細B平時都有打比我既習慣，其實我感覺佢平日既生活真係好悶，咁正常既...屋企得佢一個，身邊冇咩人可以係夜晚既時間陪下佢，同佢玩既最多係得隻狗，又或者佢既工人，不過工人又唔係佢咁接近既年紀，語言上有時都會雞同鴨講..

咁佢尋日同我講電話既時候話，想我帶佢去西貢...西貢，都唔係一個易玩既地方，斜可以斜過新娘潭路(位置係北潭路)，長由上水粉嶺去西貢絕對遠過去鹿頸，體力係需要更多，其實係考驗鬥志同膽識，因為由馬鞍山西沙茶座之後，根本就係冇單車徑，路窄要單車同車爭路，老實講齋玩西沙路係可以既，但係如果要行埋大網仔路及北潭路，需要既體力係相當大，叫B叔就可以既，細B我就真係有D擔心。除非細B真係體力奇好而我唔知既話，基本叫一個10歲既小朋友踩咁金...我覺得係好困難!

如果細B可以單靠佢個人既實力，可以一口氣，唔洗推車上新娘潭路既400米段，即由大美督個D茶座再前D近山邊個間燒烤場起步，一路鏟上去漁農自然護理署八仙嶺站，呢個係上到山既基本要求。但係如果要入到去北潭路，咁就一定要自己能夠完成新娘潭路來回一次(中途停唔停都得)。

點解我會以新娘潭既難度做單位呢?原因係西貢既路段分三段，

1. 西沙路**中度**(馬鞍山西沙茶座開始)，路段係漸上，水浪窩係最高點

2. 大網仔**最易**(西沙路尾迴旋處開始至北潭涌，即保良局渡假營個邊)，複合路式，少少上少少落。

3. 北潭路**最難**(北潭涌至黃石碼頭，甚至加料行埋海下路)，勁上而且好斜，有時仲要轉彎上勁斜，但過左北潭凹非常舒服，有長達10多分鐘既落斜，唔踩斜都有約40km/h....返轉頭比去更難#海下路我未試過單車入，行山就行過，難度相信一般#

入西貢最大難度係，當過左北潭凹管制站之後，一般車輛唔係話入就入，即係話當你身處黃石碼頭，而你同時係單車係身唔想再踩好疲倦，咁就真係天大既「喜事」，因為當你call的士或客貨車如勁達、東方、雞記...未必入到，而且費用非常昂貴，所以唔想有去冇返，一係自己勤力d操多d車，第二冇膽既麻煩唔好搏，第三除非不幸受傷(通常係西貢北潭路炒車都重傷要call白車先搞得到)，第四行返去...

我估計細B最多只可以踩到西貢市中心，你話我請佢去滿記食糖水開心下就無咩所謂，但係去到大網仔我都冇咩信心帶到細B去(自己同細佬就一定得)，因為由上水粉嶺出發都已經用左唔少體力，而且體力保留要保障到係可以安全踩到返去回程，而唔係一去無回頭，所以細B真係要諗清楚，慢唔係問題，而係體力支持與否既問題。

近排呢其實我都係處於比較疲憊既情況，始終工作崗位常常係座頭，其實座頭唔係幾好玩，雖然有多d既時間對到d自己好熟識既住客，亦可以有d傾到計既時間，咁可以好過d，但係到半夜既時候，夜深人靜既時間，真係人到無既時候，咁只好借收音機舒解一下長時間工作的悶氣，又或者抽下煙打發d時間...其實座頭真係好悶。

咁另外一件事，就係跟進返我自己同細佬見到「朋友」既遭遇，咁我地亦都向一位相士協助，原來我係遇上白事既人或一d供奉鬼神帶來既唔好既能量。咁我都覺得個相士講得都幾準，的確我既工作環境係有住戶既親屬仙遊了，門外亦擺放左「長明燈」，呢個係最大可能性。咁相士亦都比左d符我地兩兄弟旁身，希望經過今次之後，我地都可以安然咁過日子。

我諗好多人都想問咩係「長明燈」，其實呢d燈唔係一個燈泡，只係一個大蠟燭或者係長蠟燭，通常係白色或紅色。咁點解要放燈係門外而唔係門內?其實等於一個指示牌，希望仙遊了既親人可以從地府(亡魂的空間)中回來凡間(人類的空間)，咁點蠟燭通常都親人既頭七(回魂夜)，至於當中點樣計算返頭七我就唔識。咁回魂夜先人係果個時候係中陰身，剛到地府報到，但基於回魂夜既關係，地府中既鬼差(即牛頭馬面)會以鎖鏈押運先人回凡間見親屬的最後一面，當中先人回到家是可以享用在世親人提供既祭品。

咁呢d「長明燈」係千祈不可故意百厭整熄，因為咁樣係會得罪鬼神，係罪大惡極...當然你見到熄左，其實係可以幫忙點返，至少你協助那位先人回到家中，否則佢返唔到去，係一件好慘既事。正如你迷路，你找不到出口，同樣係非常恐懼，何況該仙人是身處一個異度空間走回凡間，是需要經過很多困難的。

同樣地，靈異事件同呢樣事件是有關係，我見過兩個巨大既黑影(多數係鬼差)夾住一個正常人身高白影(多數係先人)既情況，呢個我估計係回魂既情況。第二種，係聽到既鎖鏈跌聲，因為當先人到達自己既家，鬼差會先解除先人既鎖鏈，讓先人回到家中。如果家人想知先人有冇回家的跡像，通常會係屋內門口放置一d白色既粉末，咁靈異事就會係先人踩過白色粉末留下足印，甚至食既祭品數量少了、飲既祭品如燒酒個d倒好係神台杯裡既係飲左、有可能睇到先人回來的影像...仲有好多既!

其實點解我會知，係因為當年細個，我阿公就過左身，我仲好記得當中既儀式甚至發生既事，咁我阿公頭七個晚，我同我細佬加阿媽係廳個到睇電視，突然間我係見到有一隻奇sharp靚顏色既飛鵝從窗外飛入屋，我地幾個就諗...阿公黎左!

我唔知係唔係真係阿公到過我屋企，但係我諗如果係真既話，呢個入屋既方式真係好靚。