| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2017 年 11 月 2 日 星期四  |
| 豐富刺身定食@錫池 |
分類: 飲飲食食 |
同事升職請食飯, 安排左去呢間食日本野, 店內面積唔算太大, 設有一間房間, 好彩可安排入房坐, 就算關了間都聽到出面食客交談聲!
午餐定食有15款比你選擇, 有生熟食物提供, 有同事之前試過雜錦刺身 ($290), 見佢今次再食, 一於死跟! 哈............
整個定食包埋沙律, 主菜, 白飯, 麵豉湯, 漬物, 是日甜品及咖啡/茶
沙律有3款選擇 : 煙三文魚, 凱撒, 巴馬火腿, 我所選係煙三文魚 : 爽脆既沙律菜, 幾片煙三文魚, 淋上醬汁再灑上芝士粉及脆口多士粒, 略嫌醬汁重味左少少!
刺身出場啦, 無論賣相或份量都相當有睇頭, 魚生包括油金魚, 鱆紅魚, 三文魚, 吞拿魚, 赤貝, 牡丹蝦及海膽少許! 刺身口感幾好, 食得出鮮味, 其實只食刺身都好飽下! 白飯仲可以加添!
是日甜品係芝麻/綠茶雪糕, 不作他想點左綠茶, 雪糕質感係幼滑既, 但綠茶味偏淡, 點到即止, 作為過下口癮係OK既!
侍應不時入內加茶, 服務態度OK!
錫池: 灣仔港灣道8號瑞安中心1樓101舖
contact me : [email protected]
|
| 2017 年 10 月 20 日 星期五 |
| 又再"番本" |
分類: 飲飲食食 |
呢個星期忙了幾整天, 身心俱疲, 忙完後當然要慰勞一下自己, 任食任飲既放題絶對幫到手, 呢間地點方便易搵, 水準不俗, 回頭率當然高啦!
刺身多達十數款, 連鼻拔蚌都有, 最喜愛佢既甜蝦夠大隻, 一口一隻夠口感; 另外帶子亦有一定厚度, 唔會切到薄片咁, 食落亦有甜味! 全部刺身亦已解晒凍, 唔會仲食到冰感!
壽司係一口SIZE, 唔怕食幾舊已"塞"飽你個肚, 賣相精美靚仔, 口感味道唔錯, 絶對可以加單!
蟹粥一客夠2-3人分享, 蟹件就細隻左D, 但食落都有蟹既甜味, 粥底煮得夠綿滑, 入口時亦夠熱, 味道都算唔錯!
呢客清酒煮白蜆夠晒份量, 每隻白蜆都有肉, 雖則肉細但有蜆味, 無沙粒, 湯底夠淡口但如果清酒味濃D會好D!
任飲項目除左汽水菓汁需要自己出去拎之外, 呢度仲有啤酒, 梅酒及清酒供應, 只需要係單紙落單就OK! 點了梅酒, 加冰一齊飲, 甜甜地好飲喎!
每次食放題都不會放過既炸物出場, 有天婦羅蝦, 南瓜片, 甜蕃薯粒, 龍脷柳, 炸漿唔太厚, 食落熱辣辣同唔會一口油, 配埋個天婦羅汁增加味道!
呢度既紫芋丸及芝士年糕每次黎都總會叫, 原因好簡單, 好味既東西又點可能錯過?! 兩者入口時仍然係熱辣辣, 紫芋丸外脆內有香甜餡料; 而個芝士年糕咬開香脆外皮, 入面既軟滑芝士就會流出黎, 一硬一軟, 口感味道滿分!
呢度仲有蒸氣火鍋供應, 配料都包括海鮮類(蝦, 貝類, 章魚, 魷魚), 鷄肉, 肥牛, 蔬菜菇類(南瓜, 椰菜, 娃娃菜, 金菇, 冬菇), 絶不欺場, 一邊蒸, 一邊食住其他食物, 嘴裏不停食, 超滿足!
若想"番本"有餘?! 就要食埋佢既甜品, 有奶凍, 雪糕杯及雪米糍!
侍應接單反應快, 不時主動清走食物碟, 食物上枱時間亦都夠快, 唔會等好耐先有得食或出現漏單情況, 難怪每次黎都座無虛席, 預先訂位也是常識吧!
