又一個星期日, 又要展開每星期一度既咖啡拉花特訓!!

今日想話拉個心, 點知又失敗左, 唯有整d朱古力醬上去雕花, 以作一點安慰......

用朱古力雕花真係易過拉花好多!! 得閒都可以向呢方面研究下!

尋日同mani 去杜比屋企開爬地時, 都用左少少時間來個小型咖啡品嚐會~

試左3隻唔同既咖啡, 其後再加拉花!

^第一杯: mani 由澳門買番來既咖啡豆, 未加奶/糖之前--> 味濃,回甘重, 有陣朱古力味, 唔酸

拉花: mani 想拉個心, 點知變左哈哈笑

第2杯: 我o係印尼舖買既咖啡豆, 未落奶/糖前: 味清新, 冇咩回甘, 唔酸, 一飲入口咖啡味都重, 但一下即散, "彈" 花一現, 感覺幾特別, 做餐飲幾好

拉花: 我想拉個心, 但好似變左個音符

第3杯: 我o係網上面 fresh coffee 買既Fruity Expresso Blend豆, 未落奶/糖之前: 味道濃, 回甘都ok, 有果香味, 好酸, 幾得意

拉花: 我再次想拉個心, 點知今次拉左個孖潤腸出來,唯有加隻眼比佢變條魚啦! (繼四腳蛇之後, 又一力作 =.=II )

話說mani 話想跟我學整餅, 見星期六又得閒冇野做喎~

又難得杜比無啦啦屋企多左個焗爐! 咁就一行2人衝上去杜比屋企倒亂一下佢個廚房勒!

今日我地整左意大利藍莓芝士凍餅+ 日式焗年糕+ 西班牙焗肉醬意粉+印尼沙嗲雞串~ 幾咁fusion!! 嘩哈哈

事不宣遲, 開始第一味菜:

西班牙焗肉醬意粉

材料: 西班牙香腸 15片, 意粉 1包, 蕃茄 3個切粒, 免治牛肉 200g, 磨姑 5粒切片, 洋蔥粒 1/4個, 意粉醬 半樽, mozzarella (馬蘇里拉)芝士, 百里香, 水, 鹽, 糖

醃料: 豉油, 酒, 糖, 麻油,  林炒時加少少水(會令牛肉冇咁鞋)

做法:

1) 先將免治牛肉用醃料醃1小時

2) 煲熱水, 加少少鹽, 油, 放入意粉煮熟後, 倒出過冷河備用

3)燒熱鑊, 加入油, 爆香洋蔥粒, 加入(1),磨姑片炒至半熟

4) 加入蕃茄粒拌勻後, 加入意粉醬及水煮至杰身, 加入百里香, 鹽, 糖調味.

6) 淋上(2) 面, 再舖上西牙香腸, 灑上mozzarella 芝士,  放入200度焗爐中焗至金黃色完成

芝士拉出來一糸糸, o岩曬我地呢d芝士怪! 哈哈

芝士焗日式年糕

到第2味, 可以話係小食來既, 勁簡單!

材料: 日式年糕 4塊, 椰漿 100ml, mozzarella (馬蘇里拉)芝士

做法:

1) 把日式年糕放入170度焗爐, 焗型脹起

2) 在表面上搽上椰漿, 灑上芝士

3) 焗溶芝士就可以了

<-- 拿出後, 再點上椰汁食, 煙煙勒勒 正!!

印尼沙嗲串燒雞

又係一味勁簡單 , 0 難度既小食

材料: 印尼沙嗲雞串粉 1包, 椰漿(小) 大半罐, 雞扒 2塊

醃料: 酒, 薑蓉, 胡椒粉,鹽

做法:

1) 雞扒去皮切件, 加入醃料, 印尼沙嗲雞串粉, 椰漿 醃1小時

2) 用竹簽串起(1)

3) 放入200度焗爐內, 焗熟, 及金黃色 (大約40分鐘左右)

<--香口, 印尼風味極重!

藍莓芝士凍餅

話咁快來到食甜品勒!

因時間關係, 我地下午經整定, 雪左o係雪櫃~ 而家食得勒!

材料(6吋蛋糕份量)

忌廉芝士        70克

藍莓               180克   

糖                    50克

魚膠片           7克

淡忌廉           120克   

餅底粉           60克

牛油                30克     

製作

1. 將牛油坐於熱水中直至變成牛油溶液

2. 將牛油倒入餅底粉(60克粉30克牛油), 將牛油及餅底拌勻

3. 倒入餅圈後鋪平, 然後雪入雪櫃

4. 將70克忌廉芝士搓爛, 加入50克砂糖(甜度自己控制), 然後打至滑身, 再用刮刀刮起備用

5. 將7克魚膠片浸於凍水中, 變成o者o里狀狀之後撈起

6. 將120ml淡忌廉打起至剃鬚膏質地, 然後將(4)加入後拌勻至幼滑

7. 將180克藍莓倒入(6)混合物中, 然後拌勻

8. 將(5)坐於熱水當中溶至水狀, 然後倒入(7)混合物之中, 快手拌勻

9. 倒入餅底中, 然後鋪平, 不平的抺走

10. 雪入雪櫃兩個鐘

11. 用熱毛巾乎在餅圈外面一會, 然後把蛋糕脫模, 於餅面裝飾, 完成

<-- Mani 人生中第一個cake, o係我指導下完成!恭喜曬~

最近好友珊兒在西班牙回來, 買了一包西班牙米和史上最貴的香料: 番紅花 給我做手信!

