| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2017 年 1 月 26 日 星期四  |
| 小白屋@Sweetology |
分類: 飲飲食食 |
已有一段日子無去過又一城行逛, 適逢要去買聖誕禮物, 任務完成後當然就係場內搵地方開餐, 諗返之前都食過呢間係溜冰場附近, 外型好似白色小屋既西餐廳, 見仲有位就一於行入去!
靚靚既白色主題佈置, 加上特設聖誕佈置, 好有外國小屋FEEL, 坐得幾舒服, 仲有播住輕快既聖誕歌曲伴食!
見餐牌封面寫住All Day Breakfast, Dessert and Drinks, 當然唔只得All Day Breakfast食啦, 有Pasta/Rice Set, 仲有 Pizza
點左2個Pasta Set, 呢款係煙三文魚忌廉汁意粉($62), 賣相幾靚仔, 三大片煙三文魚舖上面, 面頭洒上少少芝士及香草碎
初試一口煙三文魚, 煙燻味唔算好重, 食落肉質幾柔滑又唔太咸, 菇菌作為配料, 有少少口感既意粉索到忌廉汁, 無論口感及味道都唔錯!
另一款為焗拿破崙茄汁香草腸長通粉 ($60), 上枱時已聞到好香茄汁味, 熔化左既芝士舖滿係香草腸及長通粉上, 令人口水直流
每一條既長通粉都有茄汁, 食落酸甜好醒胃, 亦可化解左香草腸既膩感, 配搭幾好, 一客份量適中, 仲可以有位食埋個甜品先!
甜品種類選擇多樣化, 有窩夫, 蜜糖吐司, 新地, 梳乎厘, 甜品控黎呢度就不得了囉...........哈
睇甜品版面已經被呢個朱古力及堅果蜜糖吐司盒子($68)所吸引住, 一客份量適合2人分享, 香脆 既蜜糖吐司已切好3條, 方便分享, 配上香濃既朱古力雪糕, 邪惡地再沾上朱古力香甜醬, 一次過放入口......................甜美味道令人覺得好滿足呀!
Pasta Set包柚子冰紅茶, 想飲咖啡奶茶或紅豆冰只需加$8, 我就點左呢杯熱咖啡, 香滑無比, 呢$8絶對抵加!
Sweetology地址: 九龍又一城UG層UG22舖
contact me : [email protected]
|
| 2017 年 1 月 24 日 星期二 |
| 有辣有唔辣@友心私房菜 |
分類: 飲飲食食 |
食米線我會叫酸辣/麻辣, 對於辣度我可接受既程度係小辣, 今晚居然會去食川菜, 又睇下我會唔會變孖潤腸出返黎?!.............哈!!
呢間主打川菜既食店, 前身係食傷心酸辣粉專門店, 店內設有卡位, 坐得都幾舒服, 幫襯既見有講國語, 甚至乎外國人, 吸引力果然夠大呀! 見枱上有呢樽魔鬼辣椒粉, 寫既字句好有威嚇性又充滿玩味, 我只觀賞, 無膽量去試!
打開餐牌, 食物賣相紅噹噹, 好彩食店設有6種程度既辣度, 由勁辣到走辣, 都照顧到不同顧客食到既辣度
可能迎合香港人口味, 呢度都有粵菜款式供顧客選擇, 仲有燉湯供應!
見到牆上有呢款鮮椒爽脆生腸 ($78), 作為頭盤都唔錯, 想講既係呢碟真係無改錯名, 果然夠晒爽脆, 生腸咬落去食到醬汁既味道, 少少辣多多脆, 絶對誠意推介
呢款黃燜湯鮮椒煮桂魚 ($288)係餐牌中特別推介, 侍應會問你想要既辣度, 原條桂魚浸煮於胡椒及鮮椒湯中, 魚肉鮮甜嫩滑無咩骨, 食時方便, 仲有魔芋條及酸辣粉作伴食, 開初食都未有咩感覺, 但愈食個咀唇就開始有麻痺感覺, 好過癮呀!
呢款有數不清既辣椒墊底既係重慶辣子圍蝦 ($158), 一碟份量頗大, 蝦既數量都多呀, 相當抵食! 圍蝦被油泡過後, 蝦殼都變成香脆, 味道有點似椒鹽蝦, 隻隻蝦肉彈牙, 咪見佢成碟辣椒, 但又唔係幾辣喎, 應該係廚師會就住顧客所選既辣度而調教!
食完辣野, 埋單時會送上呢款桂花凍作為甜品, 味道少甜似桂花糕既軟身版, 幾唔錯!!
