| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2017 年 12 月 1 日 星期五  |
| 好酒好肉@串酒里 |
分類: 飲飲食食 |
山林道一帶都有唔少食店, 呢一間似乎係新開既串燒店, 打正旗號主打串燒及酒類, 反正好耐都無食過串燒, 門口個牌上食物價錢唔離地, 咁就一於黎個串燒今晚夜
食店有室外同室內選擇, 咁熱既天氣同我地又唔食煙, 當然選擇坐室內啦, 仲可以望下是日推介有咩好食先
串燒種類選擇多, 分鷄, 豚, 海鮮, 蔬菜及店內推介, 有選擇困難症既友人又發作
由本地釀酒廠麥子釀造既獨家粗口手工啤酒 ($68), 六種口味, 玩味十足之餘又帶點親切感, 本地嘢, 無理由唔撐呀?! 若然多幾個朋友一齊飲, 真係可以組返句句子.............(哈..哈)!
我選擇左呢有香桃紅菜頭成份既"你", 飲落偏桃味, 特別得黎都幾容易入口~
呢客川燒爽彈火鷄腎 ($32/2串), 口感相當彈牙, 食落唔乾身, 配埋惹味調味粉, 味道唔錯!
佢地燒蠔都有幾種燒法, 我地試左呢款日本鷄蛋燒廣島蠔 ($69/2隻), 店員話要連埋蛋汁一齊食, 蛋汁加添左香滑度, 蠔本身唔算大隻, 但食落都有蠔味!
燒好既鷄泡魚乾切成一條條就成為呢客惹味汁燒鷄泡魚乾 ($49), 魚乾本身搽埋醬汁, 燒完都唔太乾身, 味道偏甜, 再點少少沙律醬一齊食, 甜滑度再增加!
辣味刴椒燒8吋虎蝦 ($49/1隻), 刴椒放上蝦身一齊燒, 少許辣味滲入去彈牙蝦肉, OK既!
汁燒娃娃菜 ($19), 燒BB露荀 ($39), 2 款燒完都仲好JUICY, 娃娃菜搽左醬汁一齊燒, 食落味道甜美多汁; 而個BB露荀食落無渣, 果然夠BB!!
鹽燒厚切牛舌 ($49), 牛舌採用草飼牛, 比穀飼牛更低脂及膽固醇, 厚切令口感爽口又多汁, 必叫之選!
扎幌芝麻香燒鷄翼 ($24/2隻), 鷄翼飽滿, 燒得皮香肉嫩, 加埋芝麻既香味, 更加香口!
生燒勁辣大鷄脾 ($49), 上枱時簡直嚇我地一跳, 超大隻..............廚師將鷄脾界一刀再平放, 製造成一塊"鷄扒"咁, 切起時相當方便; 話係勁辣, 其實只係微辣, 鷄肉超嫩滑, 價錢同份量唔成正比呀!
香草燒紐西蘭羊架 ($59/2隻), 用手揸住錫紙部份進食超方便, 羊架帶點"膻"味, 配合埋香草一齊食係傳統做法, 肉質燒後唔嚡同乾, 喜歡既可以唧少少檸檬汁點綴!
侍應服務良好, 每當你點既菜式全部上晒時佢會話你知, 呢點都幾好喎, 尤其係食串燒時你係唔會記得你點過D咩, 當知道食晒 ROUND 1時又可以再叫ROUND 2..............! GOOD!! 同埋無需擔心食完會一身燒嘢味, 因為係廚房燒好先上枱, 聞到既只會係食物既香味!
LIKE 佢 FB有嘢送:
串酒里: 尖沙咀山林道6號B舖
contact me : [email protected]
|
| 2017 年 11 月 24 日 星期五 陰晴不定 |
| 韓食到一個點@韓讚 |
分類: 飲飲食食 |
係銅鑼灣返工既食力組組員話係呢幢大廈入面新開左呢間韓食店, 叫我同佢去食芝士鍋, 身為芝士控既我又點會拒絕呢?!
呢間韓食店似係走新式年青路線, 地下七彩既六角型地磚, 配上顏色繽紛既餐椅及掛上星星及波波燈, 播著輕快音樂, 比人一種幾舒服感覺!
坐底後侍應先送上前菜2款, 喜愛佢既甜味薯仔粒, 可以任食就好啦!!
打開餐牌睇下有咩食先, 食物選擇都唔少喎, 包括沙律, 小食, 鍋類, 主菜類等
仲有特式飲品供應
點左一客原味泡菜餅 ($88), 煎成一大個圓圈再切成一小件, 方便進食! 煎到外面脆身內裏軟糯, 食到泡菜既味道, 喜歡佢邊位既硬脆, 點埋個醬汁好好味!
