| «‹ September 2026 ›» | | S | M | T | W | T | F | S | | | 1 | 2 | 3 | 4 | 5 | | 6 | 7 | 8 | 9 | 10 | 11 | 12 | | 13 | 14 | 15 | 16 | 17 | 18 | 19 | | 20 | 21 | 22 | 23 | 24 | 25 | 26 | | 27 | 28 | 29 | 30 | |
|
2016 年 12 月 12 日 星期一  |
| 中西煮法有驚喜@Aroma |
分類: 飲飲食食 |
轉左工作地點後, 係港島區開餐既機會大大提高, 今次選擇左呢間食多國菜餐廳 Aroma, 試下新口味! 餐廳有兩層, 樓下係Bar區, 而樓上供客人用餐地區!
二樓既用餐區面積唔太大, 場內佈置充滿玩味, 比人一種放輕鬆感覺
至到八點都係Happy Hour, 酒精類飲品買一送一, 當然唔好錯過啦! 但我還是選擇呢杯Strawberry and Coconut Mojito, 醒下個胃先
餐牌上提供Tapas Main and Side Dishes, 食物選擇以煎炸類為主, 可能岩送酒卦, 一於叫幾款Tapas食下先
呢度既食物主要特色係以中式醬料混入去西式煮法, 好似呢款Cheese Pumpkin Cake ($58), 以中國臘肉碎代替煙肉, 食起上黎更加香, 質感有嚼口既咸臘肉配以軟腍既甜味南瓜餅, 口感同味道混合起黎相當特別!
XO Mushroom ($58), 以你我雪柜應該都有一樽既XO醬炒雜菇, 味道食得出XO既香味, 面頭再灑上瑤柱絲, 但略嫌D菇妙得油左D!
呢款Deep-fried Chicken Wings with Preserved Egg Yolk ($68), 超推介, 簡單黎形容即係我地食開既黃金蝦D朋友, 濃香惹味既咸蛋黃汁液舖上去炸到金黃香口既單骨鷄翼, 單骨鷄翼容易入味外, 進食時又相當方便, 一客好快比我地KO啦, 真係超好好好味呀................................!
呢個Side Dish Tasty Fries ($48)就咁睇落去咪只係炸薯條, 最多加多少少芝士碎好未?! 有咩咁特別先? 今次個亮點就係個醬, 呢個醬係用豆辦醬混入蛋黃醬, 你無睇錯呀, 係豆辦醬呀, 味道比較偏向咸辣味, 但質感就係蛋黃醬既軟滑, 真係帶比人驚喜, 配薯條食係好味同夾既, 唔知係點諗到咁既配搭呢?! 不禁要比個"勁"字佢!
話晒係開餐, 點都要返個主菜先夠既, 呢個Red Fermented Beancurd Chicken ($228), 即係南乳鷄卷, 一客四件, 鷄肉先焗, 以鷄皮就再煎一煎香再包返件鷄肉, 肉質食落嫩滑, 而由於中間係包左D南乳, 食落口充滿佢既咸香味, 即係嫩滑版既南乳吊燒鷄; 個配菜係粟米仔, 豆腐干粒加香肉粒, 黎一個中西合壁!
呢餐中西混合煮, 食物水準相當唔錯, 又帶到驚喜感比客人, 每次上菜時, 侍應會簡單講解返個菜式既特式之處, 令我相當滿意呀!
Aroma 地址 ： 灣仔石水渠街６４號地下１號舖
contact me : [email protected]
|
| 2016 年 12 月 9 日 星期五 |
| 初試土耳其菜@我愛伊斯坦堡 |
分類: 飲飲食食 |
旺角真係一個卧虎藏龍的地方, 咩地方既菜式都可以搵到, 今次初嚐土耳其菜既經驗就係發生係呢間食店!
係大廈既一樓, 門口貼左大大塊土耳其咖啡既宣傳板, 包無搵錯地方!
食店面積唔大, 估計可容納二十人內, 燈光昏暗, 播放著經典歌曲, 展開我地今晚既土耳其餐之旅
侍應送上餐牌, 見到有套餐或由廚師發辦既餐單, 未接觸過土耳其食物, 由廚師發辦應該無走鷄
1) 特色沙律配白芝士 - 材料包括新鮮爽脆既生菜絲, 伴以青瓜粒, 蕃茄片及白芝士, 撈均一齊食, 食到滿口清新感覺, 咸咸地既白芝士調下味都幾得意
2) 茄子薯仔配自製乳酪 - 油泡過既茄子食落香口, 薯仔片食落相當有薯仔味, 配以自製乳酪 , 味道好夾, 當係一款小食都幾唔錯
3) 自家土耳其乳酪芝士炸物 - 亦都係用乳酪芝士入饌, 好岩我呢個芝士控口味, 熱辣辣外脆內面有芝士作餡料, 加上少少番茜碎增加香味, 好味道
4) 梅爾辛紅飯釀烤鷄 - 半隻烤鷄內裏釀滿充滿香草味既飯, 鷄件肉質超嫩, 香脆薄鷄皮唔會食到一口油, 超推介呢款菜式
5) 阿拉斯加狹鱈魚 - 炸香左既阿拉斯加狹鱈魚肉, 配以千島醬汁, 再夾上面層既桃片及底層既蕃茄片, 一件放晒入口, 香甜軟身既桃片混合埋脆口既炸魚, 口感同味道都大不同, 增加左食物味道既層次感
6) 特色甜品 - 包括開心果千層酥, 味道頗甜, 細意品嘗都食到開心果既香味; 另一款為土耳其著名軟糖, 呢款一食就知係玫瑰花味道, 甜度適中
初試土耳其餐發現都幾岩食, 有時放膽試下新菜式都會有得著, 同場加映今晚伴食主角: 可愛又貪睡肥黑猫一隻.....................
