同朋友飯局, 除左可以吹水見下面, 另一好處就係可以有機會試新食店, 呢間就係朋友提議, 聽個名以為係食豬...............全部係食豬, 但又唔係喎!

餐具滲出玩味...................

環境幾舒服, 出面門口另設用餐區, 另設酒類飲品, 岩晒想食煙既朋友, 可以一邊拎住BEER, 一邊出去"呼吸"一下!

講返呢餐先, 食物選擇有沙律, 前菜, 意粉到主菜甜品都有, 肉類方面唔止提供豬肉, 仲有鷄, 牛羊及海鮮供應, 先試下D頭盤:

香脆辣鷄翼($109), 炸到漲卜卜, 配以甜酸辣醬, 食落似食緊某間炸鷄店既出品, 哈...........

蘇格蘭溏心炸鷄蛋($58/隻), 配以甜甜地既煙肉醬, 呢款好耐都無食過, 外層炸到香脆, 入面既溏心蛋質感軟軟, 口感層次豐富

焗芝士通心粉($68), 份量都算多, 見到D芝士拉起, 超邪惡呀, 咸香芝士味配軟熟通心粉, 只食呢款都OK呀!

西班牙海鮮飯 ($198), 海鮮包括蝦, 三文魚, 青口, 帶子等, 飯粒煮到幾軟腍, 味道偏咸

精選豬肉拼盤 ($398), 有幾款豬肉既部位比你試到, 最愛係呢舊豬腩肉, 一層肥一層肉, 燒得好香口, 食落唔會好肥膩, 點D醬汁一齊食, 好味呀!

食物價錢唔算太親民, 但食物水準都算唔錯, 岩一班朋友黎飲野開餐!

地址 :　尖沙咀諾士佛台1號地舖

contact me :  [email protected]

觀塘區幾時變成搵食特區?!  由其係工廠大廈入面, 之前都食過幾間, 但今次幫襯呢間係以私房菜命名, 食得私房菜, 通常都比起出面開餐期望指數會高D!

店內環境雖佈局普通, 但坐得唔會迫迫夾夾, 另設有電視送飯.....哈!

設有二人套餐款($328/位), 菜式數目都唔少喎, 飲啖茶後就可叫上菜

先試呢幾款: 有機沙律菜伴芝麻醬(沙律菜夠爽脆, 轉為醋汁, 酸酸味幾開胃); 保健秋葵真味(白烚秋葵再淋上芝麻醬, 口味幾清新); 涼伴黑木耳 (配上醋酸汁作為一碟涼伴前菜, 黑木耳口感爽滑, 健康之選); 茶燻流心蛋伴黑魚子醬配厚刀切茄子 (半流心蛋食落幾CREAMY, 個厚切茄子點埋特製醬汁好味道)

清酒南非鮮鮑魚, 鮑魚唔太大隻, 質感有咬口, 咬落食到陣陣清酒味,  但略嫌蓋過了鮑魚本身味道!

我最喜愛既燉湯(燉哈密瓜螺頭黑毛豚肉湯)出場啦, 熱辣辣原盅上, 見到每盅都有唔少湯料, 咁多湯料點會唔鮮甜呀?!  呢輪秋風起飲呢D咁滋潤既湯水就岩晒啦!

呢款蝦球水芙蓉, 個名就好靚, 估唔到賣相都一樣咁靚, 滑滑既水蛋配以彈牙既蝦球, 配以一粒杞子作為點綴, 平凡中顯得不平凡!

冰梅黑豚肉排骨, 肉質有d咬口, 肉上舖有少許酸薑絲再淋上醬汁, 味道有點似食緊京都骨, 而下層既鍋巴, 一軟(肉)一硬(鍋巴), 口感層次豐富左, 又比佢諗到喎!

鮮魚湯浸碧綠溫室菜苗, 魚湯以立魚及元貝佳淆製, 飲落有濃濃魚味, 配以嫩脆溫室豆苗, 可作為清新口腔之選!

有餸又點可以無飯呢?  呢籠荷香蒜海斑片蒸鴛鴦飯, 有蒜香海斑片亦有充滿荷香既紅白飯, 份量都幾多, 但味道唔錯, 最終都食得晒!

食到呢到真係好飽, 但有甜蜜美滿慶團圓又點可以錯過呢?!  甜品包括自選雪糕球一客, 另有炸紫薯丸, 一凍一熱, 個紫薯丸我就好LIKE啦!

另有加一服務費, 如以現金付款可免茶芥(每位$12), 咁當然係比現金抵D啦......................哈哈!