慶幸有得選辣度, 今晚走時無變孖潤腸...............哇哈哈!
友心酸辣粉私房菜: 銅鑼灣渣甸街50號渣甸中心10樓
contact me : [email protected]
|
2017 年 1 月 18 日 星期三  |
| 開動食甜品的胃@Joyful Dessert |
分類: 飲飲食食 |
旺角區甜品店有如遍地開花, 想站得住腳, 當然要有好質數既出品, 呢間有米芝蓮推指南推介作光環既甜品店可為當中之一!
食物選擇多當然會加分啦, 如果唔係食多幾次都試均晒, 你知香港人幾咁愛新鮮感架?!
今次我又搵到新嘢食, 包括呢款新上市"紫薯奶凍" ($54)
兩種紫色拼埋一起, 視覺上已經覺得浪漫, 呢兩種紫色分別來自主角之一紫薯, 面頭深紫色係紫薯蓉, 紫薯味相當濃, 而中間雪糕球食落就知係芉頭味, 淡淡香芉味製成既雪糕球, 口感香滑, 再配合底層既紫薯奶凍, 質感香滑無比, 甜度適中, 再加上灑薄脆片, 口感層次豐富左好多, 絶對不容錯過!
呢款芒果七彩椰果芭菲($59), 色彩繽紛, 好有治癒感, 數個成杯有9層, 頭頂係芒果雪糕, 隔以一層忌廉, 再一層係爆珠及椰果, 再一層芒果雪糕...........哇, 超邪惡, 香滑忌廉同有咬口既爆珠及椰果一齊食, 味道酸中又帶甜, 相當夾!
完全啟動左食甜品既神經, 再叫埋呢個朱古力香蕉窩夫 ($62)
三件朱古力窩夫, 配以一球朱古力雪糕及數片香蕉, 窩夫幾鬆脆及有朱古力味, 但個人喜歡食較鬆軟質感; 鐘意既可以一啖將雪糕, 香蕉及窩夫放入口; 想有儀態少少既可以淋D糖醬伴食...............
價錢與坊間差唔多, 但無論食物質數或份量都相當對眼, 令人食後與店名一樣好開心.........!!
Joyful Dessert House: 旺角黑布街74號藝興大廈地下2及3號舖
contact me : [email protected]
|
2017 年 1 月 16 日 星期一  |
| 終極激光脫面毛大作戰 (第3回)- MediLASE專業之選 |
分類: 療程篇 |
每次一收到佢地既溫馨來電, 心裏就好興奮: 「你好, X小姐, 我地係朗豪坊MediLASE打黎既, 想提提你約左X月X日X點上黎做Treatment......................... 」
因為知道明晚會去到位置超方便(朗豪坊辦公大樓28樓, 港鐵C出口一上就到)既朗豪坊MediLASE享受我既脫面毛之旅
簡約富時代感既裝潢, 一入門口就見到靚靚代言人謝婷婷, 相當吸引!
今次係做第三次療程, 登記完治療師就很快帶我入治療室
有左之前兩次既經驗, 知道晒程序由卸妝潔面開始, 帶好保護眼罩後就可正式開始! 一如以往, 服務細心既治療師係每打一次前都會數"123", 亦會話你知由邊個位置開始, 務求做到整個脫毛過程都一絲不苟! 而係過程中，治療師亦很關心我有否不適情況, 完成後亦會為我搽返保濕產品先離開, 更提我返去要做足補濕程序, 2星期內避免暴曬及做高溫活動, 亦不用花長長的療程時間去敷冰、吹凍風, 真係扮靚都要講求快靚正!
睇下.............只係做左3次咋, 基本上都唔係好覺有毛髮, 由其係上唇位呢D比較易見毛髮既位置! 因為MediLASE 採用PRO-U™ LASER TECHNOLOGY，即是755nm 波長+ 0.25ms脈衝+ 最大機頭24mm。而醫學証實755nm 比 810nm 波長的激光更易被毛髮黑色素吸收，為目前最有效的脫毛激光，更快達至永久脫毛。
另外24mm最大機頭覆蓋率高，比12mm細機頭更有效處理細小毛髮，而醫學證實大機頭令激光能量更能深入毛囊，脫毛效果更細緻。
而脈衝又是目前市場上最短的(市場上一般是3ms)，所以毛髮吸收的激光能量亦係最足夠，唔會好耐都脫唔淨D毛毛。
好多人講激光脫毛會痛或者會凍，聽到都怕。如果唔怕凍都可以去大品牌D記，佢地好細心，會幫您做足保護，唔怕浪費時間，會同你做傳統三重冷凍保護，敷冰，敷凍gel，吹凍風。但我做全面, 三重冷凍保護係保護到皮膚，但搞到個頭會赤赤痛，好難受。 而MediLASE最新脫毛科技，係無需敷冰，敷凍gel，吹凍風，一路脫毛一路有冷凍劑噴出，過程快捷又無乜不適。
而家無左毛髮既阻住, 連帶搽膚護品都更加吸收, 皮膚驚喜地更有光澤感, 哈...哈.....
