| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2016 年 10 月 5 日 星期三  |
| 回味中@辛安東元組奶奶鷄 |
分類: 飲飲食食 |
對上一次食係明洞度食, 味道同香港既都好相似, 好耐無食又再回味一番先 :)
見佢寫住慶祝開店3週年, 奶奶鷄半價優惠, 半價喎.........好吸引呀!
一於要個原味奶奶鷄 (小辣), 配料包括青瓜, 紅蘿蔔, 薯仔, 全部都入晒味, 鷄肉嫩滑, 份量都幾對眼, 無話將價就貨, 而佢個韓國粉絲口感煙韌, 索埋D醬汁一齊食更飽肚!
仲有其他食物選擇, 當然要試下啦!
韓國既水冷麵一向深得我喜愛, 梨片清甜爽脆, 配以半隻蛋, 麵條軟硬度適中, 最緊要全碗麵夠凍, 若然可加醋及芥末一齊食會更加好味!
沖淡一下奶奶鷄既濃味, 推介試呢個特式凍蕃茄, 原個蕃茄去皮, 上面有D柚子皮點綴, 一咬落去鮮甜多汁, 柚子啫哩味滲滿在蕃茄中, 一食暑氣全消, 非常驚喜!
埋單都係百幾蚊, 絶對抵食! 難怪愈食愈多人............
contact me : [email protected]
|
| 日食@七褔神和食亭 |
分類: 飲飲食食 |
係樓下門口已經見到若干人係度等緊位, 好在一早BOOK左位, 唔係就要齊齊係樓下等入坐, 又難怪既, 食物選擇多, 價錢合理, 地點又方便!
日本料理, 首要點返個刺身都好合理呀(除非唔"好"生食), 呢款六品刺身盛盒($168), 包括鱆紅魚, 三文魚, 蝦, 北寄貝, 帶子, 吞拿魚(每款三件), 最愛佢個帶子, 有D厚度, 食過鮮甜又有口感! 友人就推介鱆紅魚, 佢話比起第二度食, 呢度鮮甜D!
呢度既蟹籽沙律係我黎到都要必叫既, 呢客係細份量 ($38), 但想講既係佢足夠2-3人食, 青瓜絲夠晒爽口, 蟹籽簡直係"豪"比你咁, 真係超抵食!!
熱食類叫左鐵板牛柳粒粒燒 ($55), 鐵板關係, 每粒牛柳仍然保持熱辣辣, 醬汁濃味, 肉質嫩滑, 另外佢個薯蓉亦唔可以放過, 好香滑!
炭火燒泡菜鷄翼 ($48), 一客三隻, 一啖咬落去食到泡菜碎同鷄肉融合, 少少辣好香口, 若然想加辣, 可配以韓式辣醬!
大蝦什錦天婦羅 ($55/一客6件), 有大蝦3隻, 另外3款係茄子, 南瓜, 芉頭; 上枱時仍然保持熱度, 食落去唔會有一口油, 唯炸漿有點兒厚度, 食時覺有D硬口感覺!
點左以上熱食, 無非為可以用黎"送"蕎麥冷麵 ($38) 及稻庭烏冬 ($52), 兩款口感䭃滑, 份量亦頗多, 面頭有紫菜碎條及芝麻, 食時增加香味, 加芥辣落冷麵汁一齊食, "雪雪"聲好過癮!
 
雖然食好飽, 但點都要食呢度多人之選既菠蘿雪芭 ($48), 賣相非常得意, 原隻CUTE版菠蘿, 食落滿口菠蘿味道, 再食就食到菓肉粒, , 不禁想唱句洗腦歌.............I have pineapple.......
一款甜品又點夠, 一口朱古力芝士年糕 ($38)又點睇呀? 身為芝士控的我, 又點會放過呢樣呢?! 一咬開就見到入面既芝士"咇"出黎, 食落唔太甜, 外脆內軟, 教我如何不愛它呢............
價錢合理, 味道唔錯, 回頭率............高呀!
