天氣近排都好熱，工作上都係無咩生氣，因為熱到個人都無咩動力...有時候都係到諗，點解嘉盛苑點解可以咁熱?
不過都有得解釋既，係地理位置上，嘉盛苑位置係上水同粉嶺既中間，咁有一條高速公路係則邊，高速公路係石屎鋪成，石屎地面係會吸收好多熱能，當日間有太陽長期直接照射，熱量就會儲存係地下...當到左夜晚，無左日光既照射，熱能會從石屎中釋放出黎...
第二個原因係，公路上既車!車係高速公路既時速大致係90至100km/h，車以引擎燃燒燃油運轉，而且公路不是一架車，係眾多車係公路上行走，可想而知帶來既熱力有幾多?
第三個原因，樓宇屋苑出現「屏風式」設計。何謂「屏風式」，試諗下咩係屏風?形狀?外表?...很高，很闊，就好似一道牆咁...而家嘉福一帶既情況係一堆既大廈，既大又闊，而且好似一道牆咁，而且密集程度係好近，一棟大廈同另一棟距係大概15步，咁邊到有風入?
第四，回望百和路一帶，有幾座山，例如近雞嶺一帶有蒲嶺，近機動部隊基地有蝴蝶山(箕勒仔)，呢兩座山其實係封死哂d風，所以百和路一帶其實一d都唔通爽，熱到不得了。
其實我好多野都想知既就係，嘉福一帶係未起呢條邨之前係咩?聽我媽講，係好多年之前，大概係80年代，係菜田、木屋區...如果有人比到好多年前既地圖，我好想知上水、粉嶺之前係點既樣。
其實有好多無稽之談係關於靈界既事，有人話天平路李志達紀念學校以前係墓地，有個d白癡鬼故事，我一諗就諗到一定無可能!因為按地理黎講，李志達地皮係平地，點會有人係到攞黎做墳地?再者墓地其實係華山係已經有，咁點會有人仲攞黎整墳?
不過我更想知，現時清河邨地皮，點解一直都無人用過?我係屋企一帶望過去見到雞嶺村同丙崗，但係早前未起清河邨，咁呢片地係有咩係到?我見個一片地係完全無人為運用過，起初我會覺得應該會有農業，但係都見唔到有開闢過既痕跡!但係丙崗個邊近而家風采中學出面迴旋處有咁大條雙魚河，但無見到有任何廢田...咁呢片唔通咁多年都係一片荒野?
我更想知既係，當初香港淪陷三年零八個月既時候，日本軍隊有冇進入過新界?因為我好記得蝴蝶山係山頂落蕉徑既時候，有一個好似碉堡機槍窗口既物體，另外雞公嶺山上有好殘舊既有刺鐵絲，有類似戰壕、小碉堡既物體...個d格局好似我係行山上城門水塘個d咁，物料都好似...唔通日本當年同英軍都有係新界火拼得好激?
至於亂葬崗，日本軍隊最多呢d case，但係上水粉嶺有冇呢，亦都係好想知!
其實住太平、警宿、紀律部隊宿舍、上官、有係行路去北區醫院工作...應該會知有一條橋，即係火車站天橋再向太平邨方向行橫距高速公路...係有單車徑個邊，有一塊雲石碑.....個塊又係咩黎既呢?一條天橋搞咁多花臣?
|
