咁我由2009年12月31日開始講起，咁呢一日我同細佬係收工訓醒之後出左去踩車，咁係我細佬改車後第一次出吐露港，其實細佬改左車之後我覺得真係對佢好大動力，事關細佬真係踩架原廠車踩到好似半死咁，又難keep住個速度，咁而家佢改左已經有70%，對佢黎講已經算係唔錯。
最好笑都係出車個時，由於我屋企既方位係西北，西北風係好凍下架嘛，點知落到街覺得唔係好凍，但係都抬哂車落街，咁我地兩兄弟又懶，熱死先算啦!咁我講下我地點著，我自己有套長袖車衫，咁下身唔洗諗就係底褲同車褲，而上身就係一件短袖潛水用既保暖衣，一件薄既長袖衫，面頭就車衫咁...我細佬就醒目左唔著咁多，佢就一件跑衫(背心)，一件super warm，而面頭就短車衫褲。出完去科學園再返返黎屋企，我地就濕到爆燈...
咁我同細佬玩完車仔就返工，今次倒數同上年一樣都係返工中渡過，不過今年就係上水明珠華車呢個單棟式既地方渡過，其實係幾悶架，因為自己一個係一棟野到，不過好彩我有細佬佢無啦啦落黎搵我，亦有阿寶過黎探班，咁我都好過一d!其實阿寶對我真係幾好既，不過我就暫時未有把握可以好順利同返佢一齊，甚至都未知自己係咪真係會再一次同返佢一齊，始終我覺得自己曾經令好多前女友傷心了，我只係想往後既日子可以令自己既女友快樂。
之後收工，同阿寶打左陣機，去食個乜記既粥仔早餐，我就返左屋企訓啦!其實都幾好既，有時侯有阿寶既日子，真係幾開心...
訓醒左，星期五既出車活動又再黎過!不過今次就我地北海道小隊就同山車堂一齊玩，咁山車堂今次都幾多人，例如有老闆龍哥、山車堂弟子阿四、龜濂、魚佬(一個踩tyrell既肥仔哥)，仲有一個踩trigon既師兄同埋好多唔多識既人。
向來阿四都係一個爆計款既車手，成日都呻好累，好搞笑架!不過以佢既體能同埋年紀，算係咁上下。講真佢呢個年紀，仲有好多人都仲係踩街車，最好笑我d街車朋友同埋細B話比我知阿四好快...的確係佢地既睇法，但我實際真係有同四哥去飛過，我就覺得四哥唔係好夠快，不過我覺得佢係應該要慢慢提升個人能力，而且我相信佢未來係可以好勁。亦都好想係到講，街車既朋友，你地唔好再祈望你踩街車可以追上小輪徑，因為呢個係無可能同埋危險既行為，曾經我係嘗試以淑女同DAHON P8搏鬥，但呢個行為絕對係危險同埋無咩可能既事，學下四哥，甘願放下當日既街車，真正接受賽車既考驗...
龍哥係一個飛車了得同埋整車都唔錯既師傅級人馬。佢尋晚居然踩住一部dahon mu架既車，改左硬牙既車出去同我地飛，龍哥佢仲要係無著lock鞋不停咁用佢善長既超級高轉法一齊踩，勁!我對呢位前輩咁拜下風。最勁既係佢仲可以同一位踩cervelo既師兄一齊飛，cervelo既師兄仲要單手推住龍哥背後，龍哥40幾km/h依然無問題，我睇到眼都凸埋...點解佢可以用高轉法快成咁架?
龜濂...唔洗講，由頭快到落尾，佢以前踩tyrell都已經算係唔錯，而家佢轉左cannondale...快到真係老娘都認唔出...臭車尋日都見證到呢個現象，佢都話龜濂係比以前快好多!題外話講一點，似乎龜濂可以踏入比賽又近左一步，唔知佢幾時會再同雞爺再挑戰呢?