地址 : 佐敦彌敦道311-313號1樓
contact me : [email protected]
|
| 2016 年 9 月 30 日 星期五 |
| 有情調, 有美食@Amour Corner |
分類: 飲飲食食 |
同哈比食西餐, 見呢間餐廳環境昏暗, 幾有情調喎, 入坐時已見不少情侶在進餐!
見到枱上有呢款海鮮拼盤($228)宣傳牌, 賣相及價錢都幾吸引, 經商議後決定要一客
侍應送上見實物同照片都幾相符, 珍珠蠔肉比較薄身, 口感唔係好夠, 但食落幾鮮味; 最欣賞係隻西班牙大頭蝦, 真係幾大隻, 肉質鮮甜, 2隻真係唔係幾夠喉!
食完個海鮮拼盤又點會夠, 仲點左呢款二人套餐($298), 都幾多野食!
由餐湯開始(今晚係南瓜湯), 味道偏淡, 但都飲到絲絲南瓜味道
凱撒沙律 - 沙律菜爽脆, 配上芝士咸香, 幾好味
頭盤都有2款, 巴馬火腿蜜瓜 - 薄薄一片咸香味道既巴馬火腿搭係甜蜜瓜上, 咸甜交錯, 但從來無出錯!
青蘋果鵝肝多士 - 厚切鵝肝, 食落唔會有渣, 要趁熱食! 中間夾著一片薄薄青蘋果片, 中和鵝肝既肥膩, 配以薄脆多士, 好邪惡呀!
主菜選了烤澳洲牛柳扒, 五成熟, 切開仍然見到中間係紅色, 食落肉質嫩滑, 肉味都幾出, 食埋伴碟既薯蓉, 果然無選錯
另一款係忌廉汁煙三文魚菠菜意粉, 份量適中, 三文魚碎上, 配以菠菜及洋蔥增加香味, 意粉軟硬度都幾岩我, 唯個忌廉汁味道有點偏咸, 淡口返少少會好D!
甜品有意式奶凍及Dreyer's 士多啤梨雪糕, 奶凍香甜幼滑; 士多啤梨雪糕酸甜味好醒神, 兩種味道又幾唔錯!
最後飲埋杯飲品就完滿結束呢餐有情調既西餐啦!
contact me : [email protected] |
| 2016 年 9 月 26 日 星期一 |
| 食"德"開心@Schnee Germany Restaurant |
分類: 飲飲食食 |
朋友之前歐遊回來約出黎派手信, 基於安全理由就無去玩埋德國, 所以今晚約會既地點專登㨂選食德國菜(補償返???...哈...!!) 參考網上資料, 呢間評價都好似唔錯, 地點又就腳, 一於打去訂定位!
餐廳面積普通, 入坐時已見有人開緊餐, 另設3間獨立房間, 大電視正在播放球賽
裝潢幾有德國FEEL, 有鹿頭, 德國旗, 坐緊窗口位仲可有街景望下
打開餐牌, 食物種類都幾多, 由前菜沙律, 主菜, 意粉/飯到甜品都有供應
仲提供鷄尾酒/手調飲品類, 咁就先黎一杯 Schnee ($58) 飲下先, 材料包括蘋果及荔枝, 味道清新
友人咩都想試, 就由餐湯開始, 分別點左2款餐湯, 德國經典薯仔湯子($58), 質感好濃厚, 似飲緊薯蓉, 味道幾香
傳統匈牙利燉牛肉湯($58), 望落似羅宋湯, 湯料有紅蘿蔔, 薯仔及牛肉粒, 飲落味道較薯仔湯更濃味
前菜沙律有呢款新鮮三文魚他他香草酸忌廉汁伴溫泉蛋($118), 賣想討好, 蛋汁好香蛋味, 撈埋香滑三文魚粒一齊食, 口感好軟滑, 另外既沙律菜淋上香醋汁, 好醒胃, 為之後既肉食打好基礎
侍應推介呢款燒德國燒腩仔配薯條($188), 燒豬手就食得多, 一於轉食呢款燒腩仔, 一客份量都幾多, 無想像中咁肥, 肉質好嫩滑, 而個皮脆到不得了,燒到唔油膩, 配芥末醬食就最岩, 侍應果然無介紹錯! 呢個時條當然要叫返杯Bitburger Premium Beer ($68)黎伴食啦, 黎食德國菜, 無理由唔飲返杯Beer呀?!