地址 : 觀塘官塘工業中心三期4樓L室

contact me : [email protected]

繼上次係呢度食過晚餐後, 係呢頭返工既友人話我知推出左只限星期六日既Semi Lunch Buffet, 問我有冇興趣試下?  一於捨命陪君子:)

內在環境舒適, 由於時間尚早, 未見好多客人, 可以輕鬆咁進餐

呢個Semi Lunch Buffet時間由上午11點半至下午3點, 時間非常充裕, 價錢($158)已包任食頭盤, 餐湯, 甜品 (包飲品1杯), 比多$40已經可以有埋自選主菜一客, 都幾抵食喎!

頭盤, 餐湯, 甜品放置於呢個區域, 大家可以任意拎取食物

頭盤有幾款選擇,  包括煙三文魚, 雜錦凍肉拼盤, 柚子豬頸肉沙律, 日式冷麵及巴馬火腿等

而沙律方面就更多元化, 包括木瓜蝦沙律, 德國薯仔沙律, 意大利粉沙律, 甜薯沙律及凱撒沙律等, 愛食沙律既朋友應該幾滿足

試左D煙三文魚, 口感好香滑;  雜錦凍肉拼盤味道唔錯, 與酒店食既水準差唔多; 沙律就比較喜歡木瓜蝦沙律, 木瓜腍甜, 蝦肉幾鮮味; 而個甜薯沙律就純粹個人喜愛

食物味道足以令我ENCORE再ENCORE, 食到呢度基本上都已經飽到一大半, 但開放式廚房不時傳來肉類既香味, 況且加多$40就可以食埋主菜, 我就再豪D另加$75選擇美國一級肉眼扒! 上枱時已經聞到好香肉味, 七成熟切開見到肉汁爆流, 質感食落肉中帶點肥膩, 點少少燒汁及芥辣已經足夠! 另外佢既炸薯條亦唔可以錯過, 我完全食晒....................哈哈!

服務細心既侍應見我主菜都享用完, 溫馨提示我可以出去拎D甜品食下, 咁又點可以辜負人家既美意呢?!  甜品有鮮果粒, 啫喱糖, 奶凍, 芝士餅, 芒果慕絲餅等, 賣相精緻, 味道稍為普通左D, 但想有一口甜品滿足下味蕾係可以既!

埋單收加一服務費, 但可以有個地方比你坐咁耐, 同朋友食下傾下, 一個價錢橫誇午餐及下午茶時段, 以今時今日外出用餐黎講, 實屬難得!

地址 ： 觀塘觀塘道414號亞太中心得(OPC)3樓303號舖

contact me :  [email protected]

夜間開始覺涼, 意味著期待已久既秋天終於都黎到, 皮膚乾紋明顯走出黎同你SAY HI, 當然要使用返滋潤度高既身體護理產品,  性價比高既彩豐行就為我提供我今期護理皮膚之選 :

絲質蛋白蔗糖洗髮露 ($12/100ml)
專為受損、乾燥飛散的頭髮而設。蘊含水解蠶絲蛋白和蔗糖，潔淨秀髮之餘，能補充所需養分，令髮絲得到滋潤和修護，提高髮絲柔韌性，重現柔順閃亮。
主要成份 : 水解蠶絲蛋白、蔗糖、金銀花精華液

細細支岩我拎去做完運動後洗頭之用, 有香味, 加水後容易造出泡沬, 清潔力唔錯, 過水亦容易!

之後再用埋呢款絲質蛋白護髮素 ($12/100ml)
專為受損、乾燥飛散的頭髮而設，蘊含多種頭髮所需養份，包括絲質蛋白,銀杏葉精華、金銀花精華及洋甘菊精華，能滋潤乾燥髮絲，令髮絲呈現彈力和健康，令秀髮減少乾燥或折斷，變得柔順閃亮，平伏易梳。
主要成份 :  洋甘菊精華, 金銀花精華, 銀杏葉精華, 水解蠶絲

唧出適當份量塗搽於頭髮中間位置, 避開頭皮位置, 輕輕按摩就可沖水, 用後頭髮易於梳理, 減輕毛燥感!

洗完頭就再到沖涼....................

呢支牛奶美白柔滑沐浴露 ($35/1000ml)
含豐富的天然牛奶成分，滋潤淨白肌膚，潔淨同時美白。添加蜂蜜及蔗糖，為肌膚注入源源不絕的滋潤成分，舒緩肌膚乾燥現象，沐浴後清爽不會繃緊，散發香濃牛奶香氣。
主要成份 : 牛奶、蔗糖、蜂蜜、甘油

超濃香牛奶味, 仿似真係用緊牛奶沖涼咁, 喜歡牛奶味既朋友應該愛死佢!  加水亦易起泡, 用後皮膚唔會覺得好乾, 仲仍然維持陣陣牛奶香味!

