.j仔佢....... 阿紙佢都....... 今日其實仲有個中七既師姐都有份同我地一齊考,佢都係話唔識Branch!因為我地個個都唔以為唔出架喇,因為對上果次已經出左啦嘛!鬼整佢今次又再照版煮碗咁出多次一樣既format,好mung囉 !我諗今次好多人都俾佢呃晒囉!點解我地硬係欠咁d運氣架?Who can answer me?

跟住番屋企沖埋個涼,食左d野.之後都冇咩野發生,咁就一日.

P.S.1:傷心.點解我次次胸有成竹咁去考acc,但係就硬係欠咁d運氣?好似考Cert果陣咁,份卷全部識做,易到爆炸,但係就點解錯埋晒果d minor mistakes?今次又係咁,諗住響Cert果陣失意,希望可以響lcci度拎番個彩啦,但係你咁都唔俾我?好傷心呀!

P.S.2:無奈.怪就要怪自己溫得唔夠熟,不過佢考d係Cert果陣out syl既課題黎架喎,唔熟好正常遮.我都算係咁啦,自己睇書架咋.叫miss fok教但係就10年都未做到.好彩叫佢借本書睇咋,再等就死得人多喇.唉....其實唔怪得miss fok既,因為大家都係tip佢唔出branch,鬼估到佢真係出咩.但係就勁無奈囉.

P.S.3:唔憤氣.佢唔出Partnership同Limited都唔緊要,佢出branch跣我地就真係好唔憤氣囉.雖則話冇權話事出乜就出乜,但係都唔好出得咁衰丫.俾你呃晒囉.

P.S.4:內疚.今日我地都好有信心pass架.尤其是j仔,佢上次考1st level唔合格,已經好唔開心架喇,難得今次咁俾心機,而且進步左咁多,但係就俾佢出成咁而搞到要響"pass"門口度止步,好唔抵囉.同埋今次真係大意左,應該幫佢溫多少少至arm.唉....其實應該幫多佢少少架,可能佢就係爭呢少少咋.唉....勁內疚囉.

P.S.5:響呢度要向j仔講番聲sorry,因為我應承過你話要你今次合格但係我做唔到(我覺得點都要負少少責任,如果我幫佢溫多少少可能個結果完全扭轉過黎!),唔好意思呀! 你都唔好咁唔開心喇,一次既失敗並唔代表一切.今次你盡力過其實都已經向自己有交代架喇!Keep trying呀!我知你係收埋左自己傷心既一面,但係我睇得出你係想安慰自己囉(同你一齊走果陣睇得出).快d開心番啦,唔想見到你咁樣呀!

由今日開始,冇咩心情打日記,想俾個心冷靜下.有果陣先打啦.但係我都唔知我幾時先至有幾時先至冇.極度驚恐,極度低落,極度矛盾,極度空虛,極度迷茫,極度混亂,感到被遺棄,感到孤身一人,迷失人生方向,失去奮鬥目標,完全失去自我,完全不能自主.面對以上種種,不知如何是好當中.既然有d野唔係我能力範圍之內,唯有等時間幫我沖淡一切,等上天幫我見證結果.