另外上粉時你㑹感覺更加貼面, 觸感更細滑! WOW..............
期待下一次療程呀.........................
心動不如行動啦, 如果你都想好似我咁安全舒適咁脫去面上毛毛，就立即登記(https://goo.gl/BKQsQF)免費體驗PRO-Test啦!
品牌網址：
http://www.medilase.com.hk
療程由品牌提供, 內容純個人分享
MediLASE
Facebook : www.facebook.com/medilaseprou.laserhairremoval
微博: http://weibo.com/medilase
weChat : MediLASE無痛激光永久脫毛
contact me : [email protected]
|
| 2017 年 1 月 13 日 星期五 |
| 精簡法國菜@Oui Oui Bistro |
分類: 飲飲食食 |
好耐無同哈比去浪漫一番, 諗起之前食過呢間既BRUNCH, 覺得無論環境及食物都岩數, 未試過夜晚黎食, 今晚決定去試下!
店內環境燈光昏暗, 播著輕鬆音樂, 細細間但令人感覺舒暢, 枱上點起小蠟燭, 咁就做就呢一餐燭光晚餐!
喜歡上次能同店主交流下煮食心得, 係法國藍帶學廚既店主好希望能將法國菜帶比多D香港人認識, 見到店內宣傳今日由法國空運到港既食材, 包括生蠔, 精選魚類及龍蝦
打開餐牌由頭盤, 沙律, 主菜至甜品都有供應, 仲有酒類, 非酒精類及咖啡
就點左呢2杯Mocktails醒一醒神先, 兩杯賣相幾吸引, 左邊果杯係有檸檬, 蜜糖及薑味, 少少薑既辣味幾特別! 而右邊果杯係以雜莓MIX而成, 酸酸甜甜都幾好飲!
店主先送上自家食譜但外判製成既麵包, 細細個但好香, 食落質感有D咬口, 唔似坊間食到既空氣包!
沙律就點左忠粉既凱撒沙律(細), 爽脆沙律菜配上惹味自家製煙肉碎粒, 灑上芝士粉及醬汁, 味道吸引既!
頭盤係呢款用上4-5層製成法國薄餅, 每層中間係搽上芝士, 面頭淋上蕃茄醬, 店主提示要一口食晒, 咁先可以完滿地食到佢既味道, 帶酸既蕃茄醬配上軟滑芝士, 口感及味道配搭唔錯~
好啦.....主菜到, 我點了呢個法國春鷄, 嫩滑鷄肉配以自家製醬汁(包括有青椒, 洋䓤, 蕃茄, 鷄湯及白酒煮成), 味道偏濃味, 夾係雞肉上又好平衡返喎, 得左!
另一個主菜係西班牙豬扒配自家製紅桑莓醬汁, 店主透露帶微酸既紅桑莓醬汁可平衡豬扒既油膩感, 但其實我地又食唔到豬扒既油膩感, 反而食到佢煎到外圍帶少少燶香既質感, 厚切食落夠晒口感但絶對唔嚡口, 哈比一路食一路表示滿意!
環境氣氛咁舒適, 當然要食埋個甜品咁先完滿啦, 我地一致決定要試呢個正宗法籣西多士, 呢個真係不得了, 多士質感食落鬆軟, 中間唔會搽咩花生醬, 配以蘋果及自家製雲呢拿雪糕, 淋上超好味既焦糖糖漿, 一次過將多士, 蘋果及雪糕放入口, 不出5分鐘我地已經食完, 真係教曉我地真正既法籣西多士係點樣, 原來係非常好味道!
一路食, 一路同店主交流, 原本想同哈比二人浪漫一番都變左為吹水食經, 但絶對唔介意, 反而渡過左一個開心既晚上!
Oui Oui Bistro 地址 : 長沙灣福榮街5-12號依時大廈地下A舖
contact me : [email protected]
|
« | 39 | 40 | 41 | 42 | 43 | 44 | 45 | 46 | 47 | 48 | ... | 147 | »
|