我愛伊斯坦堡 地址 : 旺角通菜街9-15號1樓A室
contact me : [email protected]
|
| 2016 年 12 月 6 日 星期二 |
| 食得過@Bene Italian |
分類: 飲飲食食 |
星期六要去新城市廣場食飯, 除非一早訂左位, 否則就要食好早, 唔係既話真係一位難求! 呢間意大利餐廳居然可以係唔訂位情況下可以Walk IN有枱， 心諗一係價錢貴, 一係就唔好食, 基於到到都要等位情況下, 唔想等咁耐就試一次啦!
入到去見有幾枱客, 環境望落都算幾舒服, 之後坐下坐下都客滿
打開餐牌, 食物選擇種類都唔少, 有沙律, 頭盤, 薄餅, 意粉, 肉類及甜品, 可散叫亦有晚市套餐供應, 可自由選擇, 而且正常價錢, 最貴既主菜都唔過$200
先試經典凱撒沙律($68), 另加$28可加鷄肉, 份量唔細, 羅馬生菜夠爽脆, 配以巴馬臣芝士既咸香, 喚醒一下味蕾
主食分別叫左呢款四式芝士薄餅($128), 四種芝士加埋甜粟米, 無肉只食到香濃芝士味, 餅底係薄身, 夠香脆, 食一件係唔會夠喉, 岩晒芝士控既我
經典卡邦尼意粉($88), 醬汁比較杰身同少, 變左令意粉變成一舊, 亦唔係好食到蛋汁既香味, 麻麻地
墨汁海鮮意粉($128), 賣相兩種色, 黑色(墨汁)同橙色(蕃茄), 海鮮材料包括魷魚, 鮮蝦, 蜆肉, 青口, 口感豐富, 味道有蕃茄中既少酸, 幾醒胃, 若然意粉份量可再多少少就仲好D!
總括黎講呢間餐廳回頭率都幾高, 下次再黎呢個商場, 唔駛傷腦筋去邊到開餐!
地址 : 沙田新城市廣場一期1樓103A舖
contact me : [email protected]
|
| 2016 年 12 月 1 日 星期四 |
| 肌膚回春好品(基本4點)@Domohorn Wrinkle |
分類: 美容 |
記得幾年前從登記領取試用裝而初次認識Domohorn Wrinkle 呢個日本護膚品品牌, 估唔到今日受Domohorn Wrinkle邀請，試用其產品四個月
SAISHUNKAN於1974年研發出年齡肌專用的基礎護膚品「Domohorn Wrinkle」。之後， 更持續學習漢方與自然之道理，並積極吸取現代科學的成果,每隔數年就更新成分一次，不斷致力提高産品的品質。因為所製造的是毎天都直接塗上肌膚的産品,所以公司竭力講求讓顧客安心的品質。堅持採用製造醫藥品的嚴格品質管理(GMP標準)，用以生産Domohorn Wrinkle系列。公司認為講求品質比效率及速度更為重要，這是它們的態度和堅持(果然係一貫日本人做事既認真態度)。
Domohorn Wrinkle 的目標是透過增強肌膚的自我修復能力，預防皺紋和老人斑。而每項產品之間能互相產生相乘作用，在肌膚發揮最大功效。改善年肌煩惱的關鍵，在於提升隨年齡增長而衰退的自我回復力。使用全線產品比使喚醒肌膚潛藏的力量。每天持續護理肌膚，提升肌膚自我回復能力，達致完美無瑕，肌膚。
在日本，800萬名客人親身體驗過Domohorn Wrinkle的功效，並獲得許多正面評價。
品牌更於台灣節目「女人我最大」及該系列入選「2016美妝大賞」: http://mr.mina.com.cn/hufu/111169.html
隨住年齡增長, 皮膚質素每況愈下, 膚色明亮程度變差, 底層缺水令毛孔變得明顯, 彈性緊緻性亦減低!
收到既呢4款產品名為"基本4點", 呢4項產品不單令功效「提升」，更是「倍增」，喚發肌膚神采，緊緻亮白，令營養更能滲透。
全部產品為日本製造, 密封式包裝, 香港沒有門市, 所有產品由日本直送到香港, 送到手中的產品上均標有生產年月日印記!