友人係無澱粉質不歡, 叫埋呢個黑松露野什菌忌廉汁濶條麵($148), 一上枱時已經聞到香濃黑松露味, 好多野什菌粒, 每條濶條麵都沾上香滑忌廉汁, 誠意推介比喜歡黑松露既朋友!
食到呢度其實都好飽, 但又想傾耐D, 於是又叫埋甜品, 見到餐牌寫住係Movenpick, 一客夢幻雲呢拿雪糕($45)又點少得, 香幼味濃; 另一款係日本黑芝麻芝士餅($48), 賣相幾得, 芝麻味超濃, 食落又唔覺甜味, 幾特別!
估唔到呢間德國菜餐廳其他菜式都食到, 唔係單一豬手香腸先係招牌菜, 其他菜式都做得出色, 價錢都算合埋, 唔錯唔錯^^
地址 :銅鑼灣駱克道４４７－４４９號中威商業大廈１樓
contact me : [email protected]
|
| 2016 年 9 月 20 日 星期二 |
| 日全食@番本日式放題 |
分類: 飲飲食食 |
呢排忙到飛街, 想到以食作為減壓方法, 立即約埋友人一齊去食放題, 最方便地點梗係會諗到係旺角, 呢間可算係區中都算出名既日式放題餐廳
價錢以入座時段訂價, 最貴都係二百零蚊, 限時食2個鐘, 時間都好夠食
去到見到好多人係門口等候安排入座, 一早訂左位, 好快就被安排入座, 望下枱上既食物落單紙, 食物選擇都算多, 包括刺身, 壽司, 小食, 炸物, 燒物, 熱食, 飯/麵食及酒類(啤酒, 清酒及梅酒)
任食仲包埋任飲, 自己去雪櫃拎飲品, 好多款式, 仲有雪糕任食, 唔怕無甜品~
打頭陣當然係食刺身先, 除左落單紙上既白拖羅外, 全部點晒, 三文魚切得都唔細件, 甜蝦亦唔細隻, 個人可以食十幾隻, 總話黎講刺身食落係新鮮既
雖然有人講諣食放題梗唔會壽司呢D咁飽肚野, 但眼見佢好多選擇, 有D係出面唔多見有, 一於點少少試下, 好彩佢SIZE細細, 飯量唔大舊, 一啖一舊都幾過癮, 水準OK!
見到有中華冷麵, 不好飯類既友人雙眼發光, 係要點返一個, 食落夠冰凍, 配料包括青瓜, 蟹柳絲及粟米粒, 淋上酸汁好醒胃!
食完凍野, 開始進行熱食, 點了日式煮珍珠蜆, 食落無沙, 加上有麻油, 都幾香; 另外呢款係日式煮牛肉, 牛肉咬落有肉汁唔太嚡, 味道唔太咸, 空口食都OK!
天婦羅係友人至愛, 係咁易點了幾款, 包括糖心紫蕃薯粒(確係幾甜!), 炸蝦, 南瓜, 全部熱辣辣, 唔係一早炸好等有單就夾比客, 點埋醬汁一齊食都唔錯!
我都唔客氣點了幾款炸物, 包括炸鷄軟骨粒, 芝士年糕及紫薯球, 上枱時仍然都係熱辣辣, 炸物唔熱都幾難食, 最歡喜係個芝士年糕, 咬落香甜, 內裏既軟芝十會咇出黎, 不禁要再追加一轉!
見到有D燒蔬果類, 當然又要試下啦, 呢串燒翠肉瓜及菠蘿, 燒完仍然係咬落有汁, 菠蘿甜度高, 真係愈食愈想食!
收加一服務費, 侍應反應夠快, 等候食物時間唔耐亦無走單, 唔怪之得咁多人幫襯!
地址 ： 旺角西洋菜南街168號3樓全層
contact me : [email protected]
|
« | 45 | 46 | 47 | 48 | 49 | 50 | 51 | 52 | 53 | 54 | ... | 147 | »
|