番本日式放題 : 旺角西洋菜南街168號3樓全層
|
2017 年 10 月 16 日 星期一  |
| 確係"巧得"@巧得鍋 |
分類: 飲飲食食 |
係觀塘區既工業大廈搵食已經形成氣候, 星期六日呢度都好似旺角咁人流不絶, 想食咩餐都差唔多可以滿足到你! 今次黎呢度係食火鍋!
店內面積唔算好大, 冷氣足, 燈光悠和坐得都算舒服!
餐牌上供應幾款火鍋底, 除左有招牌鷄鍋, 烤魚鍋, 特式海鮮鍋外, 仲有其他大路湯底; 火鍋配料選擇都唔少!
呢間火鍋店除左有火鍋食外, 仲有刺身供應, 未開始火鍋可以試下"凍盤"
大量醬料比你"混醬"
清清地叫個皮蛋芫茜鍋 ($68), 湯底有大量皮蛋芫茜及薑片, 啖頭啖湯都幾重薑味! 呢度個爐仲可以燒烤, 可以叫D海鮮同牛肉黎燒都唔錯! 一爐兩食, 各式其色!
呢款白靈菇 ($32)之前係米線舖食過, 又唔係好多地方有得食, 烚完食都好爽口, 亦無菇既霉味!
友人火鍋必叫之一白鱔 ($78/例), 片得夠薄身又夠長, 唔會烚完得返好細舊, 質感幾彈牙但魚味偏淡!
又黎至"索"火鍋配料, 蜂巢豆腐 ($28), 一客份量都唔少, 用黎索湯又至岩, 軟棉棉質感食時小心熱湯燙口!
呢到既蔬菜又幾抵食, 咁大盤既皇帝菜 ($25)及唐生菜 ($25), 都係咁既價錢, 抵食過出面叫碟效外油菜, 質量仲幾靚仔, 唔會比D"霉"菜你!
見有個燒烤爐係度, 點左呢個掛架安格斯牛頸脊 ($168/小), 賣相幾得, 長塊既足有成個竹簾咁長, 個人黎講覺得呢碟都有D肥, 放於燒烤爐上燒一陣就食得, 肉味幾濃!
呢度既嚮鈴 ($28)亦係好抵食, 成碗滿滿的, 個子唔算十分巨大, 反而咁仲好, 唔會食一條已經覺好肥膩, 烚十零秒就食得, 亦係索湯之選!
一客六粒既手打墨魚丸 ($68), 外觀唔圓滑, 證明唔係"啤"出黎, 面頭有少少蟹子, 食落更有脆卜感, 而咬開一半時感覺佢既彈牙感唔野少, 而且食到料夠足, 呢味丸真係相當唔錯!
仲送埋甜品, 分別為原味3.6牛乳布丁及宇治綠茶3.6牛乳布丁, 個人較為喜歡原味, 香甜幼滑!
係工廈開餐, 除左因租金平D而令食客得益外, 食物水準亦唔會差過旺區街舖, 食得唔錯又消費貼地, 搵食又多左個好去處!
巧得鍋: 觀塘成業街15-17號成運工業大廈1樓12-14號舖
contact me : [email protected] |
| 韓食之夜@Oppa Coffee Bar Restaurant |
分類: 飲飲食食 |
新一輪韓劇又登場, 燃點起想食韓國餐既火, 呢條街好多韓國餐廳, 友人話去試呢間!
面積唔算好大, 牆上設有電視不斷播放K-POP MV, 又以各類韓式飲品/酒類作點綴, 增加韓流氣氛^^
打開餐牌, 無論新式或傳統既菜式都有, 新式既有蛋漿熔岩炒飯, 芝士肉類, 韓式炸鷄等, 傳統如煎餅, 紫菜包飯, 炒年糕亦一樣有
韓國人好"酒"就一定係, 呢度仲供應各類韓式燒酒, 米酒/梳打酒, 非酒類就有韓式罐裝飲品
先黎呢個韓國泡菜煎餅 ($150), 一大個橙色圓圈已切成一份份, 口感比較軟糯, 有D似"薄撐", 同食開既脆身有D唔同, 可以試下唔同口感都幾特別; 啖啖都食到泡菜, 泡菜既微酸味配埋煎餅汁既味道, 唔錯!