清潔完面部後就可逐步使用:
1) Intense Hydrator (120ml) - 給予滋潤後肌膚變得柔軟，能調整肌膚水通道，令產品成分容易滲入肌膚內。
蘊含兩種分子大小不同的透明質酸：較大的分子停留於肌膚表面，慢慢滲透；較細的分子則迅速滲透至底層角質組織，發揮由內至外的滋潤功效。兩種大小不一的透明質酸互相配合，令肌膚徹底水嫩潤澤。
塗抺2次於全面, 先按壓, 後輕拍, 質地水感!
2) Vital White Essence (30 ml) - 激活基底膜，加快新陳代謝，締造充滿活力、具透明感的緊緻肌膚。
為肌膚的核心提供大量養分的藥用美白*精華素。加速新陳代謝，促進自我回復能力，重拾充滿活力、具有透明感的肌膚。
將精華液點在額頭, 鼻子, 雙頰及下巴上, 全面推開後再以指尖輕彈, 質地輕柔易推!
3) Cream20 (30g) - 為肌膚回復膠原蛋白，對抗老化的暗啞，重拾柔軟回彈的肌膚。而且有效加強運送水分及營養到深層皮膚，賦予肌膚優質的膠原蛋白，支援肌膚內部膠原蛋白增生，以支撐皮下脂肪。
將面霜點在額頭, 鼻子, 雙頰及下巴上作輕輕打圈按摩, 質地幼滑, 亦係好易被推開!
4) Milky Veil Lotion (100 ml) - 基本4點的最後一步，能鎖緊肌膚得到的水分和營養，成為保護年齡肌的第一防線。鎖緊使用至Cream20的營養，守護肌膚遠離各種外來刺激及內部傷害。
將乳液到於手掌中推開, 然後按壓於面部, 直致手掌在面上無黏著感覺!
首次使用呢4款產品, 用後感覺皮膚被滋潤了許多, 光澤感都提升! 有d驚喜喎..........
未來三個月我會繼續使用Domohorn Wrinkle 產品, 當然唔少得係用後皮膚狀況分享啦.............待續!
contact me : gi[email protected]
|
| 2016 年 11 月 28 日 星期一 |
| 另類芝士火鍋@米走鷄 |
分類: 飲飲食食 |
天氣忽然轉冷, 芝士火鍋繼續狂熱, 呢間主打食鷄煲既食店有芝士鷄鍋/麻辣鷄煲, 身為芝士控的我, 當然為左呢煲芝士鷄煲而黎啦
有大小份量比你選擇, 2-3人適合小煲, 呢煲就係小鍋黃金芝士鷄煲份量, 放係電磁爐上用"保溫"MODE熱熔芝士碎就食得, 配料包括芝士碎(可自選份量), 洋䓤, 打開煲蓋就聞到好香芝士味, 鷄件頗大件仲幾多, 芝士已被完全熔掉, 鷄件被濃香芝士汁包圍住, 食落香滑芝味, 我呢個芝士控對於呢個芝士鷄煲表示滿意!
 
食完芝士鷄鍋, 侍應就會幫你加湯(有芝士濃湯及清湯2種), 呢個時候就係選擇火鍋配料, 落單紙食物種類都好多, 有海鮮類, 肉類, 丸類, 蔬菜類, 酒水類, 有選擇困難症既朋友又病發啦!
經過一輪討論, 得出以下精選食物 :
火鍋之中又點可以無牛, 和牛略嫌佢油左D, 都係選擇手切新鮮牛頸脊 (小) $208, (小)份量都唔算少, 厚薄適中, 烚完之後食落仍然有口感, 肉味頗濃又唔肥膩, 超推介呢款!
牛柏葉($38), 完全因為情意結及太耐無食, 一碟份量頗大碟, 唔知係咪因為火鍋配料關係, 每件亦係切得頗大件, 幸好烚完食落唔會咬唔開, 無梳打粉漂白味, 估唔到佢同芝士湯底又夾到喎!
見到隔離枱碟花枝片幾靚仔, 望下價錢都係$88, 一於死跟.................切花枝片得厚薄適中, 觀感幾新鮮, 烚完食到鮮甜味又唔韌, 墊底仲有金菇菜同粉絲, 抵食指數又提升左!
見佢宣傳紙上有推介出前一丁($12), 腦海即時出面邪惡芝士麵, 每條麵沾滿芝士汁; 再點多個娃娃菜(半份/$22), 娃娃菜烚完似係改良版奶油津白, 更加鮮甜, 2者結合簡直無敵!
食物質數唔錯, 每樣食物份量唔少, 下次同多D人一齊黎就可再叫多D, 回頭率一定唔低!
米走鷄地址 : 太子彌敦道761號太子藍馬之城2樓
contact me : [email protected]
|
« | 41 | 42 | 43 | 44 | 45 | 46 | 47 | 48 | 49 | 50 | ... | 147 | »
|
