分享對於全球大部分人黎講都好易，最巴閉就係美國個兩條友仔發明左youtube，分享很屌的影片，亦都「出賣」唔少自己既朋友既瘀野「公諸於世」，第二就係facebook，大家耕下田偷下人地棵菜...
可是，大家卻有冇諗過小朋友會係交際上出現兩種情況，第一無分你我一兜粥仔幾廿個小朋友圍食，第二個係一個獨食其他個d喊死...其實就係小朋友對世上既無知，就會出現咁既情況。
點解佢地會share野食?其實就係根本佢地唔識爭野食，咁咪就係抱持一個「玩」既心理，人地食佢又食，食左好好味。即係佢地思想係極其簡單，你食我又食個種係貪得意，同埋好奇人地食我又試下先既心態。
相反，點解會出現獨食?原因就係當個個都知道個樣野好好食，咁當然作為你自己你都會想食多d，但係呢個環境出現「僧多粥少」，眼見自己喜歡的食物被人瓜分，而食既理由係喜歡唔係好奇，咁就會出現爭食或者到最後獨佔既情況。
其實如果教小朋友學「分享」，唔係一件難事，如下:
當有一堆朱古力，要分比12個小朋友既，同時小朋友係第一次見面。
1. 先引起佢地既注意，例如話「今日(自已的稱呼)請大家食朱古力，好唔好呀?」通常小朋友都會話好!咁你攞到印象分同埋主導權，因為佢地好希望你快d比朱古力，而且你要令佢地知道邊個係「老大」，邊個比野佢地食!
2. 要平均分配，自己個份可有可無，另外提醒佢地要等齊人人有先食。你可以攞一份幾多粒做單位，例如一份五粒，要平均分配，絕對唔可以大細超。咁樣既分配模式，令小朋友覺得自己係受惠而且係得到公平既對待，亦令你既領導獲得支持，因為佢地覺得你對佢地好，有朱古力食而且人人都有份。點解要等齊人先食?呢個令佢地互相有尊重對方，大家都係平輩，應該平起平坐，亦可以從中教識佢地最基本既餐桌禮儀。
3. 一樣米養百樣人，人總有好同唔好。小朋友總會有扭計既一面，即係話食左5粒唔夠皮，仲想食!
情況一: 搶左未食應該要立刻制止搶糖既小朋友，提示佢:「人人都5粒糖，你攞左人地既，咁人地咪冇得食囉?」咁一係佢棄械投降，一係佢仲係企硬，有方法應付既!步一再步二
情況二: 搶左食埋，行動跳去步二，甚至步三
步驟一係權威法，說:「你唔比返d朱古力人地，我下次唔請你食架啦!」(令搶糖既小朋友覺得有損失既後果)
步驟二沒收法是行動，沒收佢既「戰利品」同原有既朱古力(即清袋)，令佢覺得有即時性既損失，通常搶糖小朋友會開始喊!(即時性要小朋友面對自己所作既錯事後果)
步驟三罰企或坐，通常呢d係搶糖者好扭計既情況就會用，呢招對小朋友係「極刑」，千祈唔好施打，破壞全部小朋友對你既信譽，甚至怕左你。(順便令搶糖小朋友冷靜一下，明白自己既過失)
喊係一個重要既環節，因為要令佢明白自己所作既行為有代價。同時你要補償同安慰返損失朱古力既小朋友，補償係要等同數量既朱古力，唔可以多或者少左，因為唔可以令佢覺得自己損失會有補唔足或者優待。而且要求搶糖既小朋友對被搶者作出道歉。當然完事後搶糖者係無糖係手，呢個就要令印象深刻，明白自己做錯事係會失去權利。
4. 最後要帶出分享既意義，咁你作為主導者，可以詢問被搶者原唔原諒搶糖者，咁比返一粒朱古力作為「回禮」，當然小朋友好少話氣量窄，除非整到個小朋友好火滾，咁呢個一定要下左火先有計傾。原諒，被搶者喊完有得食當然開心返哂，被搶者亦都覺得自己重拾尊嚴，內心會覺得被對方尊重。同時大家有得食，呢個就係分享既重點...
5. 給予獎勵。咁唔乖個d處理左，乖個d(即無搞事既)當然你可以自行決定邊個有獎勵。
呢個小朋友分朱古力既情況，係我觀察左好多唔同既小朋友圍埋一堆食野既情況，當然自己也曾小時候，明白人際間需要公平(人人有得食)、分享(派糖)、負責任(肩負小領袖角色)、有獎勵(派糖比乖既小朋友)、有責罰(步驟一二三)、原諒、體恤(同情被搶糖者無糖食)、面對損失或挫折(被搶糖)
希望大家都會利用呢d方式，套係你既生活上，其實派糖就係人既相處基本之道。
|