經常係韓劇見到演員食飯時有湯送白飯, 呢客紅卜卜既海鮮豆腐湯 ($98), 上枱時仲係好滾熱辣, 湯底味濃帶有少許辣度, 材料有豆腐, 生蛋, 蜆, 蝦等, 用黎送白飯都唔錯, 食完成身都熱晒!
到左今餐既重頭菜出場 - 韓潮春川芝士鍋(鷄肉) ($278), 呢個鍋仲有牛/豬肉選擇, 腦海已設定芝士要配鷄, 所以就要左鷄肉! 呢個鍋係即場由侍應烹煮, 送上擺碟靚仔既食材, 見到都幾豐富, 圍邊有蘿蔔, 翠玉瓜, 冬菇絲, 紫椰菜絲, 年糕及鷄肉!
先落蒜粒及油起鍋先, 蒜粒既香味散發出黎, 先落鷄肉同椰菜炒香, 跟著就落埋其他配料, 然後再倒芝士粒於鍋邊, 等芝士熔掉就可以開始食啦!
將鷄肉及年糕用芝士包住食, 芝味滿分, 鷄肉幾滑及加埋辣醬一齊炒都幾入味; 而年糕被芝士包圍住既口感軟糯, 甜辣年糕加埋咸香芝士, 味道好有層次感! 實在太邪惡啦!
未完架喎, 之後仲會放湯煮韓國拉麵, 麵質比較煙韌, 食埋呢個真係飽到一個點呀!
韓讚: 銅鑼灣渣甸街66號Aura on Pennington 2樓
contact me : [email protected]
|
| 2017 年 11 月 21 日 星期二 陰晴不定 |
| 芝士火鍋出場啦喂@Sodam Chicken |
分類: 飲飲食食 |
哈韓友人提議去食炸雞, 呢間就系佢上次食過要回頭
場內以木作主打裝潢, 設有電視不斷播放著K POP MV, 真系識唱既可以跟住一齊唱(哈...哈......)
打開餐牌, 見到炸雞/焗雞類都有好幾款, 有骨無骨都有得選
除左炸雞類, 都仲有其他特色菜式, 例如有榴槤芝士炸雞, 榴槤芝士薄餅等, 其他韓食/薄餅/沙律都有供應
清新之選當然要叫個凱撒沙律 ($80), 份量唔細, 細胃口既人士真系可以食呢個當晚餐, 至於我地.......當然系當頭盤啦, 沙律菜咬落爽脆多汁, 配以煙肉碎(脆口點會好D)及芝士碎, 增加鹹香味道!
雖然近日天氣涼返D, 但無減我對水冷面既支持度, 加上唔系好多地方有供應, 呢碗韓式涼拌水冷面 ($80)就成為我今餐菜式之一! 無肉之選, 全碗材料有泡菜, 蘿蔔絲, 青瓜條及烚蛋, 冷面口感比較煙韌, 湯底夠凍及帶少少酸味, 食落為之醒神及醒胃, 䓤花粒更增加香味!
見到有芝士火鍋上場, 就想由炸雞轉會去芝士火鍋, 友人話未試過都想試下, 一于黎個特級芝士火鍋 ($278)
食材包括手工流心芝士年糕, 紫薯年糕, 美國豬仔骨, 黃金炸薯條, 腸仔, 車厘茄, 農夫包粒, 份量都幾豐富, 足夠2-3人分享!
芝士鍋底慢慢加熱至滾起就可以起動, 用支長叉放食材入去, 給食材一件芝士"外衣", 其中既農夫包索盡芝士醬汁, 簡直系絶配! 另外佢既美國豬仔骨味道辛辣, 點左芝士汁又另一種味道; 佢既薯條及芝士年糕亦都同芝士鍋底好夾, 每一啖都食到濃香芝士味! 最驚喜系個芝士鍋底味道香濃得黎但食落都唔會好"膩"感! 水準唔錯!
期間可免費加添芝士火鍋一次, 慢慢食都可以, "芝"味滿分!
呢度有多款水果味燒酒, 啤酒, 特飲及非酒精類飲品
我就叫左呢杯Apple Cider Rita ($78), 外型系典型韓國雞尾酒式賣相, 味道有蘋果既酸甜味, 可以中和一下芝士火鍋既味道, 有少許酒精成份, 飲完暢快無比!
Sodam Chicken : 銅鑼灣耀華街3號百樂中心7樓
contact me : [email protected]
|
| 2017 年 11 月 17 日 星期五 |
| 貼心維修&保養售後服務@SUDIO |
分類: 潮生活篇 |
只要獨個兒外出時, 車程途中我都喜歡聽下音樂或睇片, 跑步時更唔少得佢, 真係有勞SUDIO無線藍芽耳機, 伴我左右!
