今日我8點幾就起左身,因為要洗頭執野,之後要過石澳燒野食. 其實石澳我已經去過幾次,但係都玩唔厭,因為呢個地方實在太好玩.我同longlong入左去霸住爐先,10點半到咋,勁悶.之後立杰仔就黎到喇,其實我地3個係約埋一齊架,不過杰仔太耐喇,我地又驚冇爐,所以入左去先.跟住我地3個一齊悶,咁我就提議玩uno啦,好快佢地就黎到喇.今日我地分4批人入黎,可想而知有幾多人呢!

3點幾到,基本上d人黎齊左之後,我就問杰仔d人今晚會唔會通頂啦,不過個結果係令人有d失望! 咁冇計啦,唯有即刻打俾j仔話下次先約佢再燒過啦! 因為我地7,8點到就走,咁佢同阿魚8點先至入黎都冇意思啦,唉...但係我真係好想佢黎,因為始終好難得咁大棚人.唔好意思呀j仔,要你一場歡喜一場空添!(不過我覺得我地今次都有做得不足既地方,因為尋日就應該決定通唔通頂,因為搞到好似,眈誤左j仔好耐咁.不過好可惜,一大棚人果陣呢d野通常都係做唔到!)暑假丫,我希望可以再去多次.

跟住晏奏好鬼熱,好多人都落左去玩水,雖然我都有帶衫褲去換,不過都費事落水,唔想濕身.今日婷婷同康康係最遲黎既,不過似乎冇損興致喎,真開心.咁我地留響岸上既人就一齊玩uno,都好開心架!不過俾我知道左我今朝玩既uno係錯晒d規矩.

婷婷響我地走左之後會有下半場,因為有個舊同學仔(我都識,不過我唔會同佢地通頂)生日,咁arm線又係響石澳燒野食,所以要順便幫佢地霸埋爐.咁我地之後就分批走啦,肥bb同ck仔果d就走先,我地剩番8個就陪婷婷直到佢地黎為止,費事等婷婷咁悶啦.開頭佢地話8點到就到,咁我地就等啦.5,6點到,得番我同尹生,其他都落埋去玩喇!咁我地兩個就響度鋤d啦,順便幫手睇住兩個爐同d野.等左好耐,d人好似都未黎.7點幾到,阿聰(以前既舊同學)終於黎左,不過得果4個人!咁我地都算任務完成啦.(響執行呢個任務期間,真係搞到我好無奈囉,d人係咁問我個爐要唔要,我地已經唔燒,但係又霸住個爐,搞到勁唔好意思囉!)跟住婷婷又唔想同d唔係咁熟既人燒住,所以我地就再陪佢啦.我地出左去繼續uno,輸左既要做一d懲罰既野,好好玩呀!好搞笑,由其是係康康,佢最要面,但係又要大口氣,又要輸,好搞野! 卒之,班人成11點先入到黎,唉...跟住我地就走啦,不過我要在留到12點先.因為有個入黎燒野食既同學仔(同我幾熟)要12點走.我覺得阿儀真係好無奈,11點入黎要12點走,原本可以好早入黎架,不為左等埋晒先至入到黎.之後我叫婷婷不如響出邊坐陣,等到12點先入番去接阿儀,因為好累,唔想行番入去.

不過最後都係入左去,咁我就坐埋一邊,睇佢地燒,一黎我好累啦,又飽,唔想燒,咁無謂坐埋去焗桑拿啦,所以佢地叫我過去我都冇過到.

之後我就同阿儀走喇,要趕最後一班車呀!好彩趕到咋.之後我睇住佢上左車就番屋企喇.之後打番俾婷婷,知道阿儀番到屋企,都放心左.

之後沖涼訓覺,冇咩事發生,好累的一日.

一朝早,fokfok冇番,咁就冇左兩堂acc.跟住ue,miss foo介紹左個新miss俾我地識,幾好喎,佢講野幾明下.跟住busi,阿謝又係咁發顛,好想打死佢呀! 跟住放食晏,個天氣一下子真係嚇死人囉! 橫風橫雨到不得了,諗住出去買野食架,不過都唔喇!跟住同j仔落左去小食部度買野食,把縮骨遮,俾d風吹到反晒骨,有條骨仲要一反就斷呀!激死! 我同佢買完之後都諗緊點過番去,因為拎住d野.跟住我就叫左康康遮我番過去先,之後先再接j仔過黎.不過康康可能見唔到佢啦,j仔唯有冒住雨番過黎,唔好意思呀,j仔! 跟住晏奏3堂m&s,好快就過左.

P.S.1:聽日係一個十分重要既日子,係會考中國語文開考呀!呢科相信係最辛苦既一科.不過無論點都好,ivan,詹仔,longlong,尹生同埋肥bb(唔知有冇數漏),你地要加油x100000000000呀!等你地好消息呀!