呢度有多款炸鷄供應, 但基於人少又想試下其他菜式, 就點左呢個一樣有炸鷄既炸鷄柳沙律 ($130)! 一客有6件炸鷄柳, 香脆外皮唔太厚身, 鷄肉仍然保持肉汁唔會乾身, OK滑喎! 怕熱氣既, 可食返D沙律菜同酸蘿蔔粒, 呢個"炸鷄"替身好稱職呀!!
睇韓劇都知當地人無論幾熱幾凍都會食人蔘鷄黎補身, 今晚就同友人一齊挑戰呢客人蔘鷄湯 ($180), 用氣爐再滾返起就食得! 原隻鷄"浸泡"於人蔘及紅棗湯底, 滾起時聞到幾香人蔘味! 鷄身內有乾坤, 包括糯米及粟子! 未食鷄肉時先飲頭啖湯, 湯味道好夠味, 鷄肉無需點胡椒鹽都夠味, 肉質算嫩滑, D鷄骨已餚至稔晒, 咁既湯底點會唔好味呢?!
OPPA侍應年青有活力, 反應夠快, 坐坐下都爆滿, 好在一早BOOK左位, 唔係睇怕呢餐要走多轉先食到!
Oppa Coffee Bar Restaurant : 尖沙咀金巴利街1號F地下
|
| 2017 年 10 月 3 日 星期二 |
| 泰好味道@1988 |
分類: 飲飲食食 |
去附近大商場買完野, 好自然食埋飯先返屋企, 一早訂好位去呢間開於工廈既泰菜館開餐, 去到唔駛再等就直接入座!
喜愛佢既簡美餐具, 無論牆或枱面無多餘擺設, 可完全用心享受食物!
餐牌上提供小食, 沙律, 湯, 主菜, 蔬菜, 飯粉麵類, 仲有各款飲品
肚餓啦, 叫左呢款食物 :
顏色吸睛既呢客係鳯爪沙律 ($58), 份量唔少既雪白爽口無骨鳯爪好入味, 配以酸辣汁, 加埋芹菜, 紫洋䓤及甘荀絲, 增加不同口感, 愈食愈辣但又幾過癮!
上黎食過呢客泰國脆脆鷄翼 ($56), 對佢甜中帶咸既惹味味道念念不忘, 今晚一定要再會一會佢! 6隻飽滿既金黃色鷄翼平排, 外面灑上芝麻加添香味, 皮脆肉滑, 真係好好味!!
食左咁惹味既脆脆鷄翼, 一於叫番杯青檸梳打 ($26), 夠晒冰凍又有氣, 一飲GUR晒!
見隔離枱叫左呢客海南鷄 (半隻/$98), 無骨鷄肉食起黎相當方便, 雖則鷄味偏淡, 但肉質好嫩滑, 鷄皮下無多餘肥膏, 只見到一層透明"啫喱"狀, 備有兩款醬汁點鷄肉, 個人比較喜歡海南鷄醬, 酸中帶微辣!
友人想食炒飯, 於是係泰式/蝦醬二選一中, 蝦醬炒飯 ($88)跑出, 賣相靚仔, 中間當然係主角蝦醬炒飯, 側邊有酸味青芒絲, 香味蛋絲, 甜口豬肉鬆及幾片蠟腸伴著! 個蝦醬炒飯混有紅色細蝦仔, 豆角段及紫洋䓤, 無論味道及口感都相當豐富, 而個豬肉鬆撈埋個飯一齊食, 咸香中帶甜, 又幾夾喎! 一客份量唔少, 足夠二人分享!
 
呢度仲有埋甜品供應, 毎款只係$38, 相當抵食, 但由於都幾飽, 甜品....................................期待下一次有機會食!!
1988 : 觀塘興業街16-18號美興工業大廈A座1樓A3室
contact me : [email protected]
|
« | 29 | 30 | 31 | 32 | 33 | 34 | 35 | 36 | 37 | 38 | ... | 147 | »
|