去到差唔多孖橋既地方，利豐單車店既小隊都出現左，肥老闆佢地一家都同我地兩兄弟say hi，不過佢地真係好慢。咁佢地當中仲有好得意既小肥。
咁去到孖橋休息返一陣，龍哥有要事走先，剩下既人就去左科學園大戰創新路繞圈，我一諗創新路龜濂肯定想扯爆我地，結果佢比cervelo師兄扯爆返佢轉頭，哈!龜濂終於都有對手擊敗佢lu!其實山車堂識得龜濂既師兄都話想擊敗龜濂好耐，但無奈龜濂真係好快既，所以有好多人都想叫我地兩兄弟有能力既話真係要擊敗佢，當然我覺得呢個係極高難道既事，事關龜濂係用公路車，踩一腳已快過我地小輪徑好多。
好啦，創新路大戰開始，開頭我地北海道小隊仲想話玩team TT，點知臭軒同阿然都係爆計收場...唉!激死，仲打算合作如何整垮龜濂...佢地兩個跑左一個圈就已經OVER LOAD死左火，攤左係公廁個邊休息。之後我地唔理啦!堅持搵龜濂對戰，勁踩3個圈，龜濂曾經落後再玩後追，一追出係快好多，頂!大車真係屈機...
四哥個時好早已經收工唔踩，佢依然都係爆計款，好似玩左一個圈...其實好多師兄都係第一至第二個圈已經收工唔踩，可能怕無力返屋企，但我地兩兄弟已經唔再怕呢樣野，因為好似個時去西貢，其實我自問都怕去得返不得，累到踩唔郁之類既問題，但最後都係死到返屋企，我到今日覺得自己當日係瘋狂，但亦感到自豪，因為我曾經挑戰過及完成過呢個地方既路。
咁講返創新路，龜濂我睇得出既佢成日想扯爆我地兩兄弟，我細佬就經常中計，我就諗小車扯爆大車係難，大車扯爆細車係易，咁因為輪徑既問題啦...細佬見龜想扯個時，佢經常性都想搖上去，之前第一個圈其實已經吸收教訓，因為細佬真係上左當，龜爆車細佬跟上去係咁搖車追，結果細佬好快就落後，有見及此，仲咁追?傻既咩，好快打柴...我自己都上左1次，就係第一個圈龜對戰CERVELO，咁大車對大車梗係快到七彩啦，我都嘗試扯上去，試過過到頭少少，之後我立即跌位，原因係我都差d比佢地整死，我累到都要收腳，個心肺功能運作去得好盡，搞到索哂氣。龜仲大叫問我:「收腳?作死呀?」老實講，真係累!
最後兩兄弟既表現嚇壞山車堂既師兄弟，佢地都估唔到細車追大車係會追得咁緊要同咁快，自問其實唔係快，因為耐力方面依然係有進步空間，而至今強者係devil同埋fallen angle呢兩隊小輪徑車隊，實力依然強勁...我諗我同fallen angle玩或者都仲可以諗諗，但對住devil，我自問真係執笠都得...因為我識devil既阿ken，佢真係可以同大車對打，而且情況係輕鬆，我都服左佢...因為從前我只知小輪邊到有得同大車鬥架?而家呢個現象有可能真係比阿ken改寫...
好啦，盡興完當然要返屋企啦!山車堂就通常都會一齊食野，但係我地北海道都係喜歡自己「一家四口」，咁我地去左阿然樓下個間泰國野個到食，不過d料真係好少，但係做出黎既野食真係好好食，我地連湯都飲埋，之後唔夠喉仲要食串燒，又係好好食。臭軒係食野既其間講起想行山，講起呢個話題，我都好想行山，仲好想搵返miss朱行，miss朱始終係我師傅，有幸佢教識左我好多技術，亦都係咁帶起左我行山既興趣同埋其他運動既能力，好彩佢帶我行山，如果唔係我今日玩車都可能無咁快。
呢個2010年既1月1日，係我人生第二次獨狂，第一次係就同豬太郎、羅記、海爺一齊去行山係大嶼山既，依然都癲爆咁玩^^
|
