今年生日同往常有d唔同，今年都係踩車渡過，咁我都覺得幾開心既!咁20號個晚我都係北海道小隊入面玩，幾好既又上鹿頸!不過就有好多野發生。
咁20號呢一晚其實係好凍，個個雖然有車衫，不過呢得我一個有長衫，其實好似我細佬、臭車同埋阿然，佢地三個都係冇既，咁佢地就真係凍到入骨!我諗佢地應該要好好考慮一下佢地健康既問題，應該有件長衫長褲會比較理想...
去到大美督個d地方，佢地都已經覺得凍到好辛苦，不過又係堅持上山。上山我係第一次用aero bar，其實係一個新挑戰，因為aero bar對於上山黎講其實係難既，因為佢將個人係趴係到踩，有人就會話搖車咪解決到個問題囉?你錯了，就算我用下手左右側杆，其實搖起黎都唔係話易，始終枝杆唔係平既，係斜出...
我得兩個發圍既地方，山上既平路同落斜!呢個係快好多，但有危險性，當我搓枝TT BAR，係冇brake，咁即係話一即落斜60幾pk，咁我肯定完蛋，所以TT落山係一定要對路段有清楚既認識，如果冇啦有個急彎，而TT轉向角度不足，咁就一定跌落山!
再由鹿頸回頭，我同細佬都係頭車，不過再上返山，對我黎講又係吃力既開始，我細佬佢未改用一字BAR飛走上山，我想追都唔得，阿然同臭軒落後得好緊要，之後一有落斜，我即刻發力起跑，又追返放我百多個車位既細佬，我細佬見到我追上去佢都加力上，癡線!兩兄弟快到七彩!
之後到四百米下山段，我細佬比我早上坡再落，我都要急起直追，我去到平路先追得返!不過細佬係改左少少車，佢加左個鵝頸，令到佢上斜既表現更為理想，相反地，我改左車用AERO BAR，其實唔係山上既地型玩既車格，搖車好難、轉波唔係好就手、枝BAR唔夾個路面。
咁我地都係35分鐘都落到山，但係阿然同臭軒都仲係好慢，之後相隔左成8分鐘先至到，我同細佬開頭係見到有架警車下山，我就諗唔係咁當黑，佢地兩個炒車?唔係...架警車之後去處理事項!唔係有惡搞野...原來佢地兩個係身體有點不適，阿然係抽根，臭軒係膝頭痛。不過我知道點解既，佢地兩個可能係凍得滯，d根骨收緊哂，所以就有不適既情況發生...
最後我地係老麥醫肚，順便飲d熱野!突然我有個電話打比我，原來係一個好耐之前既前度女友阿塋，佢真係有心...唉!不過佢係一個好女仔而我無法子掌握同處理...
到今日正日21號，我都好遲先起身，訓到下午1點!之後細佬煮左d野食，食左之後就出左去吐露踩車，今日都算係幾多人，好多人租車玩，不過對於我同細佬黎係一個阻礙，因為呢d人玩車係亂來，成日係塞路!咁我地醒目行內陸以創新路踩出去孖橋，一黎節省好多時間，二來就冇人塞!
到回程返去個時，我地兩兄弟遇到一個mtb既阿叔，咁佢都踩得幾快!可惜我地爆於創新路用左好多力，我只可以死跟，但係就無法子過頭，事實上我真係覺得累，細佬體能控制得無咁好，佢就早已經比我放飛機，有10多個車位!我發功到頂點個時都係42km/h，佢加爆係44km/h(相隔兩個車位及兩車最大距離，估計就係咁)，可惜係踩累了，如果唔係一定追到有凸...算啦!命裡有時終須有，有力就係有，冇既都無計，始終有個弱勢係入面...
到左夜晚，我地北海道小隊一齊去左彩園椰林閣食野，佢地仲請我食呢餐，係慶祝生日!之後阿然去左上水中心買左隻COD(CALL OF DUTY)，咁我地亦行左去上水名都(無野行)，我仲見到青蛙，又係我的前女友，唉!呢個前女友係我HURT得佢最多，而家見返...好唔知點!
之後去左孖8隔離靈精玩推銀，都有中下獎推多幾個銀既，不過最後都係玩到乾哂塘...冇銀仔!
呢個生日，21歲了!雖然孤身寡佬一名，但都開心既，不過唔及有女友係身邊個種雙重感受，唉!自問唔係一個受歡迎既佬，甚至我相信一個係自己既宿命，通常生日之前，好多時拍拖都係唔到個日，就以今次為例，我都係散左先到生日，對上青蛙個次又係!唯一同我過到生日既係嘉怡!不過拍得又係好短線，唉!算，女人...命中似乎好欠缺呢一環，都係做個普通既麻甩佬算了
|