P.S.2:聽日dennis同j仔要考o-level英文呀!你地都要加油x100000000000呀!成$780架!我知你地實掂架!唔好令我失望呀!

今日係paper3既考試,開頭以為佢會講得好快添,好彩咋.聽晒之後有一個鐘頭做part b,不過我都唔多夠時間做,task 3 d ponits抄唔晒.佢通知離考試完結前5分鐘我已經拿拿臨end up喇,好頭好尾嘛.希望可以靠呢份卷拉下分啦.armarm好仲有一個月,下個月6號就要考oral喇,要俾心機,不容有失.

同longlong佢地過左去聽講座之後就番屋企喇,好眼訓呀,訓到7點.跟住上左阿嫲度食dinner,今日Mothers' Day嘛!

跟住番屋企喇,都冇咩發生,咁就一日.

P.S.:願天下間為人媽媽的"母親節快樂!"

今朝上到聖言,有一種特別既感受.仲記得6年前搵學校果陣,我曾經去呢間度報,不過最後冇回音.可能冥冥之中真係有d野就係咁(根據抵死到爆炸既connie謝所講 ),如果唔係咁,都唔會有今日既我,一個土生土長既朱仔(呢個名係我睇番本同學錄某位舊同學仔寫既).

好快就開考paper1,d題目唔難,穩打穩紮.不過唔知做乜差唔多夠鐘先寫完,因為300字唔應該寫咁耐.

跟住就落左去canteen度食野,d野唔算太貴,d味道又ok下,d人既service又好,比起維他天地真係差天洞地! 最令我欣賞既係d學生小息好有秩序囉,d枱凳勁乾淨囉,比起朱記d學生小息,呢度簡直係天堂.響呢度食野好似去左食大排檔咁架,d筷子用個圓柱鐵筒仔裝住擺定晒響枱面,d學生食野就拎,仲時不時就有個阿姐出黎抹枱,勁正囉!維他天地果d?都唔知點做野,d枱凳癡立立,污糟到死.就算係話d學生唔潔身自愛遮,但係保持canteen乾淨事實上都係你既職責囉!冇理由話d學生曳就可以唔使做野,呢個唔係藉口!

好快就paper2喇,今次份卷深定淺真係因人而異囉.part1問題唔大,part2就真係....我睇得出佢出既方向係想出淺d俾學生,但係我就覺得反而咁仲難左囉,唔係深左,而係煩左好多囉!因為局限左你個mind,諗得仲辛苦,花既時間仲多囉.卒之我都係唔夠時間做,臨尾果個matching我都係亂填.唉.....失敗呀!我最有信心就係呢張paper架喇,都做得咁差,真係好mung囉.搞到好驚唔合格.

跟住番到屋企,打番俾其他同我一齊考既同學仔,佢地都話份卷好鬼麻煩.激死人喇!咁就俾你打沉左我,唉...

跟住冇咩事發生,咁就一日.

P.S.1:聽日listening不容有失,因為佢係佔最重分.但係我真係好驚,因為平時listening已經唔係叻.好驚佢會講得快,希望唔會啦.

P.S.2:尹生話聽朝會打上電台都同我地say hello架,希望你真係打得通啦,等你呀!有你既支持我地一定俾心架!

今日都係照常番學,冇咩特別.今日3堂busi都係計數,冇咩點講過書.今日個Miss Davidson依然冇番,癡線! 好心就唔好教啦!就算自己有咩苦衷番唔到但係都唔好咁啦,唔使理下我地架咩? 跟住晏奏3堂acc,終於肯教書喇!今日係教cash flow,係新topic黎架! skip左咁多堂冇教書,今日終於學到新野喇!聽落cash flow又唔係好難咋喎,不過做落先至知,因為就算幾淺既topic都可以出到好深,尤其是係A-Level.放左學之後,我地行到運動場門口,發覺有好多人,睇下發生咩事啦,原來係捉果個咁既死色狼囉!真開心.我覺得佢真係一d都唔要面囉,日光日白響度非禮d女仔!唉...好眉好貌.不過之後發生過咩我就唔知喇,因為都睇唔到佢真係俾差人拉.不過諗都唔會放過佢架喇,希望告得入啦.

之後過左油麻地補習,7點半到就番番屋企喇.

之後都冇咩事發生,咁就一日.

P.S.1: 會考倒數計時器:距離sly.b開考日尚餘10小時.

P.S.2:聽日我班應該有成3分1人要出去考,希望大家個個都有好消息帶番黎啦,尤其是係乞人憎兼抵死到爆既丹尼斯呀!要俾d心機呀,你一定要考到番黎呀,如果唔係就打死你呀!