想令皮膚繼續KEEP住水份, 係沖完涼後皮膚係半濕狀態下就要用佢....................白麝香身體潤膚乳
細膩潤滑的乳液於肌膚表面形成鎖水保護膜，牢牢鎖住水分，為肌膚提供持久滋養，提升肌膚抗乾燥能力，回復肌膚彈性，締造絲滑嫩白肌膚，並散發浪漫迷人的白麝香香味。
主要成份 : 天然植物抗敏精華（積雪草精華、虎杖根精華、黃芩根精華、茶葉精華、光果甘草根精華、母菊花精華、迷迭香精華）、橄欖角鯊烷

白麝香味令人感覺放輕鬆, 質地易推亦快被皮膚所吸收, 一搽皮膚乾紋BYE BYE.................

洗完手皮膚乾爭爭, 呢支玫瑰可可巴油潤手霜 ($16/50ml)可以幫到手

內含保加利亞玫瑰香薰油及霍霍巴油滋潤成份，性質溫和，易於被肌膚吸收。搭配維他命E、銀杏葉精華、赤芝精華，能保濕滋潤肌膚，改善雙手乾燥龜裂現象，令手部肌膚光滑細膩，用後散發出陣陣幽雅玫瑰花香。
主要成份 :  保加利亞玫瑰香薰精油、可可巴油、乳木果、靈芝精華、銀杏葉精華、橄欖葉精華、維他命E
天然植物抗敏精華

質地柔潤,  清香玫瑰香, 搽於手指邊位脫皮位置, 輕輕按摩幾下就被皮膚吸收晒, 效果唔錯!

價錢非常親民, 分店又多, 要去入貨都好方便!!

品牌網址 : http://www.choi-fung.com/

此產品由品牌提供, 內容純個人分享 :)

contact me :  [email protected]

阿媽話成日出街食, 食埋咁多味精落肚無益呀, 但對於我地呢d一日三餐都出街既既香港人黎講, 無可奈何之下又可以點樣?!  聽朋友介紹呢間主打家庭飯路線既食店, sell無味精餸菜, 地點係工廠大廈內, 都唔算難搵!

裝飾以黑紅色為主調, 唔會太多人, 環境幾舒適

呢度提供二, 三及四人套餐, 當然亦有散叫, 望落價錢幾親民, 餸菜款式都好媽媽會煑既餸, 想食花巧菜既呢度就唔會搵到啦!

落單後, 侍應送上呢杯養生八寶茶, 味道飲落順喉, 飲時聞到菊花既香味, 比較飲普通中國茶更為特別及驚喜

食晚飯時, 我好喜歡有湯飲, 咁先似食住家飯嘛, 侍應推介今晚既原盅燉湯係松茸螺片燉豬展, 價錢超抵($38), 熱辣辣奉上, 見得出湯料十足, 飲落味道鮮甜, 絶唔係"例水"味道, 超推介!

散叫了幾款小菜, 呢款係侍應推介蓮藕煎肉餅 ($78), 厚厚肉餅煎得外香, 一口咬落去感到肉汁爆發, 味道唔太咸但用黎送飯就一流, 果然無介紹錯!

呢款香菇杞子北芪銀山焗鷄 ($78), 以中藥料入撰, 有點似金針雲耳蒸鷄feel, 鷄肉食起時食到紅棗既甜味, 底層以金菇及粉絲索吸鷄肉流出既精華,千萬唔好漏食呀!

籠仔蒸斑頭腩 ($138), 熱辣辣以籠仔上枱, 斑頭腩份量都唔少, 以蒜蓉及果皮絲調味, 食落無細骨, 魚皮加上魚肉又係好送飯, 底部既絲瓜又係索左魚肉精華, 食落梗鮮甜, 無得輸呀!

一餐健康既晚飯又點可以無菜呢?!  蟹肉扒西蘭花 ($88)又點睇呀?! 我就歡喜啦, 西蘭花面淋上雪白既蟹肉, 食落唔油唔咸, 岩我口味!

呢度收取加一服務費及茶錢, 食物無味精, 侍應態度有禮, 主動加水等我可以細意品嚐呢杯八寶茶, 咁就完成左呢餐"偽返屋企食飯"飯!

地址 ：觀塘開源道60號駱駝漆大廈3座1樓1室

contact me :  [email protected]