尋晚，我地4個照舊膽拖加埋黃恩傑出左去玩，咁今日就係玩吐露港去到沙田，順路去左沙田圍食野，咁本來成班都冇野既，但後黎返屋企個轉，我地成班夾模擬團體公路賽，咁臭軒玩到埋尾係元洲仔橋底發皮四...

咁係一路都冇乜野，我覺得基本成段路都幾開心既玩得，咁第一個見到既係一個踩RB既青年，咁佢都幾快，我都要花一段時間先追得到，咁我就諗佢都有返咁上下功力，呢個我都覺得幾值得學習。

之後見到又有兩架RB，有SRAM S60刀鈴，呢對鈴我都幾鍾意，可惜我唔係踩大車...咁個兩條友其實都幾快，不過都唔及第一個，最後我衝隧道過左佢，其實我自知唔係好快但個兩條友又要追，我覺得S60鈴個條友傻既，唔係好快又要插條刀鈴上車，無用既...如果佢肯賣比我既，我要呀!(阿然踩大車，比佢用都唔錯wo!)

咁去到沙田圍，我同佢地去左一間位於沙田圍馬鐵站既對面一間叫天湖食糖水，上次我同阿權就係呢到食，的確我覺得呢間野幾經濟既!

到返去個時...我地由科學園開始計數，以團體既方式去跑返去元洲仔，當中其實係用最常用既落後法...咁起初，我地都一組跟住上!但後黎開始見到高下，恩傑開始溜後，臭軒開始使用落後法之後，佢追唔返(其實追唔返係好平常既事)，之後得返三個作為最後衝刺...我最彼以直落48km/h衝線，用左約8分鐘。

唉!問題就係到出現，臭軒返到黎橋底，佢發皮氣...佢歸咎我地前車冇夾返後車，其實不如咁睇，而家已經係團體講速度，要係成班都好快，但係當你跟甩左既時候，其實已經太遲，因為根本你食唔到個風尾，只係可以講深表遺憾...同時你落後唔係要要全部等你一個，咁如果因為要等你一個，而令整個團等你慢左，咁反而責任問題係落後要人等你。如果唔明既，可以參考環法2006第四站既賽事...astana車隊入面，到差唔多埋尾個時，有一個21號既車手佢係小上斜冇力，佢唔會話叫車隊等埋佢，而係佢自甘落後，由得佢既隊友爆到終點，呢個就係比賽模式...又或者成隊後炒哂，都會係輕傷仲可以跑既跑埋落去!得返一個人都要跑埋...

不過臭軒依然都唔明白，希望佢知道之後可以明白點解尋日我同細佬加埋阿然出力咁爆到尾...溝通上你大叫聽唔到係正常，風聲、行車既機件聲，基本上前車聽唔到後車都係好等閒既事，你要想溝通冇阻，買對講機...

近排我同細B熟落左，咁細B係邊個呢，其實就係一位對我很好的小朋友，亦係一個小車迷，終日都好想改車。

咁佢成日都想請教我d改車問題，其實我都好樂意協助，講真既係佢有心玩車，雖然佢爸爸B叔好錫佢亦都肯買野比佢，但係我見到係無方向，因為細B搞唔清D件既品質同功能，即係話見到靚就叫爸爸買，咁成日都會出現買唔岩既情況，最後都係換件既情況。

有時候，見到細B好鍾意帶架淑女落街，帶隻狗行下街，其實淑女唔係佢想玩既速度，曾經我就係試過係咁改架淑女，但見到淑女改變程度真係有限，而且更有一個問題就係淑女既車架結構唔可以負擔高速既力量，一加速車身就會好飄，令到我所發出既力量唔可以完全既爆發，呢個係一個重大既問題，如果每次都係咁既話，每次爆發力量都係會出現力不從心既現象，咁不但浪費緊自己既體力，同時係導致危險既發生，就係車架飄最終會令車解體。

題外話，曾經有好多街車界既人士踩80至90年代最瘋魔全港既「黑馬」black horse，曾經都出現好多車主炒車少炒到老娘都唔認得，咁我好肯定話到一個理論比人知，街車到街上的單車徑或公園玩下就好了，如果要競速真係好危險。淑女更加係，其實一架師拉車咁樣大改，我既實驗結果係:「一架唔可以改得完善既車」

咁返回正題，細B係而家係有一架java，不過比我感覺仲係好街車，點解咁講呢，因為佢可能係小朋友既關係，架車貼左好多貼紙，仲綁左個虎紋毛毛係車架，老實說無用而且唔係一架跑車既野，有d九唔搭八，不過佢尋晚就係講左一句:「加左個毛毛，都唔夾既!」

呢句說話，我親身見證到佢有心要向速度發展，而且要打破街車既框框，的確同街車d人係到吹水講d九唔搭八既錯誤理論其實好錯，亦係一個錯誤既開始，我以前玩街車，係用自己既眼光去買件...

到今日，我都係用自己既度量衡去睇同判斷，咁亦都係參考環法單車既車手，朋友介紹d件去睇下，有車試到既，都係盡量試啦!就係咁，我改到而家呢架車TT dahon出黎...