哈...............使用率咁高, 難免會有"生病"時! 但身為SUDIO耳機的用家的我，無有怕喎! 皆因我知道如所購買的耳機仍然係一年保養期內，而又發現耳機出現問題(非人為造成)，都可體驗SUDIO的一年保養"新產品更換服務"
耳機產品型號同顏色：（Vasa 需填寫 IOS 或Android 客戶端）
電郵：
住家地址：
通訊號碼：
問題陳述：
地點和購買日期: 電郵時請連同購買憑證／收據
而SUDIO官方網路上購買顧客，僅需告知SUDIO電郵地址，姓名，亦或訂單號，即可享受一年保養&維修售後服務。 無需提供收據或保養卡片。
當SUDIO客戶服務部收到電郵後，㑹係24小時內回覆及安排1週內發送一副新耳機給客人! 仲有埋靚靚TOTE BAG附送!
盒內包括所有配件 : 精美皮套，叉電線，後備耳套
過程簡易方便，呢個咁貼心既維修/保養售後服務，只有SUDIO既用家先可享受到!
詳情亦可參考SUDIO香港&澳門官網獲取支援服務：www. sudiosweden.com/hk
有關產品由品牌提供, 內容純個人分享
|
| 2017 年 11 月 13 日 星期一 時晴時雨 |
| 丼丼聲@豐洲水產海鮮丼專門店 |
分類: 飲飲食食 |
係旺角行完街就係附近搵下地方開餐, 行下行下就比呢個窗口吸引住 : 生鮪, 大漁, 海老, 鮭, 雲丹, 蟹...............同友人不禁互望一下就知大家腦諗緊咩
3分鐘後我地就上到去呢個門口
餐廳環境以淺木作裝潢主題, 一貫日式餐廳佈局, 中間掛上一幅鮮艷旗幟寫住"大漁", 都知道以海產作賣點
侍應送上餐牌及熱茶, 相片吸引住我的視線, 呢度主打係食海產丼,價錢由百幾蚊至三百幾, 丼既款式都算多款, 我同友人都要花點時間去選擇...HEE.......HEE.......
想再加多D刺身? 無問題!
呢度除左丼之外, 仲有小食供應, 每款都係幾十蚊就有交易, 叫多幾款都唔肉痛
友人係吞拿魚控, 呢一客飛天黑鮪大滿貫丼 ($298)就相當岩佢食, 每個丼都包埋一個麵豉湯
呢個黑鮪大滿貫丼包括大拖羅, 中拖羅, 赤身及魚腩蓉
魚肉顏色鮮明吸引, 每片都有一定厚度, 食起上黎都相當有口感, 大拖羅肥美嫩滑, 咬下去係口腔感到香滑油香感, 但又唔會太過肥膩; 中拖羅味甜腍滑; 魚腩蓉更有魚肉味! 附有紫菜, 可以用黎先包住食, 紫菜既脆感同魚肉既嫩滑感, 又有另一種和諧食法!
我就叫左呢客甜蝦海鮮丼 ($148), 亦都有麵豉湯
食材包括三文魚, 甜蝦及松葉蟹, 甜蝦當然味鮮甜, 都唔細隻, 一口食晒相當滿足; 松葉蟹味甜但肉質偏硬身少少; 三文魚就一貫味道, 驚喜感欠缺
 
侍應建議先飲附送既麵豉湯, 份量都幾大碗, 先飲一啖覺幾鮮甜, 原來有埋魚肉一齊煮, 唔怪之得好味D
呢度既芥辣係磨出黎, 辛辣程度勁過坊間其他食店用開既開粉及膏狀, 幾刺激; 另外唔能夠唔講另一主角白飯, 飯粒食落幾煙韌, 夾起黎食都唔會散開, 個人黎講幾鐘意
只食丼又點夠呀? 女仔當然多心想食下其他野啦, 呢客咁靚仔既自家製明太子蛋卷($38), 上枱時熱辣辣, D煙係咁飄出黎, 當然要趁熱食啦, 蛋味道帶甜, 中間有明太子既爽脆感, 口感味道各有不同, 但夾埋一齊又幾夾喎!
呢客鹽燒鮪魚鮫 ($128)絶對唔可以錯過, 份量都唔細, 即叫即燒, 燒到皮脆肉嫩, 而且魚鮫位都幾多肉, 點上附上既特式醬汁, 係好好味架
 
侍應不時主動加茶, 飲啖茶, 食下丼, 冷飯與熱茶之間, 味鮮......................大滿足!
|
« | 28 | 29 | 30 | 31 | 32 | 33 | 34 | 35 | 36 | 37 | ... | 147 | »
|