有這麼好的主料, 當然要買一些海鮮回來做一頓西班牙炒飯啦! 成個鑊的飯10分鐘就比家人吃曬~ 如蝗蟲般飛過一樣XD

事不宜遲, 等我講一下如何做吧!

材料:

西班牙米 500g, 

西班牙腸 200g,

雜豆 200g(正常用青紅椒各半個),

雞脾肉 2塊,

番紅花 Saffron 2g,

虎蝦 數隻,

魷魚 1隻大,

帶子 數粒,

青口 數粒

白酒 適量

清雞湯: 1000ml

洋蔥 : 1個

做法:

1)  洋蔥 切粒, 雞脾肉切粒, 魷魚切圈

2) 雞脾肉加酒, 薑汁, 胡椒粉, 糖, 麻油, 雞粉淹1小時

3) 大火燒熱油, 加洋蔥粒炒香, 加入西班香腸(留幾片備用), 加入2, 炒至金黃色

4) 加入西班牙米, 炒至半透明, 加入雜豆(或紅青椒粒), 拌勻

5) 加入1000ml清雞湯, 加入番紅花拌勻, 輕輕弄平, 之後就請勿再攪!!

6) 見到大滾之後, 轉至中慢火

7) 在飯面加入魷魚圈, 帶子, 虎蝦, 青口 煮至飯收乾水, 飯熟

8) 加入少許雜豆, 少許黑椒, 西班牙腸 作裝飾, 完成

p.s. 正常係會用青紅椒的, 但我唔鐘意食青椒, so 轉用色彩繽紛的雜豆

  <--完成品, 成個鑊上!

  <-- 珊兒買給我的手信 西班牙米 <--史上最貴的香料, 番紅花 (請閉氣,真係呼吸大力d都吹走)

上星期艾美因公作需要要入大澳, 我緊係唔放過呢個機會啦!

托她買大大隻的金蠔回來給我! 今天就用來整粒粒金蠔勒, 送飯一流呀! 大人小朋友都鐘意~

材料:

金蠔 8隻, 洋蔥1/4個, 豬肉碎 500g, 冬姑 幾隻, 雜豆 1碗, 薑汁

調味: 酒, 糖, 雞粉

淹料: 豉油, 糖, 胡椒粉, 雞粉, 酒, 麻油

做法:

1) 把豬肉碎用淹料淹1小時

2) 金蠔 , 冬姑要用水浸2小時, 之後瀝乾水份, 金蠔加入薑汁蒸半小時後, 放涼切粒備用

3) 洋蔥切粒

4) 燒熱鑊, 加入洋蔥粒炒香, 加入 1 , 炒至金黃色, 加入酒

7) 加入金蠔粒, 冬姑粒, 雜豆, 粉至熟

8) 加入糖, 雞粉炒勻就可以上碟了

p.s. 本身蠔士會有一陣味, 唔係個個人都鐘意, 我個人都唔太鐘意, 但做了2 的部驟之後, 薑汁就去曬佢o個種味, 留番甘香甜味!! 好好食~~ 大家得閒都試下啦!!

p.s. 大家可以買d生菜番來包住佢食, 一樣都好好食~

D蠔真係好大隻架!!  好肥美~ 送飯一流!

最近開始迷上了品味咖啡, 及拉lattle art~

早前得知舅母參加了咖啡課程, 我就向她偷師了。

今天相約了mani 到杜比家品嚐上次在台灣買回來的峰大咖啡豆~

mani 自在台灣峰大咖啡喝了一杯咖啡之後, 就開始對咖啡感到興趣, 而我更在舅母偷師後, 抱著一試的心態和mani研習咖啡勒~

今天放工後, 相約杜比,mani 去油麻地上海街買煮咖啡用的mukka壺, 行了整整一條街, 只得2間有得賣, 而且好貴。

那時已經下午5點左右, 抱住死心的心情坐車到荃灣, 想去荃灣千色店墥墥運氣!!

結果, 給我們找到了!! $299 大牌子, 價錢十分合理~ 結果mani 買了~

立即就衝去杜比家中煮咖啡~

今次要用的用具: mukka 壺, 打奶棒, 拉花杯, 溫度計, 主角: 台灣買的峰大咖啡

今次用了維記的全脂奶, 倒入拉花杯中, 坐熱水, 及放入溫度計, 加熱至65度 才可打奶泡

把水放入mukka壺底部, 中層塞滿咖啡粉, 放上爐加熱, 之後咖啡就會在上層壺流出!

奶加熱到65度後, 用打奶棒打至棉滑奶泡 (打奶棒在宜家定私有得買)

左面那杯是成功之作, 第一次成功拉到花, 雖然有點像四腳蛇, 就已經好好啦~開心

右邊是太多奶泡的泡泡咖啡, 失敗 XD